Read Konyak Naga JOB 40 Bible Online

JOB 40 - Konyak Naga bible

JOB 40

¹Hüyange Youngwanpawe Jobte i:

²“Aoheye shapnyik nang Iye ütahpa phei tokteipu oklak a? Aoheye Kahwang phei toktei-e ngaonang, Iye tüopa jantüoh.”

³Hüwante Job-e Youngwanpate jan:

⁴“Leihuyah, tao wangpu hango yenang; taowe nangte hanghe janlak? Taowe ü-yak ü-ju me yimnang.

⁵Taowe ja me ngaoteki, hüyange taowe yejanlak; ni me, hüpoi üne-o yengaolak.”

⁶Hüwante yüpnyeih kaiye Youngwanpawe Job te üne-o ngao.

⁷“Kahta kih-e nye inyange yongtüoh; Taowe nangte tonglak, hüyange nange üte janlak.

⁸Taowa yeshupu ne muh nange anglak a? Nang tingpu ne lingtamwante nange tao yeitamlak?

⁹Kahwang yak shin-e nang me wongnang nangkü a? I me ngaipu shin-e nange wangkhongpu wüng ngaipu oklak a?

¹⁰“Oklakne mengma-a, nang yihnoonpu phei yongtüoh hüyange yongelüotehu; nang nying nyingke ütahpa me hüyange müktishiwapu phei tümtehu.

¹¹Aoyin ota-nang imante leitehu! Nang mongshih ngaipu iman tangme shokke tamtehu hüyange iman innenyaine tamtüoh.

¹²Üting, imante shüoh leihtüoh hüyange iman yeitam tüoh; ümenglan iman ümeken me ngoh yeitamtüoh.

¹³Iman khongküm kahmong me mutamtüoh; yimching me iman shaatam tüoh.

¹⁴Hüma-a nangte minyong phapu üwangpa ne tao menglak, hüke nang yoi yakjah ye-e nang yintampu oklak.

¹⁵“Khongkhai (Behemoth) te leitüoh; Taowe I linge ngaipu kih Taowe nang linge ngai. Iye mahuwe hahpukih hüng hahnang.

¹⁶I wonga shiengme ngohnang hüyange I üngan-a I seanyu ühak me ngohnang.

¹⁷I jing ünyei-a cedar kih-e ponang, hüyange Ijing yungkeng ühaklan me wong ngohnang.

¹⁸I mepu üwaanlan-a shakphan yan shinne wong nang, hüyange I ya-a wenao yan kih-e ngohnang.

¹⁹“Hatüowa Kahwange lingngaipu üwangpa toishao. I lingngaipuwe hei yoi yanglow phei I shongte ngoipu oklak.

²⁰Ümeken me phao yinmok wonnang tüoken kahtang me Ite uhlak jingne hüng jongtam nang.

²¹I-a ühuh pheipu pee yo me lam nang, hüyange shamnoong lotus yo me lo nang.

²²Ühuh pheipu pee hüyange yengnah peshüm phang lan-e Ite lojing phanang.

²³Yengyin phaowe phetpute I yenyam; aope Jordan yenge I shetate shunge yongyapeih I jünge ngohnang.

²⁴Aowe I mük pomne tamyange phopu oklak? Yejema-a aowe I nateang tünkam me phopu oklak?