Read Konyak Naga JOB 7 Bible Online

JOB 7 - Konyak Naga bible

JOB 7

¹“Kahtanyuha üyin-a kange shaoshan tampu üyin lenang, shange nan-e toi lingne tampu üyin yeje a?

²Rha lan-e wangshümte loihuwe waopu kih; nanpawe yoi nanmee tanpuke ngoh nang.

³Tüokhei lekeng ja phei me ja she tao ükeng me angtam nang, wangnyak ja phei me ja she üte mongshang pei tamnang.

⁴Aope tao shilak jingne lam, ‘Tao aope lüolak?’ she taowe inang. Hüpoi wangnyak laonang, hüyange wangngai shao me tao shin lüpkhan lüpnang.

⁵Ü-püm-a, yonge hüyange makke maawe lümyange ngohnang; ü-maa mepu ütu yünkhan yün nang.

⁶Ü-hipaka veelüp-han phei shemam she tainang, hüyange monghümlak ne yenangpe üküm ngoinang.

⁷“O Kahwang, teihtüoyah, ü-üyin-a lüohe ja hei ngohnang: ü-mongmeipu shaaji nishe yengelak.

⁸Sha-a tao ngepu mük-e, shaaji tao ye-nge phalak; Nange tao yam-e leiwante, taowa yenangpe ngohkülak.

⁹Wangphom teeshai yange hüyange tai mahpuke, kahta ja mangkoksate ongpu-a aope-o leih yeyelak;

¹⁰I yoi nokte shaaji leih üye, aoyinne I shinge ngoh khongkümpuwe I pemah nang.

¹¹“Tüokhei, taowe ü-ju ye-eppe yengohlak, ü-yaha mongshangpu phei taowe ngaolak; Taowe ü-üyin yaha me khah-e teih-e ngaolak.

¹²Taowa yengching she, yejema-a shelupu me ngohpu khongkhai she, hüke numan-e tao yomyange ang?

¹³Aope taowe, ‘Ü-shinlenge üte toloimei tamphalak’ she teih, hüyange, ‘Üte jeihdakpu mepu meiyashi’ she teih,

¹⁴tüoyangpoi, nange shinmang me hüyange himang me üte nyamshaowe tamnang.

¹⁵Tüokhei hatüo shanghah shaoshi püm üyin me ngohleima-a, shanglak hüyange lilakpa taowe mongnang.

¹⁶Tao üyin me ngohpu eangteki, shaaji taowe tüohpu weih. Ü-shaha tüohpha; tao üyin me ngohpu me hang toi-o yengailak.

¹⁷Nangte kahta-a hangne teshin-e wongpongne mengpu? Iye hanghe lingpute teshin-e mongpha pu?

¹⁸Nange napjeih she Ite leiye peinang, hüyange minute phe me Ite tok nang.

¹⁹Hangshinne nang ü-yekaote sheta yelüplak, yejema-a taowe iyphao yelüngpu yetan oklak?

²⁰Ü-ünuwe nangte pokke peipu a? Nang kahta yompa! Nange teihpu toi linge nyüolak jingne hangne tao jonpu? Nangte hangki yih ne menglakne tao teshin-e yongpu a?

²¹Taowe ngaokhüm mengpu ünu hangne yewinpu? Ü-ünu hangne yah yetei? Mamshe taowa kahtok me ngohlak, hüyange aope nange tao yamlakei, tao yenangpe ngohlak.”