Read Konyak Naga TÜOWELAIHEM 132 Bible Online

TÜOWELAIHEM 132 - Konyak Naga bible

TÜOWELAIHEM 132

¹O Youngwanpa, David hüyange Iye pongyangpu shangshih khongküm teihtüopha.

²Youngwanpa, Iye hanghe jan, wongnangpu Jacob Kahwang nangte Iye jiengjeppu teihtüo pha.

³“Tao nokte minye yejema-a shinlengte min ong;

⁴Taowe ü-mükte shi ne yetamlak yejema-a ü-mükshop ngoih ne yetamlak;

⁵Youngwanpa jingne taowe nyoijing ja wongnangpu Jacob Kahwang jingne nokja taowe manpha manpha she:”

⁶Bethlehem me toman-e jiengjeppu ghonu jeng jai, hüyange hatüowa toman-e Jearim kahko me tüo.

⁷“Kei teman-e Youngwanpa nokte taihah; teman-e I ahngpa shotjing shongme yoppe khümhah.”

⁸Yayongtüoh, O Youngwanpa hüyange nang toloimei nyoite ongtüoh, nang hüyange nangjing wongnangpu ghonu.

⁹Nangjing ngengpalan-e khakshupuwe o ne tamshih hüyange nang kahtalan-e mongmei puwe üngwünne tamshih!

¹⁰Nange nang shaoshanpa Davidte janpu pha; nange lepu ahngpa tahwintüoh, Youngwanpa.

¹¹Nange David phei janpu ümei pha, janyangpuwa nange yah yeyelak: “Taowe nangha yo mepu ja ahngne menge tamlak, hüyange nang phei me Iye wanglam lamlak.

¹²Nang hayimlan-e ü-phei jiengjeppu, hüyange taowe imante phapu ngaokenglan ütingme angma-a, iman jing hayimlan-e jin üshei me ahngne mengpu oklak.”

¹³Hangjingne Youngwanpawe Zion le; Iye tüopa-o Inok ne linghu nang;

¹⁴“Ümeken me Tao jinte ngohlak tüowa tüoken; ümeken me Taowe wanglam lamhunang tüowa tüoken.

¹⁵Yhawe wongpongne mengpu üshei wangman-e Taowe Zionte phalak; yha toinanpute Taowe hahying phei moh tamlak.

¹⁶Iman-e lingeyahpu üshei me Taowe yha jing ngengpalante moimanlak, hüyange yha kahtalan-e hem loklak hüyange mongmeipuwe üngwünlak.

¹⁷Tüoken me taowe David huhayimlan yo mepu sheja ahng üyongne linge tamlak; tüoken me Taowe lepu ahngpa wanglam lampu Taowe yemahpe tükke anglak.

¹⁸I wepalan-a taowe wüotüopuwe yüoh tamlak, hüpoi I ahngchinga jaalunlak hüyange okkeshanglak.”