Read Konyak Naga TÜOWELAIHEM 119 Bible Online

TÜOWELAIHEM 119 - Konyak Naga bible

TÜOWELAIHEM 119

¹Aoyin üyin lamnyume tah-yetüo, Youngwanpa ngaokhüm kih-e aoyin üyin ngoh, iman mongmeilak.

²Aoyinne I ngaokenglan jon, hüyange iman mongjang üsheiye I yam, iman mongmeilak.

³Iman-e yeshupu yeling; iman Youngwanpa lamnyu me kemnang.

⁴Nange tomante nang ngaokhümlan pha hüyange tüolan mongphawe jonlak jingne tomante i.

⁵Nange nyüoleipu tükke anglak tao ütingpa me ngohlak taowe hangshin monghümme teih!

⁶Nang ngaokhümlan khongküm taowe khakshuwe jon ngohma-a, hüwante tao wüotüone yetamlak.

⁷Nang khakshupu ngaophünpu taowe shinge yahpu kih-e taowe jaoshepu mongjang phei nang min yonglak.

⁸Taowe nang ngaokhümlan jonlak; tao aope-o tahwin tampha!

⁹Hangke iye naoshe kahtawe I üyin jaowe angpu oklak? Nang ngaokenglan kih-e nyoi okpu kaiye.

¹⁰Ü-mongjang üsheiye taowe nang shaoshan ne ngangnang; nang ngaokenglan yejaipe yengohlak jingne tao tükyah.

¹¹Nang ngaokhümlan taowe ü-mongjang me angnang, tüowe nakshih taowe nang phei tüi-e ünu ye-omlak.

¹²Taowe nangte yihlunang, O Youngwanpa; üte nang lamnyulan nyüotam pha.

¹³Nang ju mepu linglak ngaokhüm khongküm taowe ü-ju kaiye pongtam nang.

¹⁴Toinyu nanha üngang ngohpu phei sheyong she nang ngaokenglan jonpu me üte wangngai tamnang.

¹⁵Nange nyüoweleipulan taowe yamnang, nange nyüopulan taowe tokke leinang.

¹⁶Nang ngaokhümlan me tao lahnyik nang; nang ngaokenglan taowe yepelak.

¹⁷Nang shaoshanpa, üte meiye ngaopha, hümme nakshih tao üyin me ngoh-e nange nyüopu me kempu oklak.

¹⁸Ü-mük eptam pha, hümme nakshih nang ngaokhüm mepu yashanyalipu ütingpa taowe ngene ok.

¹⁹Tao hatüo kahtok me hipak ütenjapu jingne hei ngohnang; nang ngaokenglan ü-mepu lowe tah ang.

²⁰Ümongjanga yoongeshonpuwe munang; hipak phe me nange ngaophünpuwa taowe shinghu nangki.

²¹Otapalante nange menge tee nang; aoyinne nang ngaokenglan yejai imante phoiwüm nang.

²²Iman-e teetampu hüyange yeitampu mepu tao lantam pha, hangjingne taowe nang ngaokhümlan angyangki.

²³Wanglam lampalan-e ü-phei tüi-e konkon yapeyoi, hüpoi taowe-a nange nyüowetampu hei yamlak.

²⁴Nange nyüoweleipu lan-e üte mongmei pha nang; tüolan-a üte nyüoleipalan.

²⁵Taowa naone tamyange kahmak me lamnang; nange janyangpu kih-e tao ülane lingpha.

²⁶Taowe lingyangpu üshei ümeng jannang, hüyange nange üte janpha; nang lamnyulan üte nyüopha.

²⁷Nang ngaokhümlan shinge oklak jingne üte jampha, hüyange nange nyüowe tampu yashanyali toishaolan te taowe mong phalak.

²⁸Ü-yaha-a mongmengpuwe naone tamteki; nange janyangpu kih-e, tao wongnangne tampha.

²⁹Ünyong yete taipu mepu tao tükyah, hüyange nang meimapuwe nang ngaokhüm üte nyüopha,

³⁰Ngaojaipa ne menglak taowe leteki; nange ngaophün phapute taowe mong phateki.

³¹Nange nyüoweleipute tao woiyangki, O Youngwanpa; tao wüotüo ne tahtam pha.

³²Nang ngaokenglan taowe lahnyikpu phei jailak; hangjingne nange üte shinge oklak ünyei yahpha lak.

³³O Youngwanpa, nang ngaokhüm jeng üte nyüopha, hüyange hipak üshei me taowe tüolan jailak.

³⁴Nang ngaokhüm üte khoih ipha, hüyange taowe tüopate jailak; ü-mongjang üsheiye taowe tüopa anglak.

³⁵Nang ngaokenglan me tao ngao jaiye angne tampha, hangjingne tüolan me taowe mongmei tüonang.

³⁶Nang ngaokhümlan yekaote ü-mongjang lüptampha, hüyange ünyei yah-hupu yete yeje.

³⁷Jajang japute mong phalak mepu ü-mük tükyah; nange janyangpu kih-e üte meiye ngohpha.

³⁸Nang shaoshanpa üte nange janyangpu angpha, aoyinne nangte ngao jainang tüolante nange janyangpu!

³⁹Teephalakte tao nyampu mepu tao yinpha; nang ngaophünpuwa hangshin yashan lakpa!

⁴⁰Nang ngaokenglan taowe jaihunang; üte üyin üla yahkei, hangjingne nanga khakshupupa.

⁴¹O Youngwanpa, nange üte hangshin ken üte hüopha, hüyange nange janyangpu kih-e tao yinpha.

⁴²Hümme nakshih aoyinne üte tee nang tüolante taowe janpu oklak, hangjingne taowe nang ngaote ütinglak nang.

⁴³Ü-ju mepu ütingpa ngao nyie tahyah, hangjingne ümonghümpuwa nange ngaophünpu me ngoh nang.

⁴⁴Taowe nang ngaokhüm wangpangpute jin jinte jailak.

⁴⁵Khak wangpu bumei me tao ngohlak, hangjingne nange nyüopu me ngao jailak jingne tao ngang.

⁴⁶Ahngpalante nang ngaokenglan taowe ngaolak, hüyange tao yewüolak.

⁴⁷Nang ngaokenglan jaiye jonwante tao lahnyik mongkopu tüonang, hangjingne taowe tüolante kennang.

⁴⁸Taowe nang ngaokenglan te kennang hüyange iyeshe nang; nange nyüoweleipute taowe mong phünne phalak.

⁴⁹Nang shaoshanpa üte, nange janyangpu teihtüo pha; tüowe üte monghümpu phanang.

⁵⁰Tao shangpu hipak me nehoi tao toloimeiye tam, hangjingne nange janpuwe üte üyin pha.

⁵¹Otapalan-e üte hipak phe me yaoweleye tam, hüpoi nang ngaokhüm mepu tao yeyan.

⁵²Hipak nangjange taiteki nange ngaophün phapu taowe teihtüo nang, hüyange tüolan-e üte toloimei peitam; O Youngwanpa.

⁵³Aope ümenglan-e nang ngaokhüm mengpu taowe nge, tao mongshih ngaipu loonge ong.

⁵⁴Tao kahtoknyu üyin shohkünoh-e ngohwante taowe nang ngaokenglan jeng hemne ling.

⁵⁵Wangnyak me taowe nang teih tüonang, O Youngwanpa; hüyange nang ngaokhüm jeng taowe teihnang.

⁵⁶Nang ngaokenglan jaiye jonwante, taowe ümong meipu tüonang.

⁵⁷Taowe yampu khongkümpuwa nang, O Youngwanpa; nang ngaokhümlan jailak jingne taowe jannang.

⁵⁸Nange janyangpu kih-e üte shüpshelak jingne ü-mongjang üsheiye nangte tongnang!

⁵⁹Taowe ü-nyoingoh teihtüo, hüyange nange nyüoweleipu me kemlak jingne taowe jan.

⁶⁰Nang ngaokenglan jonlak jingne tao shonne yengohpe mam.

⁶¹Ümenglan-e üjingne tüntün, hüpoi taowe nang ngaokhüm yepe.

⁶²Nange khakshuwe ngaophünpu jingne nangte yihlupu phane tao phawo me lüo.

⁶³Aoyinne nang shaoshan, hüyange nang ngaokhümlan jai jonpalan khongkümpu phei taowa shümpa.

⁶⁴O Youngwanpa, kahtoknyuwa nange yelakpe kenpuwe maayange ngoh nang; Nang ngaokenglan üte nyüopha.

⁶⁵Nange janpu nange tükke ang, O Youngwanpa; hüyange nang shaoshanpa üte, nanga meinang.

⁶⁶Üte konjong hei manlam yahkei, hangjingne taowe nang ngaokenglan te ütinglak nang.

⁶⁷Nange üte shaoshi manpha pe, tao püoh-e kemme ngoh, hüpoi sha-a taowe nang ngaote jai nang.

⁶⁸Nanga hangshin meipu, hangshin yayengpu! Nang ngaokenglan üte nyüopha.

⁶⁹Otapu kahtalan-e üte ngaoleih ngaoyangki, hüpoi ü-mongjang khongkümpuwe taowe nange nyüoweleipu jainang.

⁷⁰Tüolan mongjanga shingpu hango yenang, hüpoi nang ngaokhüm me taowe lahnyik mongkopu tüonang.

⁷¹Üte shangne tampuwa üjingne meipu ne ngoh yangki, hangjingne tüokaiye taowe nang ngaokenglan shinge ok.

⁷²Hon hei khüm ünok haja phei-o, nang ju mepu ngaokeng ü-jingne shemeipu!

⁷³Nang yak-e tao linge ngai, hüyange nange tao yinne ang; üte shinge oklak wong yahkei, hümme nakshih taowe nang ngaokhüm shinge yahlak.

⁷⁴Aoyinne nangte yihnoon nang iman-e aope tao ngelakei mongmeilak, hangjingne nange janpute taowe ütinglak nang.

⁷⁵O Youngwanpa, nange ngaophünpulan khakshupu she taowe shingnang, hüyange nange üte shaoshi phanang, hangjingne nanga ütingpa phei.

⁷⁶Nang shaoshanpa üte nange janyangpu kih-e nange yelakpe kenpuwe tao toloimeine tampha.

⁷⁷Tao üyin me ngoh oklak nanjingne, üte shüpshe pha, hangjingne nang ngaokhüm jingne tao lahnyik mongko nang.

⁷⁸Üte ngaoleih iye ümeng phapu jingne otapalan wüotüone tamshih; üjingnepa-a, taowe nange nyüoweleipu me mong phalak.

⁷⁹Aoyinne nang ngaokenglan shing khongkümpu, aoyinne nangte yihnoon, ü-tangte peine tam shih.

⁸⁰Nang ngaokenglan khakshuwe taowe janshih ning hüyange naowe ye-okpe wüotüolak mepu tükyah.

⁸¹Nang mepu yintamlak jingne ü-yaha mengnyai-e tan nang, hüpoi nang ngao me tao ütinglakpu angnang.

⁸²Nange hangheyin janyangki tüolan jingne yomme leipuwe ü-mük-a yoongteki, aope taowe tong, “Nange aope jamphalak?”

⁸³Wongpong yenangpe winyangpu meisho yutük phei nehoi shemeng she tao mengyapoi, tüoyangpoi taowe nang ngaokenglan yepe.

⁸⁴Taowe hipak hangshin laowe tanlak? Üte yemeipe lingpalante nange aope shaoshi phalak?

⁸⁵Otapu kahtalan, aoyinne nang ngaokhüm yejon, iman-e üjingne jhom shaoteki.

⁸⁶Nang ngaokenglan-a khongküm ütinglaklakpa; ngaoleih iye kahtalan-e üte shaoshi phanang, üte jampha!

⁸⁷Iman-e tao patoi she ngohnang, hüpoi taowe nang ngaokenglante mong yephape yengoh.

⁸⁸Nange üte yelakpe kenpu kaiye üte meiye lingpha, hümme nakshih taowe ngaokhümlan jonpu oklak.

⁸⁹O Youngwanpa, nang ngaowa jinte ngohlak; hatüowa wangdang me jinte ngohlak.

⁹⁰Nang ütingpawe jintokte jin lingnang, nange kahtoknyuwa nyoijing me angetam, hüyange hatüo hüke ngohnang.

⁹¹Sheminlamphe nang ngaokeng kaiye tenyihte ngoiye ngohnang, hangjingne iman khongküm nang shaoshanpalan.

⁹²Nang ngaokhüm me ümongmeilak ne yengoh shihma-a, ü-shangpulan me taowa liteiye ngohhah shepu.

⁹³Taowe aope-o nange nyüoweleipu yepelak, hangjingne tüolan kaiye nange tao üyin me angnang.

⁹⁴Taowa nangjing, tao yinpha! Nang ngaokenglan jailak jingne tao ngangyangki.

⁹⁵Ümeng kahtalan-e tao toilak jingne tannang; hüpoi taowe nang ngaokhümte hei mong phalak.

⁹⁶Sheminlamphe me hipak ityange hei ngohnang she taowe shinge yahteki; hüpoi nang ngaokenglan-a wangngoipu phei ngohnang.

⁹⁷Oh, taowe hangshin nang ngaokhümte kennang! Taowe tüopa jeng nyihlao hipak teihnang.

⁹⁸Nang ngaokenglan-a hipak phe me ü-phei ngohnang, hüyange ü-wepalan phei shetei she tao linge tamnang.

⁹⁹Ü-konnyüopalan üshei phei taowe ünyei sheshingpu; hangjingne nange nyüoweleipute taowe mongpha nang.

¹⁰⁰Wupalan phei sheyong she üme konheingao ngoh nang, hangjingne nang ngaokenglan taowe jai.

¹⁰¹Ünu nyoingoh khongküm taowe tüoh, hangjingne nang ngao taowe jaihupu jingne.

¹⁰²Nange nyüoweleipute taowe mong yephape yengoh, hangjingne nang nangnying nyingke ü-konnyüopa ne meng.

¹⁰³Nange nyüoweleipulan hangshin wüngenyangpu, ü-jute zahtai phei nehoi shewüng!

¹⁰⁴Nang ngaokhümlan kaiye taowe konheingao tüonang, tüokaiye nyoingoh wanglam ümeng khongkümpute taowe nunang.

¹⁰⁵Nang ngaowa ü-ya jingne vüntük, hüyange ü-lam jingne wangngai.

¹⁰⁶Nange ütingpa nyüoweleipu jonlak jingne taowe nyakken-e janpu taowe anglak.

¹⁰⁷Tüoyangpoi, O Youngwanpa, tao shangpuwe loinang; nange janyangpu kih-e, tao üyin me angpha.

¹⁰⁸Taowe yihluwe yoppu yahtepha, O Youngwanpa; hüyange nang ngaokenglan üte nyüopha.

¹⁰⁹Taowe jinte ü-üyin shanglak jingne tümyange ngohnang; nang ngaokhüm taowe yepepe ngoh nang.

¹¹⁰Ümeng kahtalan-e üjingne tün tünne angnang, hüpoi taowe nang ngaokenglan yejaipe yengoh.

¹¹¹Nang ngaokenglan-a üjingne jintepu moth; ü-mongjang me mongmei-a tüolan hei ngohnang.

¹¹²Jinte, hüke ükümte ngoi she, Nange nyüoleipu ngaokhümlan jonlak jingne ü-mongjang me ngohnang.

¹¹³Mongjang ni nyimpu kahtalante taowe nunang, hüpoi taowe nang ngaokhümte kennang.

¹¹⁴Nanga tao shaoyinpa hüyange ü-ree; taowe nange janpu me monghümpu angnang.

¹¹⁵Numan ünu kahtalan, ü-mepu yanne taitüoh. Taowe ü-Kahwang ngaokenglan jailak.

¹¹⁶Nange janyangpu kih-e, üte wong yahkei, hüyange tao üyin me ngohlak; hüyange ümonghümpu mongmeng ne tah tampha!

¹¹⁷Üte nopha, hüyange tao yinlak, hüyange nang ngaokenglante taowe jinte mongpha lak.

¹¹⁸Aoyinne nang ngaokhüm yejai iman lili nange winnang; lowelampu pheipu iman taitüm-a jajang japu ne mengnang.

¹¹⁹Ümenglan khongkümpute nange makwinjing kih-e linge tamnang; tüokhei taowe nange nyüoweleipute kennang.

¹²⁰Nang jeng jengme taowa nyamnang; hangjingne nange ngaophünpu ngohtepuwe taowa nyampuwe loinang.

¹²¹Hanghe üting hüyange shemeipupa taowe lingyangki. Ü-wepalante tao tahwin tüoh!

¹²²Nang shaoshanpate nange jamlakei she janpha; jam loipoipu kahtalante tao shangne tahtampha!

¹²³Nang khakshupuwe yinphalakte leipuwe hüyange nange yinlak jingne janpute leipuwe ü-mük yoongteki.

¹²⁴Nange yelakpe kenpu phei phinne üte jonpha, hüyange nang ngaokenglan üte nyüopha.

¹²⁵Taowa nang shaoshanpa, shinge oklak üte yahkei, hümme nakshih taowe nange nyüopu shinge oklak.

¹²⁶Youngwanpa, nange toilinglak jingne hipak-a sha-a ngohnang, hangjingne kahtalan-e nang ngaokhüm mengteki.

¹²⁷Taowe nang ngaokenglante hon phei shenyei, shemeipupa hon phei shenyei she kennang.

¹²⁸Tüokhei nange nyüoweleipu lilite tao woinang; yeshupu ülam lilite taowe nunang.

¹²⁹Nange nyüowetampulan-a yashanlak ne ngohnang; tüokhei ü-mongjang üsheiye taowe tüolante jainang.

¹³⁰Nange nyüopu khoih-e hüopuwe wangngai phanang, hüyange yeshingpalante konheingao yah peinang.

¹³¹Nang ngaokhümlante taowe lahnyikpuwe taowe ju kayange tan.

¹³²Aoyinte nange ken tüolan khongkümpute nange lingpu kih-e üte lüppe yekei hüyange üte shüpshe pha.

¹³³Nange janyangpu kih-e, tao yeilak mepu tükyah; ünuwe tao okne tahtam pha.

¹³⁴Aoyinne üte shaoshi phanang tüolan mepu tao yinpha, hümme nakshih taowe nang ngaokenglan jailak.

¹³⁵Nang ompu kaiye üte moimanpha hüyange üte nang ngaokhümlan nyüopha.

¹³⁶Ü mükphi yengyin kih-e yünne ta-nang, hangjingne kahtalan-e nang ngaokhüm yejai.

¹³⁷Nanga khakshupupa, O Youngwanpa, hüyange nang ngaokhüm ütingpa.

¹³⁸Nange phapu ngaokenglan-a khakshuwe meinang hüyange shunang.

¹³⁹Ü-mongshipuwe üte vün kih-e sheamnang, hangjingne ü-wepalan-e nang ngaokeng lante yaowele nang.

¹⁴⁰Nange janpuwa hangshin shuwe peinang! Tüopate taowe hangshin ken!

¹⁴¹Taowa üjoiha hüyange ye-i-yeshepu ja, hüpoi nange nyüopulante taowe mong yephape ye-ang.

¹⁴²Nang khakshupupa-a jinte ngohlak, hüyange nang ngaokhüm jinte üting.

¹⁴³Taowa shaoshi hüyange shanghah puwe maa; hüpoi nang ngaokenglan-e üte mongmei peitam.

¹⁴⁴Nange nyüoweleipulan-a jinte ütingpa; üte shinge oklak yahkei, hüyange tao üyin me ngohlak.

¹⁴⁵Ü-mongjang üsheiye taowe nangte nyiknang; üte janpha, O Youngwanpa, hüyange taowe nang ngaokenglan jailak!

¹⁴⁶Taowe nangte nyiknang; tao yinpha, hüyange taowe nang ngaokhüm anglak.

¹⁴⁷Wanghe ongshao me taowe nangte jamlak jingne nyiknang; taowe ümong hümpuwa nange janpu me angnang.

¹⁴⁸Nange nyüoweleipute mong phünne phalak jingne wangnyak phapan tao phayange ngohnang.

¹⁴⁹Hangjingne nange kenpuwa yelakpe ngohnang, üte jaipha, O Youngwanpa, nang shüpshe hüopha, hüyange ü-üyin tükke angpha!

¹⁵⁰Üte yemeipe shaoshi tampalan she-o-she o nang, nang ngaokhüm aope-o yejonpu kahtalan.

¹⁵¹Hüpoi nanga ü-phei owe ngohnang, O Youngwanpa, hüyange nang ngaokenglan-a khongküm yepope ngohnang.

¹⁵²Üshongwante muh taowe nang nyüoweleipulan shingyangki; nange tüolan-a jin jintepu jingne linge tam.

¹⁵³Tao shaoshipute leiyah, hüyange tao yinpha, hangjingne taowe nang ngaokhümte mong yephape yengoh.

¹⁵⁴Ü-ne mengkei, hüyange tao lantampha; nange janyangpu kih-e tao yinpha.

¹⁵⁵Ümenglan jingne yinyelak-a jamloi jainang, hangjingne iman-e nang ngaokhümlan yejai.

¹⁵⁶Hüpoi nange shüpsheye teihpuwa yongnang, O Youngwanpa; nange shüpshe hüopha hüyange tao yinpha!

¹⁵⁷Ü-wepalan hüyange shaoshi tampalan üngang ngohnang, hüpoi taowe nang ngaokhümlan yejonpe yengoh.

¹⁵⁸Aope taowe tüolan lüppeleihpalan te lei, tao mongmengpuwe maa, hangjingne iman-e nang ngaokenglan yejon.

¹⁵⁹Leihuyah, taowe hangke nange nyüoweleipute kennang, Youngwanpa. Nange kenpuwa aope-o yejeilei, tüokhei tao yinpha!

¹⁶⁰Nang ngaokhüm ümongpa-a üting, hüyange nange khakshuwe ngaophünpu khongkümpu me üküm yenang.

¹⁶¹Wong pheipu kahtalan-e ngaoting ye-i-pe üte shümnang. Hüpoi taowe nang ngaokhümte iyeshe nang.

¹⁶²Ütam jawe toinyu nanha tüoyange mongmeipu shinne nange janpulan jingne tao hangshin mongmeipu.

¹⁶³Ngaoleih ipalan khongkümpute tao nunang, hüpoi taowe nang ngaokhümte ken nang.

¹⁶⁴Nange khakshupu me ngaophünpu jingne taowe nyihte nyit me nangmin yongnang.

¹⁶⁵Aoyinne nang ngaokhümte kennang toloimeipu ngohnang, hüyange iman yei-e tamlakne hango yenang.

¹⁶⁶Tao yinne tamlak jingne taowe nangte tan, O Youngwanpa; hüyange nange hanghe ngaopha taowe lingnang.

¹⁶⁷Nange nyüopulan taowe jainang; ü-mongjang üsheiye taowe tüolante kennang.

¹⁶⁸Taowe nang ngaokenglan hüyange nange nyüoweleipulan jainang; taowe lingpu khongküm nange ngenang.

¹⁶⁹Jamlak jingne taowe üngwünpu nang ngoine tamshih, O Youngwanpa! Nange janyangpu kih-e üte shinge oklak yahkei.

¹⁷⁰Taowe yoppute jaipha, hüyange nange janyangpu kih-e tao yinpha!

¹⁷¹Ü-jupen me yihnoonpuwe maatamshih, hangjingne nange üte nang ngaokhümlan nyüowetam.

¹⁷²Ü-yee-e nang ngaokhüm jeng hem loklak, hangjingne nang ngaokenglan-a ütingpa.

¹⁷³Hipak phe me nang yak-a üte jamlak jingne tümyah, hangjingne taowe nang ngaokenglan jonnang.

¹⁷⁴Nange jam-e yinphalak jingne taowe hangshin yoongpu, O Youngwanpa! Nang ngaokhüm me taowe mongmei tüonang.

¹⁷⁵Üte üyin yahkei, tüome nakshih taowe nangte minyonglak; nange nyüoweleipuwe üte jampha.

¹⁷⁶Taowa mahpu nyeehaja leye waa-nang; tüokhei nang shaoshanpa, üte peiye leipha, hangjingne taowe nang ngaokhümlante mong yephape yengoh.