Read Konyak Naga JOB 41 Bible Online

JOB 41 - Konyak Naga bible

JOB 41

¹“Nange nyah shohlak yankeih phei yengching yinmok shohpu oklak a? Yejema-a I yee wu phei shinpu oklak a?

²I jing nateang me nange wu shinpu oklak a? Yejema-a I tahwan me yankeih shinpu oklak?

³I taine tampha she Iye nangte tonglak a? Ite shüpshe pha she nangte yoppe tonglak a?

⁴Iye nangphei jiengjeppu ja yahlak hüyange jinjinte nang shaoshanlak jingne janlak a?

⁵Nange Ite awha üjoilante shinpu kih-e, nang shaoshannyu naoyhalan-e nonenglak jingne shinpu oklak a?

⁶Pheeileihpalan-e I jingne pheei shüngpu oklak a? Pheeinyu leihpalan-e yüolak jingne I tehlak a?

⁷Nange I üshote nyah-ngou phei lütpu oklak a? Yejema-a nyahlütlak ngouwe I shangte lütpu oklak a?

⁸Nange Ite ja me lettüoh hüyange nange aope-o nishe yenganglak; Ja me hokyangpu nange aope-o yepelak!

⁹Aohi pawe yengching yinmok ngeyapeih mong shoinang hüyange kahtokte toita nang.

¹⁰Aope I lüoyapeih, aowe-o jonpu ye-ok; hüma-a I sheshao me ao mongyonge yong oklak?

¹¹Aowe Ite lük oklak hüyange yinne ngohpu oklak? Wangphang me ngohpu shemin lamphe-a Üjing.

¹²“Taowe nangte yengching yinmok jing ya jeng ipha ning, hüyange I-a hangshin yong hangshin wongnang iphaning.

¹³Aowe-o I mepu ütokpa ü-leng khokyahpu ye-ok, yejema-a Iye yahpu oleng lüowe lütpu ye-oklak.

¹⁴Nyamlakpa fa khüng lengyangpu I tahwan aowe katampu oklak?

¹⁵I jing üngtokme-a khüng lenge ree lingyange, tüolan-a üjep ja ne shayange long phei shewan she ngohnang.

¹⁶Ü-eam pa me wangyang nehoi ye-onglak ne, japawe japa tangme jeat-sünge shayange ngoh nang.

¹⁷Hanghe-o iman khüoh-e yeyah oklak ne, iman khongküm jamloi monge jepyange ngoh nang.

¹⁸Aope I hahshuilakei vünloong ngai nang, hüyange I mük-a wanghe ongpu kih ngainang.

¹⁹I ju mepu vün ngainang, hüyange vünyi lüowe ngainang.

²⁰Tük janyange hüng moiye jaktüoh me ngaipu kih-e I jing nateang mepu vünkhuh yünne ngai nang.

²¹Iye lüohe wante vün pahne wangnang; hüyange I ju mepu vünloong ngaitam nang.

²²I üngme jamloi wongnang tüokaiye I phei hüopu khongkümpu nyam-e ninnang.

²³I üsho me wong yenangpuken ümeken me-o yenang; hatüowa yeonge wan hüyange yan shinne wan.

²⁴I longkih-e wanpu mongjanga aope-o yenyam, aope-o yekhoop hüyange shamshu long shinne wan.

²⁵Aope I lüolakei, wong shenangpalan nehoi nyamnang. Iman nyampuwe ümekente ütai okpe pongnang.

²⁶Ite mütte oklak yanglow yenang; ngoulow, lah han, yejema-a jupyang phei yan hanghe-o Ite maa phane ye-ok;

²⁷I jingne yan-a oloh-e phünlak tahjan kih-e, hüyange shakphan yan-a nya maktephei pee phei shekhai.

²⁸Ite jange toi oklak lahhan yenang; longnyu üyonglan, Ite sheappe tampuwa tahjan ne heappu kih-e.

²⁹Peeishüm-e Ite heappuwa tahjan-e heappu kih-e, hüyange aope kahtawe Ite ngouwe lütlakei I nyinang.

³⁰I seanyu mepu üla-a paiye phongpu tükmei khüo kih-e ünah phei; tüolan-e tahnoijing kih-e ümee shaha phei, kahtok-a shamnoong ne lingetam.

³¹Yengchinga lye tükja kih-e hokke ngaitam nang; hüyange yengchinga minnga tük ja ne linge tamnang.

³²Iye I tokphei me phihlangpu lamnyu tüoh nang, hüyange yengchinga he-engpu mopphop ne linge tamnang.

³³Hatüo kahtoknyu me I phei phinne leilak hango yenang; I-a nyampu yenangpu yinmok ja.

³⁴O-shetapupa yinmok te-o Iye hangko yeteihpe leinang; I-a phao yinmok üshei tangme ahngpa.”