Read Konyak Naga TÜOWELAIHEM 109 Bible Online

TÜOWELAIHEM 109 - Konyak Naga bible

TÜOWELAIHEM 109

¹O Kahwang, taowe nangte yihlunang; jünge tahngoh tepha!

²Hangjingne ümeng kahtalan hüyange tahleihpalan-e ü-phei tüi-e iman ju epnang. Iman-e ü-phei tüi-e tahleih yee phei ngaonang;

³hüyange hang ümengo yenangpute iman-e ü-jeng yemeipe ngaowe üte shümnang.

⁴Taowe imante kenyapoi hüyange iman jingne yoppe tamyapoi, iman-e ü-phei laayong nang.

⁵Tüokhei iman-e üte ümeipa jingne ümeng hüyange kenne tampu jingne aohüngpu leih phanang.

⁶Ü-wepa ngaophün tamlak jingne ngaophünpa ümeng ütam letamtüoh, hüyange I wepalan yo mepu shejawe Ite ümeng pha ne tam shih.

⁷Ite ngaophün ne tamyange pho ne tamshih; Iye yoppu nehoi ümengne linge tamshih!

⁸I üyin mamshe üküm ngoine tamshih; I toishao-a ülao kahta jawe yahne tamshih!

⁹I hayim khah-ha ne hüyange shekonyuwa wamnyu ne mengtam shih!

¹⁰I hayim nok yenangpe hahyupa ne mengtam shih; iman ngohpu heamtepu mepu iman jange teine tamshih!

¹¹Ite üsea phapawe Ijing mothkat khongküm yah taine tamtüoh, hüyange Iye shange linge ngaipu yinpalan-e yahne tamtüoh.

¹²Aowe-o Ite yayenge teihpu yejema-a Iye tüohpu khahhalan te paowe tükne tahtam,

¹³I mepu huhayimlan khongküm li ne tamshih, hüyange ünepupa jin me I min-a pemah ne tamtüoh.

¹⁴Youngwanpawe Ijing pajeiyonglan ünu teihtüoyah hüyange Inyu ünu aope-o tahwin tam.

¹⁵Youngwanpawe iman ünu hipak phe me teih tüo shih, hüpoi iman, iman nying nyingke lanshe kahtok mepu pemei ne tamshih!

¹⁶Hangjingne hüke kahtawe yayenglak aope-o yeteih tüo; Iye shaoshi yateng ne tam hüyange toihalan, toinanpalan, hüyange jamlak yenangpalan toi.

¹⁷Phoiwümlak jingne Iye kenne teih, Ite phoiwüm-e tamshih! Moiman phalak jingne Iye müktakke teih aowe-o Ite tahmoiman!

¹⁸I nying nyingke wanglam ne menge phoiwümpu I oleng ne meng; Iye yoi-e phoiwümpuwe muh I pümte yeng kih-e pei hüyange I waante minnga kih-e pei!

¹⁹Ite inkhek kih-e inne tamshih hüyange hipak phe me Ite shienghit kih-e nyeihyange ngohshih!

²⁰Youngwanpa, aoyinne üte hükihpu ümengpa ngaowe tamnang, ü-wepalante hüke shangne tamshih!

²¹Hüpoi Youngwanpa, Ü-Kahwang, nange janyangpu kih-e üte jampha, hüyange nang meimapu kaiye tao yintam pha.

²²Hangjingne tao toiha hüyange toinanpa: tao ü-mongjang ülu ngoiye mayahteki.

²³Ünpong yashüm kih-e tao ye-ngepe mahne o-nangki; taowa mokh-ha kih-e puwe teinangki.

²⁴Nyaowelepu kaiye ü-yatuh me wong yenang; taowa üsho hei üwaan ni tokte kaiye hango yenang.

²⁵Aope kahtalan-e tao nge, iman-e üte nyitam nang; iman-e iman ngüm shenge tamnang.

²⁶Üte jampha, O Youngwanpa Ü-Kahwang; nange yelakpe kenpu kaiye tao yinpha!

²⁷aowe tao yinne tam hatüowa nangyak she, O Youngwanpa, ü-wepalan-e shingne tam tüoh.

²⁸Iman-e üte phoiwümne ok, hüpoi nange üte moimanlak. Üte shangne tampalan pa ne tamshih; hüyange nang shaoshanpa tao, mongmei ne tampha.

²⁹Ü-wepalan wüotüopuwe yüohyange shünge tamshih; iman-e iman wüopuwa inkhek inpu kih-e intamshih.

³⁰Taowe Youngwanpate üngwünne minyong phalak; kahtalan bangjem me taowe Ite yihlulak;

³¹hangjingne ima-a Iye toiha kahta shaoyinne ang hüyange aoyinne I toiye tamlak jingne yeitam tüolan mepu I yinne tam.