Read Konyak Naga TÜOWELAIHEM 135 Bible Online

TÜOWELAIHEM 135 - Konyak Naga bible

TÜOWELAIHEM 135

¹Youngwanpate yihlutüoh! Youngwanpa min yongtüoh, numan Youngwanpa shaoshanpalan;

²ao Youngwanpa nok me, teman Kahwang khümjing me yongnang.

³Youngwanpate yihlutüoh, hangjingne I-a meinang; I minte yihlupu hem loktüoh, hangjingne I-a yayeng shüpshe nang.

⁴Hangjingne Iye yoi jingne Jacob, Israel kahtalan I yoi jingne le.

⁵Taowe shingnang teman Kahwang-a yongnang, kahwanglan üshei phei sheyongpupa.

⁶Iye hangheyin mong, wangdang me hüyange kahtoknyu me, yengchinglan me hüyange shelupupa ümongme lingnang.

⁷Iye kahtoknyu üküm yemepu waishihwangkhah wangphom yah peinang; Iye waishihwangkhah jingne wanglüppu lingnang, hüyange Iye yoi wangyang nyoi mepu wangyang yah peinang.

⁸Egypt me Iye üwangne puhpu kahta hüyange yinmoklan toi.

⁹O Egypt, Iye nang tangte Pharaoh tangme hüyange shaoshanpalan üshei tangme yepinlakpa hüyange kahnyingwüngha shon.

¹⁰Iye jatlan maawe mahne tam, hüyange wongnangpu ahnglan toi.

¹¹Amorlan ahngpa, Sihon, Bashan ahngpa, Og, hüyange Kanan mepu ahnglan khongküm toi.

¹²Hüyange Iye iman kahtok-a yoi kahtalante pha; Iye tüolan-a Israel te pha.

¹³O Youngwanpa, nang min jinte ngohnang; O Youngwanpa, jin üshei me nang teihtüopu ngohlak.

¹⁴Hangjingne Youngwanpawe yoi kahtalan tükke anglak; Iye yoi shaoshanpalante shüpshelak.

¹⁵Jatlan jing kahwanglan-a hon hei khüm phei ling; iman-a kahta yakke yaowe ling.

¹⁶Iman me ju ngohnang, hüpoi iman-e yengao ok; hüyange mük ngohnang, hüpoi iman-e ye-nge ok.

¹⁷Iman me na ngohnang, hüpoi yejai ok. Iman ju me lüohe ne nehoi ye-ok.

¹⁸Aoyinne iman ling hüyange imante ütinglak khongkümpu iman-e lingpu mieng kih-e ngohlak!

¹⁹Youngwanpate yihlutüoh, Israel kahtalan; Ite yihlutüoh, numan Aaron noksalan!

²⁰Youngwanpate yihlutüoh, numan Levilan; I min yongtüoh, Ite yoppe khümpu numan üshei!

²¹Zion me Youngwanpate yihlutüoh, Inok Jerusalem me aoyin nyoi minyong tüoh. Youngwanpa yihlutüoh!