Read Konyak Naga JOB 9 Bible Online

JOB 9 - Konyak Naga bible

JOB 9

¹Hüwante Job-e jan-e i:

²Üting, hatüo khongküm taowe üshong me jaiyangki. Hüpoi kahta jawe hangke iye Kahwang phei Iye mongpuwe okpu ngelak?

³Shejawe I phei toktei huyapoi, Iye haja ngoiye tongpute shejawe ja me nehoi janpu ye-oklak.

⁴Kahwang-a jamloi kentamong tingpu phei hüyange wongnangpu pa; I te tien-e kahta ao yongpu oklak?

⁵Iye kahtanglante powe tamnang, hüyange mongshih ngaiye Iye tüolan khüw tamnang.

⁶Iye kahtokte shuitamnang hüyange kahtokte shengpu shongnyulante Iye shuitam nang.

⁷Iye wanghe te ngaonang hüyange tüowe ütee yepha ok, hüyange wangnyak me teepu shanhalan büangnang.

⁸I shahawe wangdanglan lantam, hüyange yengching yayungpute yashop-e tam;

⁹Iye shapnyu hei Orion hüyange shanha üphüoh hei heyekao mepu shanhalan linge ngai.

¹⁰Iye lingpu toinyulan jeng yeshingküm ok, hüyange I mepu yashanyali üküm yenang.

¹¹Leihuyah, Iya ü-phin me kemyong nang, hüyange taowe I ye nge; I linglei nang, hüpoi taowe I shinge ye-ok.

¹²Iye nyie yahtei nang; aoheye Ite tienpu oklak? Nange hang lingnangki she, aowe Ite ipu oklak?

¹³“Kahwange I mongmengpu-a yetüklak; Rahab te jampongpulan I phang te süngtai.

¹⁴Hangke taowe I phei teilapu oklak? Taowe hangke iye I phei tei ngao ne ngaowa tüolak?”

¹⁵Tao noknga ne ngoh yahpeyoi, taowe Ite yejan ok; shaaji ü-Kahwang te hei taowe yoppe tonglak.

¹⁶Taowe Ite nyikpute Iye janyapeyoi, Iye üte jaikülak she taowe ütinglak-e yeteih.

¹⁷Iye waishih wangkhah-e üte mayah tamkülak, hüyange hangne-o üjepute ü-maa jaatam lak.

¹⁸Iye tao lüohe ne yetam, hüpoi ükhah-e tao maatam nang.

¹⁹Wong tokteilak ima-a, I-a wong shenangpupa! Hüyange hatüowa ngaotingpa jeng ima-a, aowe Ite peikei she nyikpu oklak?

²⁰Tao noknga ne ngohyapoi, ü-juwe tao yeitam phalak; tao ümeng yenangpe ngohyapoi, taowa ümengmuh üja she hüolak.

²¹Tao ümeng yenangpe ngohnang, hüpoi taowe shaaji ü-üyin jingne hangko yeteih.

²²Tüolan khongkümpu-a ja; tüokhei taowe inang, Iye ümeng yenangpalan hei ümeng moi ni meng win nang.

²³Aope ümeng yenangpu kahta ja mokhshe lilakei, noknga yatuhshaote Iye nyitam nang.

²⁴Kahtoknyuwa ümenglan yak te pha. Iye kahpalan mükpomme tam. Hüyange hatüo Kahwange yelingma-a aowe ling?

²⁵“Ü-nyihlan-a phetpalan phei nehoi shephet; meipu hango ye-ngepe linne tai.

²⁶Ü üyin-a shephet pupa lisheng kih-e linne tainang, yinha jingne awlan shokpu phei shephet.

²⁷‘Taowe üte dakpu yeteih tüope mongmeiye hüoning’ she ima-a, taowe ü-shaoshipu khongkümpu leih yekülakte nyam nang;

²⁸Ü-shaoshipu khongkümpute tao nyampa ne meng, hangjingne tao noknga she nange yeteihkülak taowe shing.

²⁹Shaaji taowa püohpu she ngetepheite hangne tao angsa te shaoshilak?

³⁰Tao ü-nying nyingke makjao phei poiyapoi, hüyange makjao ütah phei ü-yak tuh jaoyapoi,

³¹tüoyangpoi nange taowa shamkokte shüppe tam, hüyange ü-nyemowe nehoi üte nu.

³²Hangjingne I-a, ü-kihpu hüyange taowe Ite janyelak toman jam-e ngaophün jingte peilak kahta ja ne yejepu.

³³Tomni moinite yak yuwe oklak ne tomnipa me pongyan tampa ao-o yenang.

³⁴Üte shaoshi phapu shengshaoh yahtei shih ma-a, hüyange shangne tampu yah teishih ma-a,

³⁵hüma-a Ite yenyampe taowe ngaolak hangjingne taowe ü-mongjang shingnang, tüokhei taowe ngaolak.