Read Konyak Naga TÜOWELAIHEM 102 Bible Online

TÜOWELAIHEM 102 - Konyak Naga bible

TÜOWELAIHEM 102

¹Taowe yoppu jaiyah, O Youngwanpa; hüyange jamlak jingne taowe üngwünpu jaipha!

²Aope tao shangpu phei ngoh, ü-mepu nang lüppe tahtai! Üte jaiyah, hüyange aope taowe nyikyapeih üte mamshe janpha!

³Hangjingne ü-üyin-a vünkhuh kih-e ye-ngepe mah tainang; ü-püm-a vünne shupu kih-e hah shunang.

⁴Wantepu hüngte shütpu kih-e üte shütte taiyange ngoh nang; tao hahhu-yinghupu hango yenangpe taiteki.

⁵Tao üngwünne shapyoongpu jingne üme üwaan hei üsho tokte kaiye hango yenang.

⁶Taowa wanwüng jeng mepu phao awha kih-e ngohnang; hango yenangpu ken mepu awsuklongkhüm kih-e tao ngohnang.

⁷Tao yeshi okpe pha yangnang, taowa noktok me I shaha ngohpu awha kih-e ngohnang.

⁸Nyihlao hipak ü-wepalan-e üte yaolenang aoyinne üte nyitam nang iman-e phoiwümme ü-min jonnang.

⁹Hangjingne ankih-e taowe vünla hah; hüyange taowe yingpu me mükphi nyütyange,

¹⁰hangjingne nang mongshih ngaiye shihkhahpu jingne, nange tao nowe in hüyange tao shüppe winne tam.

¹¹Ü-hipaka ünpong yashüm kih-e; taowa litepu hüng kih-e kuimah teki.

¹²Hüpoi nanga, O Youngwanpa, jintepu ahngpa: jongpu jin liliye nang teih tüolak.

¹³Nang yayonglak hüyange Zion jingne shüpshelak; yhate shüpsheye teihlak hipak peiteki; hipak ümei sha-a peinang.

¹⁴Hangjingne nang shaoshanpawe longyinte kennang, hüyange kahmakte yayenge teihnang.

¹⁵Jatlan-e Youngwanpate nyamlak; kahtoknyu ahngpalan khongkümpu I wongte nyamlak.

¹⁶Hangjingne Youngwanpawe Zion linge yelak, yoi kheyongpu Iye ütahte ngaitamlak.

¹⁷Iye yoi-e winne tampu kahtalante mong phalak, hüyange iman-e yoppute jailak.

¹⁸Youngwanpawe hanghe lingyangki ngoikülak jin jingne nyanne angtüoh, hümme nakshih manpuhpu kahtalan-e Ite yihlupu phalak.

¹⁹Youngwanpawe ütangpa yoi üjao nyoi mepu leiye tainang, Iye wangdang mepu kahtoknyute leiye tainang.

²⁰Phowe ngohpalan wao-eapu Iye jai hüyange aoyin shaaji litamlakne yeitamyange ngoh tüolan lantam.

²¹Tüojingne I minna Zion me pongtamlak, hüyange Jerusalem me Ite yihlupu phalak;

²²aope jatlan hüyange ahngchinglan jamshe jemme peilakeih, Youngwanpate khümlak.

²³Tao üne-o shela ne ngohwante Youngwanpawe tao khaine tamnang; Iye ü-üyin jin shohne tamnang.

²⁴“O ü-Kahwang, tao wupa ne menge manjongpute sha-a tao yah tahtei. O Youngwanpa, nanga jin üshei me üyin ngohnang;”

²⁵Hipak nangjange linteki nange kahtoknyu lingengai, hüyange nang yoi yakke nange wangdanglan ling.

²⁶Iman ye-ngepe mahlak, hüpoi nanga hüke ngohlak; iman khongkümpu nyemo inpu kih-e yah inne kümlak; Nyemo jeileipu kih-e nange iman jeileilak, hüyange iman mahtailak.

²⁷Hüpoi nanga jinte ja kih-e hüyange, nang üyin-a aope-o üküm yenanglak.

²⁸Nang shaoshanpa hayimlan ütuh yenangpe nyoilak, hüyange nang wangshüm phangme iman huhayimlan yinne ngohlak.