Read Konyak Naga TÜOWELAIHEM 106 Bible Online

TÜOWELAIHEM 106 - Konyak Naga bible

TÜOWELAIHEM 106

¹Youngwanpa yihlutüoh! Youngwanpate minyongpu phatüoh hangjingne I-a meinang; Iye kenpuwa üküm yenang.

²Iye lingyangpu toi üyonglan jeng khongkümpu aowe ipu oklak? Yejema-a aowe Ite wangmanne yihlupu oklak?

³Aoyinne I ngaokenglan nyingme yah, aoyinne hanghepa üting tüopa ling iman mongmeilak.

⁴Aope nange nang kahtalante shüpshelakei, Youngwanpa, tao teihtüo yah; aope nange iman yinlakei tao-o ompha.

⁵Nang kahtalan jaalunpu taowe leishih ning hüyange nang jat mongmeipu me jamning, aoyin nangjing, iman mongmei phihlangpu me tao-o om ning.

⁶Toman pajeiyonglan lingpu kih-e toman-e ünu omyangki; toman ümeng me hüyange yemeipe ngohyangki.

⁷Egypt me toman pajeiyonglan-e Kahwangpawe lingpu yashanyali toishao yeshing; hipak phe me Iye imante kenpu hüopu iman-e pemah; hüyange iman-e Ütak Yengching me Ütahpa phei tüi-e hokke wepu ngai.

⁸Hüpoi Iye janyangpu kih-e, I wong üyong hüolak jingne Iye iman yintam.

⁹Iye Ütak Yengchingte teetam, hüyange hatüo eamah. Iye yoi kahtalan-a kahwan tokme kaine tam.

¹⁰Aoyinne imante nu tüolan mepu Iye iman yintam; Iye iman wepalan mepu yintam.

¹¹Hüpoi iman wepalan tangme yenge yüoh, iman sheja nehoi yeto.

¹²Hüwante I kahtalan-e Iye janpute ütinglak hüyange Ite yihlupu hemlok.

¹³Hüpoi iman-e mamshe Iye hanghe lingyangki pemah, hüyange I mepu hengetampu hango yetanpe toi ling,

¹⁴Iman wanwüng jeng me yoonge yah-hupuwe maa hüyange pheih kahtok me Kahwangte tokpu pha;

¹⁵tüokhei iman-e hanghe jingne tong Iye imante pha, hüpoi üne-o iman yo me nyam nyamshepu daktin shonne tam.

¹⁶Iman-e lakjing me Mosate, hüyange Üjaopa Youngwanpa jing Aaron te müktak.

¹⁷Hüwante kahtok ep hüyange Dathan lünge tai hüyange Abiram hei inok muwe tam;

¹⁸iman pheite woipulan tangte vün yu, hüyange tüolan ümeng kahtalan hahshu.

¹⁹Iman-e Sinai me hon phei mahu üpong ja ling hüyange tüopa miengte yoppe khüm;

²⁰iman-e Kahwang müktishiwa-a hüng hahpu mahu mieng ja phei teileih.

²¹Iman-e Egypt me I yashan toishao phei ao Kahwange iman yinne tam tüopa pemah.

²²Yashanyali toishao Iye Ham kahmük me ling; Ütak Yengching me hanghe yashanlakpa toi ngai!

²³Aope Kahwange I kahtalan Iye menge winlak she i, Iye lepu shaoshanpa, Mosa Kahwang sheshao me yong, hüyange iman menge winlak mepu I mongshih ngaipu tükke ang.

²⁴Hüwante iman-e moiheiman pheipu kahtok yeyah, hangjingne ima-a iman-e Kahwange janpute üting yelak.

²⁵Iman imanjing nyenok me ngoh hüyange ngu-nga, hüyange Youngwanpate yejaipe ngoh.

²⁶Tüokhei Iye imante deingao phawe wanwüng jeng me Iye iman li ne tamlak she i;

²⁷hüyange Kahwangte yemengpalan yo me iman huhayimlan, yinching kahtok me iman li ne tam-e yanne tam.

²⁸Tüophei me Peor me Kahwangpa kahtalan Baalte yoppe khüm-e om, hüyange üyin yenangpu Kahwanglante toidopu hah.

²⁹Iman toishao kaiye iman-e Youngwanpa mongshih ünyei ngaine tam, hüyange iman yo me nyam nyamshepu dak dak-e ngai.

³⁰Hüpoi Phinehas yong hüyange püohpupate shangne tam, hüyange leamdak-a lak.

³¹Hatüowa Iye khakshupu teihtüopu she hüyange ngoikülak hipak khongkümpu jingne ngohlak she teih.

³²Meribah yeng me kahtalan-e Youngwanpa mongshih ngaine tam, hüyange iman jeng me Mosa shangpu ngoh yangki.

³³Iman-e I-a jamloi khah-e shangne tam, hangheye teihlak jingne nehoi hipak yeyahpe Iye ngaowe tam.

³⁴Youngwanpawe imante toilak jingne ngaokeng phayangpu kih-e iman-e Kahwang yeshingpu kahtalan yetoi.

³⁵Hüpoi iman-e iman phei mata tongning hüyange iman ülao kahwanglan lamme kem.

³⁶Kahwangpa kahtalan-e miengte yoppe khüm, hüyange tüo kaiye iman mahpu peiyangki.

³⁷Iman-e yoi hala yhala lan kahshihte toidopu pha.

³⁸Iman-e hang ümengo yenangpu nahalan toi, hüyange tüolan Kanan mienglante toidopu ne toipu kaiye kahmük-a iy phei nuwe tam.

³⁹Iman-e iman nying nyingke iman toishao kaiye nuwe shakne tam, hüyange Kahwangte üting yelak.

⁴⁰Tüokhei Youngwanpa-a yoi kahtalante mongshih ngai; imante I mong yehahpu ngai.

⁴¹Iye iman-a Kahwang yeshingpu kahtalan wongte phawe tam, hüyange iman wepalan-e iman tangme wanglam lam.

⁴²Iman-a iman wepalan-e shaoshi yatengne tam, hüyange iman phangte lanshe ong.

⁴³Hipak phe me Youngwanpawe yoi kahtalan yinne tam, hüpoi iman-e hokwe yonglakpa leyah hüyange ünute shelu shelu she hüngta.

⁴⁴Tüoyangpoi iman-e aope üngwün yapeih Youngwanpawe imante jai, hüyange iman shaoshipute Iye lei.

⁴⁵Iman jingne Iye yoi jiengjeppu teihtüo, hüyange Iye kenpu üyong kaiye meiyange yemengtampe lak.

⁴⁶Iye imante shaoshi yateng phapalan khongkümpute iman jingne mongmenge teihne pahi tam.

⁴⁷Toman yinpha, O Youngwanpa toman Kahwang, hüyange jatlan yo mepu toman leih yepha; hümme nakshih toman-e minyong pha ne ok hüyange nang üjaopa min yihlulak.

⁴⁸Israel Kahwang, Youngwanpa yihlutüoh; Ite sha-a hüyange jinjinte yihlutüoh! Hüyange kahta liliye “Amen” she itüoh. Youngwanpa yihlutüoh!