Read Konyak Naga TÜOWELAIHEM 116 Bible Online

TÜOWELAIHEM 116 - Konyak Naga bible

TÜOWELAIHEM 116

¹Taowe Youngwanpate kennang, hangjingne Iye ü-ngaowüng hüyange taowe yoptongpu jainang.

²Hangjingne Iye üte I na shongnang, tüojingne hangshin me ü-üyin ngohlakeih, teshin taowe Ite nyiklak.

³Lilakpa ütuh khongküm ü-neikonteki; hüyange yimshon-e ü-shongte owe peiteki; Taowa nyampu hei mongshang puwe maawe ngohnang.

⁴Hüwante taowe Youngwanpate nyik, “Youngwanpa, taowe nangte tongnang, tao yinpha!”

⁵Youngwanpa-a yayeng shüpshe phei hüyange khakshupu me; teman Kahwang-a shüpsheye teihpu phei;

⁶Youngwanpawe jamme pongpu yenangpalan yinne angnang; aope tao ütuh me ngoh, Iye tao yinnetam.

⁷Nang toloimei jingte leih yetüoh, ü-yaha, hangjingne Youngwanpawe nangte meiye jonne paiyangki.

⁸O Youngwanpawe tao lilak mepu ü-yaha nange yinne tam; ü-mükphi lakne tam, hüyange tao naone yetampe tükke ang.

⁹Tüokhei üyin ngohpu kahtoknyu me tao Youngwanpa phin me kem nang.

¹⁰“Tao lanshe mahne tamteki” she taowe iwante nehoi, taowe ütinglakpu yelakpe ang;

¹¹Tao mokhpeipu me taowe inang, kahta lili tahleih shaha ngohnang.

¹²Iye üte meiyangpu khongkümpu jingne taowe Youngwanpate hanghe phawe oklak?

¹³Taowe yinyepu wan no inlak; hüyange Youngwanpa min me nyiklak.

¹⁴I kahtalan khongküm jempu bangjem me taowe hanghe janyangki taowe Ite phalak.

¹⁵Youngwanpa sheshao me, I jing üjaolan lipu-a toinyu ngohnang.

¹⁶O Youngwanpa, ütingme taowa nang shaoshanpa ngohnang; taowa nang shaoshanpa, nang shanyu üha ngohnang; Nange ü-rha yatuhshao lantamteki.

¹⁷Taowe nangte minyong phawe dopu phalak, hüyange taowe nangte yoppu phalakei,

¹⁸Nang kahtalan khongküm jempu bangjem me, taowe Youngwanpate janyangpu linglak.

¹⁹Jerusalem me nang khümjing üjao nyoi me, taowe hanghe jan taowe nangte phalak. Youngwanpate yihlutüoh!