Read Konyak Naga JOB 5 Bible Online

JOB 5 - Konyak Naga bible

JOB 5

¹“Sha-a nyiktehu; nangte janlak jingne ütam ja nehoi ngoh nangkü a? Nang peiye oklak ne shejaopupa ütam ngohnang a?

²Mongshange khah teihpuwe toitam nang, hüyange aohüng müktakpuwe kahta ümei meng tam nang.

³Ü-ngapalan okke shangnangpu kih taowe nge, hüpoi Inokte taowe mokhshe phoiwümme tam.

⁴Iman hayimlan-a yinlak mepu yeonge jai-e, iman-a peten pongme sheptai, hüyange iman yintamlak ne ao-o yenang.

⁵Seanyaopu kahtalan-e tahlick üjepu huh pheipu hüngyo me ngaipu ülick nehoi hahküm nang; hüyange yengle palan-e yoijing yengnung jüppe tamnang.

⁶Hangjingne ümengpa-a kahtok mepu lüowe ye-ong, yejema-a shaoshipupa kahtok mepu phaowe yengai.

⁷Hüpoi, vünlah wangte puwe taipuke, kahtawe yoi nying nyingke shaoshi-a yah peinang.

⁸“Hüpoi tao nangne mengshih ma-a, tao Kahwang tangte leih yehah peih hüyange Ite ü-jeng ihahpeih.

⁹Iye lingpu toinyulan teman-e yeshing küm ok, hüyange Iye lingpu yashan yali toi me üküm yenang.

¹⁰Iye kahtokte wai shonnang, hüyange Iye kahte yeng shoktam nang.

¹¹Aoyin innyainang iman Iye no innang, hüyange aoyin mang shapnang khongkümpute mongmei pha nang.

¹²Hahshukke teih-e toi lingpalan, Iye nyongküleih lingtam nang, tüome iman yak-e hango okpu ye-ngelak.

¹³Deitahpalan yaktoi Iye phonang, hüyange hahnyakpalan shaotan toi-a, mamshe üküm ngoi ne tamnang.

¹⁴Iman-e nyih ning me wangnyak hüo nang, hüyange wangnyak kih-e nyih ning me yalokke tamnang.

¹⁵Hüpoi Iye toihalan yanglow mepu yintam nang; shaoshipalan Iye wongnangpalan yak mepu yintam nang.

¹⁶Tüokhei toihalan-e monghüm tüonang, hüyange ngaoting yenangpa ju küptamnang.

¹⁷“Leihuyah, Ütahpa Kahwange ao te teetam nang I mong meilakpa! Aope Iye shangne tamlakei ye-i-yeshepe tahling.

¹⁸Hangjingne Iye mayah tam, hüpoi Iye muh shatam nang; Iye shet, hüyange I yakke muh nang meitam nang.

¹⁹Wengtuh pongpu mepu wok me Iye nang yintamlak, nyit shepupa me ünuwe nang yengoilak.

²⁰Aope seanyao yengle peilakeih, Iye nang üyin tükke anglak; hüyange wehok me nang yanglow mepu yinlak.

²¹Nangte yemeipe ngaopa mepu Iye yinlak; aope mahlakpa peilakeih Iye nang yinlak.

²²Toilangpu hüyange nyaowelepu te nange nyilak, hüyange kahtok mepu phao yinmokte ye-nyamlak.

²³Nange hampu kah me long hüowe nang yeshanglak, hüyange phao yinmoklan nang phei chingmei ngohlak.

²⁴Nang nyenok me nang chingmei me nyoilak; nange nang nyeelan te leilak, hango mahshümpu yengelak.

²⁵Nang huhayimlan-a üngang ngohlak, nange shinglak; hüyange nang huhayimlan-a kahtok me ngaipu hüng kih-e ngohlak.

²⁶Tahlick yimme wanteiye tahnoilak nyoi me peipuke, nang wupa ne menge jinlaowe ngohyange yimphang yulak.

²⁷Leihuyah, toman-e hatüowa hipak laowe teihyang phei me nakshih shingyangki; Hatüowa üting; tüokhei sha-a, nange hatüo yahtüoh.”