Read Konyak Naga TÜOWELAIHEM 103 Bible Online

TÜOWELAIHEM 103 - Konyak Naga bible

TÜOWELAIHEM 103

¹Youngwanpa yihlutüoh, ü-yaha! Üme ngohpulan üsheiye, I üjaopa min yihlutüoh!

²Youngwanpa yihlutüoh, ü-yaha, hüyange Iye hangshin ken tahpe.

³Aoheye nang ünu khongkümpu wintam nang hüyange nang daktin khongküm meitam nang.

⁴Aoheye nang mangjong mepu yintamnang hüyange nangte shüpshe hüyange kenpu phei moiman nang.

⁵Aoheye nang üyin-a ümeiye maatam nang, tüokaiye nanga awlan kih-e wongnange naoshe ne menge tamnang.

⁶Youngwanpawe shaoshi yatenge ngohpalante meiye ngaophün nang, hüyange imante tinge tamnang.

⁷Iye yoi juteih-a Mosa kaiye ütahte ngaitam hüyange Israel kahtalante I wongnangpu toi ngene tam.

⁸Youngwanpa-a shüpshepuwe maawe hüyange kenpuphei, mongshih ngailak jingne monglaowe hüyange yelakpe kenpuwe maawe ngohnang.

⁹Iye wangpangpute teeyeshaha yengoh; I jinte mongshih ngaiye yengoh.

¹⁰Teman-e tüolak shinne wange Iye temante shaoshi yepha, yejema-a teman ünu hei püohpinpu jingne leih yepha.

¹¹Kahtok mepu wang hangshin dao, teshinne aoyinne Ite yihnoonnang tüolan jingne Iye kenpu ngohnang.

¹²Henyip mepu hangshin jaiye heongye ngoh, teshinne jaiye Iye teman ünu yahtei nang.

¹³Ihalante Ipawe nyakkekenpu shinne, teshinne Youngwanpawe Ite yihnoonpalante nyakken nang.

¹⁴Hangjingne teman-a hanghe phei ling Iye shingnang; teman-a kahmak hei ngohnang she Iye teihtüoh nang.

¹⁵Kahta jingne-a, I üyin-a hüng ja lenang. I jongnang hüyange phao jupeng kih-e jongngai nang;

¹⁶hüyange tüopa tang me wangyang leinang, hüyange hatüo shaaji yenang, shaaji aowe-o tüopa nishe ye-nge.

¹⁷Hüpoi aoyinne Youngwanpate yihnoon nang, iman tangme Iye kenpuwa jintokte jin ngohnang; hüyange I khakshupupa-a hayim phei me-o hayimte ngoi-e.

¹⁸Iye jiengjeppu te aoyin ütingpa me ngoh hüyange aoyinne I ngaokenglan nyingme yahnang tüolan tangme ngohlak.

¹⁹Youngwanpawe yoi ahngpa shotjing wangdang me angnang; I-a üshei tangme wanglam lampu ahngpa.

²⁰Numan okkeshangpu hüyange wongnangpu wangdang shongmokpalan, aowe I ngaokenglante jai, aowe Iye hanghe i tüopa jaiyah, Youngwanpa yihlutüoh.

²¹Numan wangdang ünganlan, numan I shaoshanpalan üshei, aowe Iye mongpu ling, Youngwanpa yihlutüoh!

²²Youngwanpate yihlutüoh, Iye wanglam lampu nyoijinglan me ngohpu Iye lingpu yinmoklan, Youngwanpa yihlutüoh, O ü-yaha!