Read Konyak Naga JOB 35 Bible Online

JOB 35 - Konyak Naga bible

JOB 35

¹Hüyange Elihuwe i:

²“Job, Kahwang sheshao me tao meiye ngohnang she ilaka shupu she teihpu a?

³Yejema-a, ‘Ü-ünuwe nangte hangshin pokpu? Ünu ye-ompu jingne taowe hanghe küw tüopu she Kahwangte tonglaka shupu a?’

⁴Taowe nangte hüyange nang shümpalan-o omme janpha ning.

⁵Wang te leitüoh! Leihu wangphomlan hangshin daopu!

⁶Nange ünu lingma-a, hatüowe Kahwangte takke peipu hango yenang. Nange hipak lep iye ümeng lingpuwe Ite menge peinang kü a?

⁷Nang khakshuwe ngohpuwe Kahwangte jampu ngohnang a? Kahwange nang yak mepu hang tüopu?

⁸Nang ünuwe nang kihpu hei shaoshilak; hüyange nang khakshupupa ne mengpuwa kahta üha ja jingne hei.

⁹“Aope kahtalante shaoshipu pha, iman wao ea nang; ütam jawe iman yintamlak jingne iman-e üngwün nang;

¹⁰Hüpoi, ‘Tao lingengaipupa, Kahwang aowe wangnyak me monghüm lak phanangpupa üpu?’ she aowe-o yengao.

¹¹Aowe teman shedeishe, awha yuhha yejema-a yinmok yinha phei shedei she linge tamnang, tüopa Kahwang tangte iman leih üye.

¹²Iman-e jamlak yam-e üngwün, hüpoi Kahwange yejan, hangjingne ima-a iman ota hüyange kahta ümeng ne meng.

¹³Iman jingne hüke üngwünlak jajang japu; ütahpa Kahwange ye-nge hüyange imante yejai.

¹⁴Nange iyangki nange Kahwang ye-nge; hüpoi nünne tantüoh nang jeng-a I sheshao me ngohnang.

¹⁵Kahwange ünute meiyange mong yepha, tüowe shaoshi yateng yepha külak she nange teih nang.

¹⁶Job-e hüke ngao shaha ngaowe ngohlak-a jajang japu; hatüo kaiye nange hanghe ngao yeshingpe ngao nang she shingnang.”