Read Konyak Naga JOB 6 Bible Online

JOB 6 - Konyak Naga bible

JOB 6

¹Hüwante Job-e jan:

²“O Tao shanghah shaoshipu hüyange mongshang mongmengpulan toklak me tok shima-a,

³tüolan-a yengching pheih phei nehoi sheyih hah shepu, tüokaiye taowe shushupuke ngaoyangpuwe numan yashanne tahtam.

⁴Ütahpa Kahwang lahhan üme lütyange ngoh nang, hüyange tüolan mepu soihüng ü-püm tangta nopu me yanne ngohnang. Kahwang mepu nyamlaklan ü-phei tüi-e yongyange ngohnang.

⁵Phao gado hüng hahwante wao nangkü a? Yejema-a mahupongwe heei hahwante wao lak a?

⁶Hüpoi hüm yelangpu, yewüng yelaopu hahying aowe hahlak? Awkek ümong ühengpa me hanghe meipu ngohlak?

⁷Hükihpu hahyinglan ü-jute yemei, hüyange taowe hahpu shemin lampheye dak ne hei meng nang.

⁸“Oh hangne taowe tongpu Kahwange yephapu? Hangne Iye taowe yoppu te yejanpu?

⁹Kahwange tao mahne tamhupu ngohlak, I yak ngaaine tam-e tao lange winlak.

¹⁰Iye lingkülak she taowe shingshih ma-a, üte dakpu jaja shinne yongyapoi, tao mongmei hahpei. Kahwang-a üjaopa she taowe shingnang; Iye pha-e tampute taowe aope-o la-kungpu yenang.

¹¹Tao tanne ngoh oklak ne ü-wong ümeken me ngohnang shi? Aope üme monghümlakpa hango yenangpute hangne nyoimuh ngohlak?

¹²Ü-wonga long me ngohpu wong a? Ü-püm-a shakphan yan a?

¹³Tao ü-nying nyingke yinne oklak ne wong towe yenang; üte jampha she ilak jingne tailak ümeken me-o yenang.

¹⁴“Kahwangpa winne tüohyah yetüohyah- hükihpu shanghah shaoshi hipak me mongken shümpa wongpongne mengnang.

¹⁵Hüpoi ü-shümpalan, aope wai yekeilakei eamahpu yengyin kih-e, numan-e üte lolam nang.

¹⁶Aope yilong me nyakpu ngai hüyange yiyeng ne phonge ngai nang,

¹⁷hüpoi üshem me tüolan yenangpe mah, hüyange yengyin-a hango yenangpe eamahteiye ngoh nang.

¹⁸Yeng yampuwe pheeinyu leihpalan mahnang; iman waa-nang hüyange phaonyu jongme li nang.

¹⁹Tema pheeinyuleih-palan-e yeng jingne lei, Sheba yinkempalan-e monghüm-e yam;

²⁰iman mongmeng ngai hangjingne iman-e monghüm-e teih; iman tüokente ngoipu-a mongmeng ne meng.

²¹Numan-a tüolan yengyinlan kih üte nangki, numan-e ü-yatuhshao nge hüyange numan nyamnang.

²²‘Üte ülam ja yahkei’, yejema-a, ‘Numan moth mepu üjingne hünghao yahkei’ she taowe numante i a?

²³Yejema-a, ‘Wepa yak mepu’ hüyange ‘Shange tampalan mepu tao yinpha’ she i a?”

²⁴“Üte nyüopha, taowe püohpu ipha, taowe numan ngao jaiye jünge ngohlak.

²⁵Wangshüm pheipu ngaowe monghüm tamnang, hüpoi numan-e wongpong yenangpu ngao ngaonang.

²⁶Hango yenangpu wangyang phei taowe ngao nang she numan-e teih nangkü a? Hüma-a hangne numan-e shange pongpu ü-ngaote tien tampu?

²⁷Numan-e khahhalan jingne nehoi phongyenglak, hüyange numan mongjümlan mepu küowe haklak!

²⁸“Hüpoi sha-a ü-sheta te leiyah, numan sheshao me taowe ngaoleih ye-ilak.

²⁹Loishe ngaowe taiteki, lak tüoh. Üte ümeng tahpha. Tao shuwe ngoh nang.

³⁰Taowe ngaoleih inang she numan-e teihnang kü a? Taowe-a ümeng ümei ye-i-oklak she numan-e teihya pu a?