Read Konyak Naga TÜOWELAIHEM 107 Bible Online

TÜOWELAIHEM 107 - Konyak Naga bible

TÜOWELAIHEM 107

¹“O Youngwanpate minyong phatüoh, hangjingne I-a meinang; Iye kenpuwa üküm yenang!”

²Youngwanpawe yintampulan-e hüke ine tamtüoh. Aoyin wepalan mepu yinne tam;

³hüyange kahmüklan mepu leih yenetam, wanghe ongjing hei nyipjing mepu, apye hüyange heye mepu, woijem.

⁴Ütam hango yenangpu wanwüng jeng me wa, hüyange iman nyoilak chingnyu ja te tailak lam yetüo.

⁵Iman seanyao hüyange yengle hüyange monghümpu hango yenangpe mah.

⁶Hüke iman shangwante iman-e Youngwanpate nyik, hüyange Iye iman shaoshi yateng mepu yintam.

⁷Ümeken chingnyu me iman nyoipu oklak, tüopa ngoine Iye iman tingkhakpu lamnyute woitei.

⁸Iman-e Youngwanpate Iye yelakpe kenpu jingne, Iye iman jingne yashanyali toi lingpu jingne minyong phalak yang.

⁹Aoyin yengle yingne tam, hüyange seanyao hahying ümei phei Iye iman mohtam.

¹⁰Ütam-a küpnok me yankeileiye shayange, wangnyak hüyange wangmang me nyoi.

¹¹Hangjingne ima-a iman-e Ütahpa Kahwange phapu ngaokeng phei tüi-e hokke-we-yong, hüyange Iye nyüoweleipu yeyah.

¹²Loishe toilangpu kaiye iman khaiye mah; iman yeita ne ngai, hüyange aowe-o yejam ok.

¹³Hüke iman shangwante iman-e Youngwanpate nyik, hüyange Iye iman shaoshipu mepu yintam.

¹⁴Iye iman wangnyak hüyange wangmang mepu iman yah ngai hüyange iman yankeilei khoihnyaiye phünnetam.

¹⁵Iman-e Youngwanpate Iye yelakpe kenpu jingne, Iye iman jingne linge tampu yashanyali toishao jingne minyong phalak yang.

¹⁶Hangjingne Iye shakphan yan taküplan menge tam hüyange yan wenaolan khüw win.

¹⁷Iman ünu jingne, hüyange iman ümengpa jingne ütam-a üngapa ne meng hüyange shaoshi.

¹⁸Hahying shongme iman yonge yengoh ok hüyange lilak shongte owe pei.

¹⁹Hüwante iman shangwante iman-e Youngwanpate nyik, hüyange Iye iman shaoshipu mepu yintam.

²⁰I ngaokeng phawe Iye iman meitam hüyange mangjong mepu iman yinnetam.

²¹Iman-e Youngwanpate Iye yelakpe kenpu jingne, Iye iman jingne linge tampu yashanyali toishao jingne minyong phalak yang.

²²Iman-e Ite toidopu phei hüyange Iye linge tampu khongkümpu jingne mongmei hem phei ngaowe minyong phalak yang.

²³Ütam-a yengching me yenglin me ongyange kemme yengching me iman üyin nanhah-e nyoinang.

²⁴Iman-e yengching tangme Youngwanpawe I yashan yali toishao hanghe lingpu oklak ngenang.

²⁵Iye ngaokeng pha, hüyange wongnangpu wangyang leine wang, hüyange yengyung lakne leihkheih tam.

²⁶Yenglinlan wangte nowe in hüyange ülute hümme ta ne tam. Hükihpu wengtuh me kahtalan-e iman monghümpu mah;

²⁷iman yujokpalan kih-e pala-e po hüyange nüngnei, iman ngangpu wong khongküm jajang japu ne meng.

²⁸Hüwante iman shangwante iman-e Youngwanpate üngwün, hüyange Iye iman shaoshipu mepu yintam.

²⁹Iye wangyang wangyi ümok hümne tam, hüyange yengyungpuwa jünge lak.

³⁰Ümok hümpu jingne iman mongmei, hüyange iman-e lengpu kih-e Iye iman yengnah te yah ye.

³¹Iye yelakpe kenpu jingne iman-e Youngwanpate, Iye iman jingne lingpu yashanyali toishao jingne minyong phalak yang.

³²Iman-e kahtalan bangjem me I kheyongpu ponge tamlak yang, hüyange ngengtüp woipalan sheshao me Ite yihlupu phalak yang.

³³Iye yengyinlan lanshe ea ne tam, hüyange yünne ngohpu mepu shaoyin lakne tam.

³⁴Aoyin tüome nyoi tüolan nuweshakpu jingne, Iye üyao pheipu kahmük-a hüm pheipu wanwüngjeng ne linge tam.

³⁵Iye wanwüng jeng-a yeng pheipu yengnung ne leijeiye tam, hüyange kahwan kahtok-a yeng ngaijing ne linge tam.

³⁶Iye seanyaopu kahtalan tüo me nyoine tam, hüyange tüopa me ngohlak jingne iman-e chingnyu ling.

³⁷Iman-e kahme üli dei hüyange wuwüngwu shom hüyange ülick wangman-e yah.

³⁸Iye yoi kahtalan moimantam, hüyange iman me hayim üngang ngoh; Iye iman-e tampu yinmok yemahtamlak ne linge tam.

³⁹Aope Kahwang kahtalan yemeipe shaoshi phapalan-e shangne tam, hüyange nao ne tamyange yemeipe mah ta,

⁴⁰Iye imante shaoshi yateng phapalan yeine tampu hüo hüyange üpong yetüopu wanwüng jengme iman wa ne tam.

⁴¹Hüpoi Iye toinanpalan iman yafün ümeng mepu yinne tam hüyange iman noksalan nyeehalan kih-e jaalunne tam.

⁴²Khakwangpalan-e tüopa nge hüyange iman mongmei, hüpoi ümenglan khongkümpu ngaolak ne tam.

⁴³Aoyin kentamong tingnang iman-e tüopa jeng teih tüo shih, iman-e Youngwanpawe yelakpe kenpu teihtüone tamshih.