Read Konyak Naga TÜOWELAIHEM 10 Bible Online

TÜOWELAIHEM 10 - Konyak Naga bible

TÜOWELAIHEM 10

¹Hangne nang teshinne jaiye taipu, O Youngwanpa? Aope toman wengtuh me ngoh hangne nanga nang nying nyingke lopu?

²Ümenglan-a ota-nang hüyange toihalante shaoshi phanang; iman-e lingpu tün me iman pho ne tamtüoh.

³Ümeng kahta-a yoi ünu yah-hupu lahnyikpu me ota-nang; ünyei yah-hupu kahtawe Youngwanpa yeyah hüyange phoinang.

⁴Ümeng kahtawe Youngwanpa jingne hangko yeteih; I otamaohepu me Kahwang-a hangne-o üjeja she Iye teihnang.

⁵Ümeng kahta jawe lamphe li me okpu ngenang. Kahwange ngaophünpu Iye yeshing ok; Iye I wepalante yaolene tamnang.

⁶Iye yoi nying nyingke inang, “Tao aope-o ye-okpuwa ye-ngelak; tao aope-o shaoshipu yengohlak.”

⁷I ngao me phoiwümpu, ngaoleih, hüyange yemeipe linglak maawe ngoh nang; müktakpu ngao, ngaomeng ngaolak I yee mamnang.

⁸Ümeng yenangpu kahta toilak jingne tanne, I nying nyingke chingshao me lo nang. Wong yenangpe mokh ye-okpalante Iye kuhshük nang.

⁹I lopu nyoi me yengkong mailang kih-e Iye tannang. Toihalan jingne I lamyange tannang; Iye tümpu tünme Iye iman pho nang hüyange iman yahtai nang.

¹⁰Wong yenangpalan ümengpa me hünge tamnang, hüyange I wong üyong phangte ongnang.

¹¹Ümeng kahtawe I nying nyingke inang, “Kahwange hangko yeteih ja! Iye yoi mük ngoihtepu, hüyange tao aope-o ye-ngekülak!”

¹²O Youngwanpa, tüolan ümeng kahtalante, O Kahwang shaoshi phatüoh! Aoyin shaoshi nang tüolan teihtüo pha!

¹³Hangkejam ümeng kahtawe Kahwangte phoilak, hüyange “Iye üte shaoshi yepha külak,” she I nying nyingke ipu oklak?

¹⁴Hüpoi nange-o ngenang; shangepongpu hei shanghah shaoshipu nange shingnang hüyange jinte jamlak jingne tümyange ngohnang. Wong yenangpu kahtawe nangte I yah peinang; toinanpalante nange jinte jamnang.

¹⁵Ümeng hüyange ünu kahtalan wong paitam tüoh; iman-e shaaji yelingpe manlak manlak iman-e lingyangpu ümengpa jingne imante shaoshi phatüoh.

¹⁶Youngwanpa-a jin jintepu ahngpa ngohnang. Aoyinne ülao kahwanglante yoppe khümnang, iman kahtok mepu mahlak.

¹⁷O Youngwanpa, innenyaipalan-e yoppu nange jainang; nange imante mongyonglakpa phalak.

¹⁸Shaoshi phang me pongpalan hüyange khah-halan üngwünpu nange jainang; imante meiye nange ngao phünlak, hümme nakshih kahtalan-e shaaji yemeipu yelinglak.