Read Konyak Naga TÜOWELAIHEM 105 Bible Online

TÜOWELAIHEM 105 - Konyak Naga bible

TÜOWELAIHEM 105

¹Youngwanpate minyong phatüoh, I kheyongpu pongtam tüoh; Iye hanghe ling jatlante pongtam tüoh.

²Youngwanpate yihlupu hem loktüoh, Iye lingpu yashanyali toijeng itamtüoh.

³I Üjaopa min müktishiwatüoh; Ite aoyinne yoppe khüm khongküm mongmei tüoh.

⁴Jampu hüyange Youngwanpa wong yam-e taitüoh; hüyange Ite yelakpe yoppe khümtüoh.

⁵Kahwange lingpu yashan yalipu hüyange Iye phatampu ngaophünpu teihtüoyah;

⁶Numan, I shaoshanpa Abraham huhayimlan; numan Iye lepu kahta Jacob huhayimlan!

⁷Youngwanpa-a teman Kahwang; I ngaokenglan-a kahtoknyu nopu jingne ngohnang.

⁸Iye yoi janpu jiengjeppuwa jinjinte anglak, Iye janpulan-a jin haja jingne ngohlak.

⁹Iye Abraham phei teijiengpu hüyange Iye Isaacte janpulan anglak.

¹⁰Iye Jacob phei jiengjeppu ja, hanghepa jin jinte ngoh tüopa ling.

¹¹Iye i, “Taowe nangte Kanan kahtok phalak.” “Hatüowa nangjing moth ne menglak.”

¹²Aope iman Kanan kahtok me yinpa ja ne shangtoi üjingha hei ngoh;

¹³iman jat ja mepu jat ja ngoiye, ahngching ja mepu ahngching ja ngoiye waakem;

¹⁴Hüpoi Iye iman ao te-o shaoshi yateng phane yetam; iman yinlak jingne, Iye ahngpalante deingao pha.

¹⁵“Taowe lepu shaoshanpalante ümeng tahling; Ü-hipalante tahjon.”

¹⁶Iman kahtokte Youngwanpawe seanyao yengle nyik hüyange iman hahying khongküm yahtei.

¹⁷Hüpoi iman shaote Iye kahta ja shon, Joseph, aohipa rha ne yüo.

¹⁸I ya me yankeilei phünne tam, hüyange yankam jawe I üng me neikonne yük;

¹⁹Iye itte angpu ütingpa me manngai manngai she ang. Youngwanpa ngao Ite ütingpa she hüo.

²⁰Ahngpawe shon tei-e I lanne tam, jatlan wanglam lampawe I lanne tam.

²¹Iye I-a ahngching me yakjongpa ne menge tam hüyange kahmük nopute I-a wanglam lampa ne lingne tam;

²²ahngnok shaoshanpalan tangme wong jonlak hüyange üjeng üshanglan te nyüoweleiye oklak wong pha.

²³Tüophei me Egypt te Israel ta, Ham kahmük me Jacob yinpa ja ne nyoi.

²⁴Youngwanpawe yoijing kahtalante hayim üngang pha hüyange iman wepalan phei wong shenang she iman lingetam.

²⁵Yoijing kahtalante Egyptlan-e nuwe tamlak jingne Iye ling, hüyange I shaoshanpalante yemeipe jonne tam.

²⁶Tüophei me Iye I shaoshanpa Mosa, hei Aaron aoyin Iye leyah shon.

²⁷Iman-e I üngan wongnangpu toishao ling hüyange Ham kahmük me yashanyali ling.

²⁸Iye wangnyak shon, hüyange kahmük-a nyak ne tam; hangjingne I ngaolan phei tüi-e iman hok-we-yong.

²⁹Iye iman yengyinlan iy ne menge tam hüyange iman nyah khongküm toitam.

³⁰Iman kahmük nopu me lukh ngaitam, hüyange ahngnok nehoi lukhke maatam.

³¹Iye ngaopha, hüyange iman kahmük nopu me hoi hüyange khekkhek üngang ngaitam.

³²Wai nanleiye Iye iman kahmükte yilong hei wangyupu shon;

³³Iye imanjing wuwüngwu hüyange phukpeelan mengtam hüyange pee khongkümpu phakke tam.

³⁴Iye ngaopha, hüyange ipu yekümpe shangmin shinne nyaodukh pei;

³⁵iman-e kahmük mepu üphao khongkümpu hah; iman-e deihaliha khongküm hah.

³⁶Iye kahmük me noksalan khongkümpu mepu üwangne puhpu netan hayimlan toitam.

³⁷Tüokhei Iye Israellan woiye ngai; iman-e hon hei khüm yah, hüyange iman khongkümpu pümheita wange hüyange wongnange ngohyangki.

³⁸Egyptlan imante nyampu ngoh, hüyange aope iman taiyapeih mongmei.

³⁹Iye yoijing kahtalan tangme wangphom yüoh, hüyange imante wangnyak me wangngai phalak jingne vün pha.

⁴⁰Iman-e tong hüyange Iye awshi shon. Iman mohtamlak jingne Iye imante wang mepu hahying pha.

⁴¹Iye longnyu ep, hüyange yeng lüowe ngai, wanwüngjeng me yengyin kih-e yün,

⁴²Hangjingne Iye yoi shaoshanpa Abraham phei üjaopa janpu teihtüo.

⁴³Tüokhei Iye leyahpu kahtalan woi ngai, hüyange iman-e hemlok hüyange mongmeipuwe üngwün.

⁴⁴Iye imante ülao kahtalan jing kahtok pha hüyange iman kah iman jingne yahne tam;

⁴⁵tüome nakshih I kahtalan-e I ngaokhüm jonlak hüyange I ngaokenglan khongküm tükke anglak. Youngwanpa yihlutüoh!