Read Konyak Naga JOB 36 Bible Online

JOB 36 - Konyak Naga bible

JOB 36

¹Elihuwe yelakpe ngao hüyange i:

²“Nünne tankei hüyange üjingha hipak yah-e tankei, taowe hanghe Kahwang nanleiye ngaolakei jaikei.

³Taowe tüopu manlam-a khaonang; tao lingengaipu, Kahwange khakshupupa she hüolak jingne taowe hanghe shing ngaolak.

⁴Taowe nangte ngaowe tampulan-a hango üleih yeje; nange nang sheshao me ütingpa kahta nge nang.

⁵“Kahwang-a wongnangpupa, hüpoi Iye aote-o ye-i-yeshepe yeling; I-a wongnangpupa, Iye yeshingpu hango yenang.

⁶Iye ünulan üyin me angne yetam, hüyange Iye toihalan te jinte ngaotingpa phei jon nang.

⁷Khakshupulan Iye jinte yinne angnang; Iye imante ahngpa ja leye wanglam lam ne tam nang hüyange imante jinjin te yihnoon ne tamnang.

⁸Hüpoi kahtalante yankeileiye shama-a, iman-e hanghe lingyangki tüopa jingne shange pongma-a,

⁹Hüwante imante iman ünu hüyange iman otapu hüotamnang.

¹⁰Ünu mepu lüppe yelak jingne Iye imante Iye phapu deingao jaine tamhunang.

¹¹Iman-e Kahwang ngao jaima-a hüyange I shaoshanma-a, iman chingmei me hüyange jaalunpu me üyin hipak nyoitam nang.

¹²Hüpoi hüke yengohma-a, iman yanglow-e mahtamlak, hüyange juteih yetüope lilak.

¹³“Aoyinne Kahwang yeshing iman yelakpe mongshih ngainang, hüyange shanghah shaoshi phayapeyoi, jampha she iman-e üng yewün.

¹⁴Iman üne-o shela me ngohwante linang, hüyange iman mongshang mongmengpu üyin ja ne üküm ngoinang.

¹⁵Hüpoi Kahwange kahtalante shanghah shaoshi kaiye nyüonang, hüyange iman mük eppe tamlak jingne daktin peitam nang.

¹⁶Iye nang shanghah shaoshi mepu woipei, hüyange nang yeshang yepongpe angne tam; nang khaowa ütahpa me hahyinge phonge tam.

¹⁷“Hüpoi shaapa-a nange yampu kih-e nanga shaoshi ne tam nang. Ngaotingpa me ngaophünpuwe nangte ngoinang.

¹⁸Yakjaiye lowelam-e tamphalak mepu, yejema-a hakke hepu kaiye nang ünyong yete woilak mepu nang kentingyah.

¹⁹Nang moth-e, yejema-a nang wongküm-e ngangpu-e, nange shaomeng ne yetamlakne tükpu oklak a?

²⁰Hangkih tingme jatlan iman nyoi mepu mah tamnang, wangnyakülak te yoonge tahteih.

²¹Ümeng yete monglüplak mepu kenting yah; nangte shanghah shaoshi shonpuwa tüolan mepu yanne tamlak jingne shon.

²²Teihtüoyah Kahwang wonga hangshin yongpu; I kihpu konnyüopa ao ngoh nang shi?

²³Aowe-o Kahwangte Iye hanghe linglak ngaowe tampu ye-oklak, yejema-a, ‘Nange ümeng lingteki’ she yengao oklak.

²⁴“Iye lingyangpu toishao jingne yihnoonlak teihtüotüoh, hanghe jeng kahtalan-e hemme loknang.

²⁵Iye hanghe lingyangki moilan-e ngeteki; tüopate kahtalan-e üjai me leinang.

²⁶Üting me Kahwang kheyongpu jeng teman-e wange ngoiye yeshing ok yejema-a I wangpeng ipu ye-oklak.

²⁷Hatüowa I aowe kahtok mepu yeng yah hüyange wai yeng ne menge leih yütte tamnang.

²⁸Iye kahtanyuha jingne wangmanne wangphom mepu wai yütte tam nang.

²⁹Hangke iye wangphom po yejema-a wang kaiye hangke wangkhongpu ngai, ümeken me I nyoi nang, aowe-o yeshing.

³⁰Leihuyah, hangke Iye wang khongkümpu kaiye wanglüppe tamnang, hüpoi yengching ümonga nyakke muh ngohnang.

³¹Hükih-e Iye kahtalan tamnang hüyange hahying wangman-e pha nang.

³²Iye yoi yakke wanglüppu phonang, hüyange tingpu kente keplak jingne ngao pha nang.

³³Wangkhongpu kaiye waishih wangkhah o-küki she shingne tamnang, hüyange hatüo peiküki she yinmoklan-e nehoi shingnang.