Read Konyak Naga JOB 42 Bible Online

JOB 42 - Konyak Naga bible

JOB 42

¹Hüwante Youngwanpate Job-e jan:

²“Youngwanpa, nanga üshei phei wong nangpupa, nange hanghe teih khongkümpu nange linge oklak she taowe shingnang.

³‘Konjong yenangpu ngaowe Kahwange mongpu büange angpu hatüo ao shi?’ Tüokhei taowe yeshingpe ngao yangki hüyange taowe yeshingpe yashanyalipu jeng ngaoyangki.

⁴‘Nange aope ngaoyapeih nang ngao jailak jingne üte i, hüyange nange tongpute janlak jingne nganglak i.’

⁵Hüwante ülaolan-e üte hanghe ngaowe tam tüo hei taowe jai, hüpoi sha-a taowe ü-mük-e nang ngeteki.

⁶Tüokhei taowe ngaowe tamyangpu khongkümpu jingne tao wüonangki hüyange kahmak hei tüpla yo me tao monglüp nang.”

⁷Youngwanpawe Job te ngaowe shoyang phei me, Iye Eliphaz te ngaowe i, “Nang phei hüyange nang shümpa ni phei tao mongshih ngainang; hangjingne ü-shaoshanpa Job-e ngaopu kih-e numan-e ü-jeng ütingpa yengao.

⁸Tüokhei sha-a, mahu üpong nyit hüyange younpong nyit yahyange ü-shaoshanpa Job tangte peitüoh, hüyange numan jingne jakke dopu dotüoh, hüyange ü-shaoshanpa Job-e numan jingne yopne tamtüoh; hangjingne Taowe numan phei shüpshe yenangpe yejonlakne Taowe Iye yoppu yahlak; hangjingne ü-shaoshanpa Job kih-e, Ü-jeng hanghe ütingpa hatüo numan-e yengao.”

⁹Tüokhei Eliphaz, Bildad, hüyange Zopharlan-e Youngwanpawe hanghe linglak jingne ngaowe tam hüke ling, hüyange Youngwanpawe Job-e yoppute jan.

¹⁰Tüophei me, Job-e I shümpalan lüm jingne yopyang phei me, Youngwanpawe nishe Ite moiman jaaluntam, hüyange üshongwante ngohpu phei üphong ni nyeiye pha.

¹¹Job jeiheinaolan hüyange nya-naolan khongküm hüyange shümpa ülanglan Iphei hüone pei hüyange Inok me Iphei mo-hah. Youngwanpawe I tangme pei tampu shanghah shaoshi khongkümpu jingne Ite iman-e toloimeitampu ngao iye hüyange iman-e shüpsheye teihpu ngaowe tam. Iman moilan-e Ite ngin üjinghapong hüyange hon shüptet japong pha.

¹²Hüyange Youngwanpawe Job üyin üwangpa phei-a phei mepupa ünyei moimantam. Hüyange hüke nyee haja pen me peli, udh haja wok, kahhampu mahu üpong nipet haja ja, hüyange gado haja ja she I jingne ngoh.

¹³I-a naoshe nyit hüyange naoyha lüm üpa ne meng.

¹⁴Iye nya-yongnyute Jemimah, nishepupa te Keziab, hüyange lüm shepupa ükümnyute Keren Happuch she nyik .

¹⁵Hüyange Job yhalalan kih-e shemei yaomapu sheko kahtoknyu me ao-o yenangpe ngoh; hüyange iman üpawe Ijeilante phapu phei jam-e imante-o mothlei pha.

¹⁶Tüophei me, Job wangpeng ghoja phei me deli ngoh; huyim hüyange hushomyin ngepu okke jin peli shepupa ngepu okke jinlao.

¹⁷Hüyange I yeonge wuwe kokteiye li.