Read Konyak Naga TÜOWELAIHEM 118 Bible Online

TÜOWELAIHEM 118 - Konyak Naga bible

TÜOWELAIHEM 118

¹O Youngwanpate minyong phatüoh, hangjingne I-a meinang. hüyange Iye kenpuwa jinte üküm yenangpe ngohnang.

²Israel kahtalan-e hüke itüoh, “Iye kenpuwa jinte üküm yenangpe ngohnang.”

³Aaron noksalan-e hüke itüoh, “Iye kenpuwa jinte üküm yenangpe ngohnang.”

⁴Aoyinne Youngwanpate nyam khongkümpuwe hüke itüoh, “Iye kenpuwa jinte üküm yenangpe ngohnang.”

⁵Ümong mengpuphei taowe Youngwanpate nyik; Iye üte jan hüyange tao nyoi jing üyong me tüoh.

⁶Youngwanpa ü-phei ngohnang, tao ye-nyamlak; kahtawe üte hanghe lingpu oklak?

⁷Üte aowe jamnang hatüowa Youngwanpa ngohnang, hüyange ü-wepalan naowe tampu taowe ngelak.

⁸Kahtate monghüm leima, Youngwanpa te ütinglakpupa shemei.

⁹Ahnghalante monghüm leima, Youngwanpate ütinglakpupa shemei.

¹⁰Jatlan khongküm ü-neikon-e ngohnang; hüpoi Youngwanpa wonge taowe iman mahtam nang!

¹¹Iman-a ükenphe me ü-neikon-e ngohnang; hüpoi Youngwanpa wonge taowe iman mahtam nang!

¹²Iman zahlan kih-e ü-neikon-e pahnang, hüpoi ühuh yo mepu vünkih-e iman mamshe hahtam, Youngwanpa wonge taowe iman mahtam nang.

¹³Üte yemeipe shüm hüyange taowa naowe taiye ngohyangki, hüpoi Youngwanpawe üte jam.

¹⁴Youngwanpawe tao okkeshangne hüyange wongnangne tam; Iya tao yin tampa ne meng.

¹⁵Khakshupulan nyenok me okpu ngepu mongmei üngwünpu jaitüoh: “Youngwanpa yakjah ye-e hatüo lingyangki!

¹⁶Youngwanpa yakjahye ütahpa me no-in ngohnang; Youngwanpa yakjahye-e wongnangpu toi ling.”

¹⁷Tao yelilak; hüleima-a tao üyin me ngohlak, hüyange Youngwanpawe hanghe lingyangki pongtamlak.

¹⁸Youngwanpawe üte mengshe shaoshi pha, hüpoi Iye tao li ne yetam.

¹⁹Üte khakshupupa petenlan eppha, tao ümongte ongnüng hüyange Youngwanpate minyong phaning!

²⁰Hatüowa Youngwanpa peten; khakshupulan shaha tüopate ongpu oklak.

²¹Taowe nangte yihlunang, Youngwanpa, hangjingne nange üte jai, hüyange nange üte okpupa pha.

²²Nokwepalan-e hanghepa long yemei she win, üshei phei toinyu ne tüopa mengeshon.

²³Hatüowa Youngwanpawe lingyangki; tüopa-a teman mükshao me hangshin yashanlakpa!

²⁴Hatüo nyih-a Youngwanpawe lingpu; teman hoongli hah hüyange tüopa me mongonghah.

²⁵Toman yinpha, Youngwanpa, toman yinpha! Tomante okpupa yahkei, O Youngwanpa!

²⁶Youngwanpa min me ao pei, Kahwange tüopate moiman shih! Youngwanpa khümjing mepu toman-e nangte moiman phanang.

²⁷Youngwanpa-a Kahwang; hüyange Iye temante wangngai pha. Numan yak me pequilan phei, mo ükong wangtüoh hüyange wümjong neikonne phet tüoh.

²⁸Nanga ü-Kahwang, hüyange taowe nangte minyong pha nang; Taowe nang kheyongpu pongtamlak.

²⁹O Youngwanpate minyong phatüoh, hangjingne I-a meinang, hüyange Iye kenpuwa jinte üküm yenang!