Read Konyak Naga TÜOWELAIHEM 104 Bible Online

TÜOWELAIHEM 104 - Konyak Naga bible

TÜOWELAIHEM 104

¹Youngwanpa yihlutüoh, ü-yaha! O Youngwanpa, ü-Kahwang, nanga hangshin yongpu! Nanga ütingpa hüyange müktishiwapuwe inyange ngohnang.

²Nanga nang nying nyingke wangngaiye yüoh yange ngohnang. Nange wangdanga nyenok kih-e lan-saayange ang.

³Hüyange nange nok-a yengtang me weyange ngohnang. Nange wangphom-a pongtongtoi ne hüyange wangyang yangteng me ongnang.

⁴Nange wangyanga ngaolan kipa ne jonnang hüyange nang shaoshanpalan ne wanglüppe wangyupu jonnang.

⁵Nange kahtok-a mongjüonge nyoijing tangme nyimme tam, hüyange hatüowa aope-o yepolak.

⁶Nange tüopa tangme ngeng-ahng phakshaoh kih-e yengching ngaiye tam, hüyange kahtanglan yenge maa.

⁷Aope nange yengte teetam, iman yan; nange ngaokeng phapu wüng jaiwante iman yanne küm.

⁸Iman kahtang hei kahjeelan, iman jingne she nange lingetampu nyoijinglan me puwe yannang.

⁹Nange iman kahtokte nishe yünne yeyelak jingne yikeng linge tam.

¹⁰Nange kahjeelante shaoyin yünne tam, hüyange kahtang nipa me yengyin yünne tam.

¹¹Iman-e phao yinmoklan jingne yeng phatam nang; phao gadolan iman yengle meinang.

¹²Ü-o mepu peelan me, wang awhalan-e iman ülüp ling hüyange hemlok.

¹³Wang mepu wai nange kahtang tokme keitam nang, hüyange kahtoknyu-a nang moimanwe maanang.

¹⁴Nange tampu yinmoklan jingne hüng ngaine tamnang, hüyange kahtawe jonlak jingne phümha weangyong; tüokaiye Iye yoi deihaliha ngaipu ok;

¹⁵hüyange mongmeilak jingne wuwüngti ngainang, I hoongli mongonglak jingne olive minnga, hüyange I mongjang wongnanglak jingne hahying pha.

¹⁶Lebanon mepu cedarlan-e wangmanne wai tüonang, Youngwanpa yoijing pee, hanghepa Iye deingai.

¹⁷Tüome awhalan-e iman ülüp lingnang; fir pee me lümlei awhalan-e ülüp lingnang.

¹⁸Shedaopu kahtanglan me meiyah nyoinang hüyange aolelan-a wakkhüw me lonang.

¹⁹Lekeng itlak jingne nange linnyu linge ngai; wangheye I nyiplak hipak shing nang,

²⁰Nange wangnyak ling, hüyange tüopa ünyak me phao yinmoklan khongkümpu ngainang.

²¹Kahwang mepu hahying jingne aope yengkong mailang ühawe meijang lakei waonang.

²²Aope wanghe ngailakei iman leih yenang hüyange iman longsa me shi nang.

²³Tüophei me kahtalan iman toi linglak jingne ngainang hüyange ün manngoi manngoi toi lingnang.

²⁴O Youngwanpa, nange ülam maawe lingyangki! Hangshin kentamong tingpu phei nange tüolan khongküm linge tam! Kahtoknyuwa nange lingpu yinmok-e maanang.

²⁵Yengching ngohnang, yeonge yonge hüyange khaowe, ümeken me ipu yekümpe yinmok üjoi hüyange üyonglan ngohnang.

²⁶Tüome yenglin kemnang, hüyange tüome nange lingpu yengching meinyu, yengching yinmok wonnang.

²⁷Tüolan khongkümpuwe aope wongpongne meng imante hahying phatamlak jingne nang ja shingte monghüm nang.

²⁸Aope Nange imante tüopa pha, hüyange iman-e hah; nange imante hahying pha, hüyange iman moh.

²⁹Aope nang sheta lüplakei, iman nyamnang; aope nange iman mepu lüo yahteilakei, iman li nang, hüyange iman ümeken mepu pei tüopa kahmak ne menge mahnang.

³⁰Aope nange imante lüo pha, iman lingengai; nange kahtoknyute üyin üla pha.

³¹Youngwanpa müktishiwa jinte ngohshih! Iye hanghe ling tüopa tangme Youngwanpa mongmei ngohshih!

³²Iye kahtoknyute leinang, hüyange tüopa ninnang; Iye kahtanglante jontam hüyange iman-e vünkhuh nyeihtam.

³³Ü-üyin jin kümme taowe Youngwanpate hem loklak; ü-üyin ngohpu mongme taowe ü-Kahwangte yihlupu hem loklak.

³⁴Ü-hem kaiye Ite moiman ne mengne ok, hangjingne mongmeipu-a I mepu pei.

³⁵Ünulan kahtoknyu mepu mahne tam shih; ümenglan shaaji tahngoh tam! Youngwanpate yihlutüoh, O ü-yaha! Youngwanpate yihlutüoh!