Read Konyak Naga JOB 38 Bible Online

JOB 38 - Konyak Naga bible

JOB 38

¹Hüwante yüpnyeih kaiye Youngwanpawe Job phei ngao: Iye i:

²“Nang hango yeshingpu, ngao ükeng pheipu, Ü-konjongte ngaotonglak nang ao shi?

³Kahta ja leye sha-a yongtüoh hüyange taowe nangte tongpu te jantüoh.

⁴“Taowe kahtoknyu linge ngaiwante nang ümeken me ngoh ei? Nange teshinne shingpu ne mengma-a, tüopa jeng üte itehu!

⁵Hatüo teshinne yonge khaowe ngohlak she aowe tümpu? Aowe hatüo tangme sheamme nyaopu? Tüolan khongkümpute janlak nange shingya?

⁶Hatüo kahtoknyu te sheangpu shongnyulan hangheye tükpu? Yejema-a kahtoknyu shongnyu long aowe shompu?

⁷Nyih üla ngaiwante shanhalan-e jamshe hemlok, hüyange wangdang lan-e mongmei puwe üngwün.

⁸“Aope kahtoknyu seanyu, phüppe ngai, yengching angtamlak jingne aowe tatenlan-a küp ei?

⁹Yengchingte wangphom-e yüoh-e inne tampuwa tao hüyange hatüo ünyakke shomtam.

¹⁰Taowe yengching jingne yikeng kenge tam, hüyange üphang ye me wenao peten angetam.

¹¹Taowe tüo iyangki, ‘Tüo ngoiye hei hüyange tüo kaiye tah! Hatüome nang wongnangpu yengya yepu lak tüoh.’

¹²“Job, nang üyin jin kümpu me nyih üla ngaitüoh she ngaokhüm jepha ya ei? Yejema-a nyih ülate, aope ngailak ngaolan ya ei?

¹³Ngaipu nyih te kahtoknyu photüoh she, hüyange iman lowe ngohpu nyoijinglan mepu ümenglan te shuitam tüoh she ngao jepha ya ei?

¹⁴Nyemo nüppu kih-e, hüyange kümpkahtok te oleng nyanshangpu kih-e, nyihning wangngaiye kahjee phaotang yonge ngohne tamnang;

¹⁵Ümenglan jingne nyihning wangngai-a jamloi tee-nang, hüyange otapu yak-a phaknang.

¹⁶“Yengching yengpeiwo shelupupa te nang ngoitekü a? Yengching ümong taleng me nang kemtekü a?

¹⁷Yimching petenlan nangte hüotekü a? Yejema-a lipu petenlan yashüm ngetekü a?

¹⁸Kahtoknyuwa hangshin yonge khao nange shingya? Nange shinge ngohpu ne mengma-a üte jantehu?

¹⁹“Wangngai-a ümeken mepu pei nange shingya, yejema-a wangnyak-a ümeken mepu peipu?

²⁰Hangshin jaiye tailak yejema-a iman üne-o leih yene tamlak nange imante hüopu oklak a?

²¹Nange oklak she taowe teihnang, hangjingne ima-a nanga teshinpu wupa hüyange aope kahtoknyu linge ngai tüome nang ngoh yangki.

²²“Ümeken me taowe yi hüyange yilong ang, tüopa bungte nang peiye leimanpu?

²³Taowe tüolan-a shanghah shaoshi hipak hüyange shapju hüyange wehok nyihlan jingne tüm yange angnang.

²⁴Ümeken mepu wanghe ngai tüopa nyoite nang, yejema-a heongye wangyang ngaijing nyoite nang peiyang a?

²⁵“Wai shokke tamlak jingne yenglam aowe shao, hüyange wangkhong wangkhaklak lam aowe leipu?

²⁶Kahta yenyoipu wanwüng nyoi, kahta ao-o yengohpu kahtok me yeng phalak jingne,

²⁷hüng ngailak ne kahwan kahtok te aowe yeng shai tampu?

²⁸“Wai yejema-a nyimme Ipa ngoh nang kü a?

²⁹Aohe sea mepu yilong ngaipu? Aoheye wang me lümpem puhtampu?

³⁰Hangheye yeng-a longne menge tamnang hüyange yengching shetate yüoh nang!

³¹“Nange shanha üphüoh ja ne shatampu oklak a? Yejema-a Orion te shapu nange lantampu oklak a?

³²Nange shanhalan iman juwan peitampu woilak, yejema-a iman ühalan phei shapnyu woipu oklak a?

³³Wang me wanglam lamlak linglak ngaokhüm nange shing nangkü a? Hüyange nange tüolan-a kahtok me jonpu oklak a?

³⁴“Nange wangphomte ngaokhüm phalak jingne üngwünpu oklak a? Hüyange tüolan-e nang tangme wai yenglam lingtam lak?

³⁵Hüyange nange wanglüppu te wangyu tüoh she ngaopha ma-a, ‘Nange ipuke lingyangki,’ she nang tangte peiye ilak jeyapu?

³⁶Ümong yeme aoheye konjong hintampu? Yejema-a aoheye kenmong me shinge okpu phapu?

³⁷Wangphom iye oklak ne hüyange wai ne shokke ükao ja me yeilak ne aohe me konjong ngohpu?

³⁸Aope kahmak wan-e ngailakeih, hüyange kahtok ümüolan-a sham ne mengtamlak?

³⁹“Nange yengkong mailange hahlak jingne hahying tüoya? Hüyange yengkong mailang üha seanyaopu mepu moh,

⁴⁰aope iman longsa me lo, yejema-a iman püm nyoi me lamyange tan?

⁴¹Aope iman ühalan-e hahlak yam-e üte üngwün, aope iman seanyao teiye waakem, khawangte uhying tampuwa aoshi?