Read Konyak Naga JOB 39 Bible Online

JOB 39 - Konyak Naga bible

JOB 39

¹“Meiyahlan aope puh nange shingya? Tokke üha puhwante nange leiye ngohman?

²Üha pahyange leat hangshin laowe ngohnangpu shi shingya? Iman puhlak hipak nange shingya?

³Aope iman ümlak hüyange kahtoknyu te iman ühalan puh ngailak nange shingya?

⁴Phao üko me ühalan wongnange jongnang; iman yanne tainang, hüyange leih üye.

⁵“Phao gado-a aowe teine tam? Hüyange iman waalak jingne aowe lanne tampu?

⁶Taowe iman nok ne phao üko pha, hüyange hümnoong me iman nyoine tam.

⁷Langman-e jokpu chingnyu shong mepu iman üjai me angne tam, hüyange aowe-o iman tampu ye-oklak hüyange toi lingne yetam oklak.

⁸Phaotang lan-a iman hahnyoi, ümeken me iman tamnang, hüyange ümeken me iman-e phümyak lili hahlak jingne yamnang.

⁹“Mahu pongwa-e nang jingne toi lingpu oklak a? nang mahu khokme wangnyak me I pümhu külak a?

¹⁰Nange Ite wu shinyange kah hamne tampu oklak a? Yejema-a Ite nang kah kahpheaklak phei shu ne tamlak a?

¹¹I wong yongtepuwe hüyange nang toi üyonglan-a Iye lingkülak she monghüm lak a?

¹²Nang tah yahyange hüyange nenok tahnoijing me tahlicka jemtam külak she Ite nange monghüm pu a?

¹³“Yengwüm awnyu üyanga hangshin wanne punang shi! Hüpoi yengwüm awnyulan lümlei aw shinne yepu ok.

¹⁴Yengwüm awnyulan-e ükek-a kekyange üshem ponglak jingne kahtok me tüoh nang.

¹⁵Hüyange hatüowa yawe lokke paikülak she hüyange phao yinmoklan-e yawe lokyange paikülak nyam-e yeteih.

¹⁶Yhawe awkeklan-a yha jing üjepu kih jonnang, hüyange yha shange pongyangpuwa jajang japu ne menglak she yeteih tüo.

¹⁷Hangjingne yha ngawoone tampuwa hüyange yhate konjong yepha tampuwa Kahwang ngohnang.

¹⁸Hüpoi aope yha phetne üyangsaa wanglakei, yhawe koipong hüyange tüome ongyange phetpalante nyitam nang.

¹⁹“Koiponglan-a aowe wongnang ne tampu, hüyange iman üngtokmin ngaine tampu, tüowa nang a?

²⁰Nange iman dukh kih-e phaone tam a? Hüyange iman waopu te kahta nyamne tam a?

²¹Iman-e kahjee me kahtokte ya mee tüoh nang; Shapjute iman wong kümme lüknang.

²²Iman-e nyampu jeng yeshing, hüyange hanghe yanglowe-o iman leih yene yetam ok.

²³Iman tok me ongpupa yonglah wanghete lüppe hüonang.

²⁴Jamloi mongpopu kaiye ninne, koiponglan-a sheshao yete phet nang. Aope nyawong wüngyapeih, iman yonge ngohpu ye ok.

²⁵Nyawong wüngpu lep iye iman ‘Aha!’ she waonang, iman owe peishao memuh iman-e shapjuwa shinge oknang, hüyange ükhong woipawe üngwünpuwa iman-e jainang.

²⁶“Aope Iye heyekao te üyang saayapeih, lanshaowe hangke pulak nang mepu shinge yah a?

²⁷Kahmüoh ütangpa me yoi ülüp linglak jingne yingphang awlan-e nang mepu ngao yah ne tanlak a?

²⁸Longwak me I ngohnang hüyange wakkhüw shedaopupa me hüyange kahmüoh ütangpa me I ngohjing lingnang.

²⁹Tüome ngohyange ü-o me hüyange üjaite ülam ja toilak hüyange hahlak jingne yomme leinang.

³⁰Lipu mang neikonne yingphang awlan jemnang hüyange yingphang awlan ühalan-e iy hüpnang.”