Read Konyak Naga TÜOWELAIHEM 139 Bible Online

TÜOWELAIHEM 139 - Konyak Naga bible

TÜOWELAIHEM 139

¹O Youngwanpa, nange üte yamme lei, hüyange nange tao shing.

²Tao aope shot hüyange tao aope lao Nange shing; üjai memuh taowe teihpu khongküm nange shing.

³Tao toi linge ngohyahpu heiya, yejema-a toloimeiye ngohyapeih, nange tao ngenang; nange ü-toishaolan khongküm shingnang.

⁴Ü-yee me ngao ngaishao me muh, Nange khongkümpu shingküm nang O Youngwanpa.

⁵Nanga ü-tokphei sheshao üshei ye me neikonne ngohnang; nang üngan wonge tao jongwan-e angnang.

⁶Hükihpu Nang manlam üjingne jamloi yashanlak; hatüowa taowe shinge yahlak mepu jamloi jainang.

⁷Nang yaha mepu tao üppeken me taiye oklak? Nang shong mepu tao ümmeken me ngaipu oklak?

⁸Tao wangdangte ongma-a, nang tüoken me ngohkülak; taowe yimshon me ü-shinjing lingma-a, nang tüoken me ngohkülak.

⁹Wangngai puphei jam-e tao puwe taima-a, yejema-a henyipye shejaipu yengching nyoi me nyoima-a,

¹⁰tüoken me nehoi nanga tao woine ngohlak, hüyange nang yakjah ye-e üte monge tüklak.

¹¹Taowe wangnyakte tao lowe tamlak jingne yejema-a ü-neikon-e ngohpu wangngaite wangnyak ne menglak jingne taowe tong ma-a;

¹²wangnyak nehoi nang jingne-a yenyaklak, hüyange wangnyak-a wangngai shinne tee-nang. Wangnyak hei wangngai moini nang sheshao me-a ja.

¹³Hangjingne ü-püm hei tangta meitam üshei nange linge ngai; nange ünyu sea me taowa ja ne ange tam.

¹⁴Taowe nang min yongnang hangjingne nangte-a nyamlakpa; nange lingpu khongkümpuwa jeje manngepu hüyange yashanlak shaha. Taowe hatüowa ü-mongjang üsheiye shingnang.

¹⁵Aope ü-waanlan linge wang, kentinge ünyu sea me ütüp linge ange tam. Aope tao tüoken me lowe jongyapeih, tao tüome ngohnang she nange shing.

¹⁶Tao manpuhpe muh nange tao nge. Tüolan yo mepu hango manling wangwante muh üte itpu nyihlan-a khongkümpu nangjing laitep me nyanne ngoh nang.

¹⁷O Kahwang, nang juteihlan-a üjingne hangshin toinyu! Tüolan-a iman hangshin ngohlak!

¹⁸Taowe tüolan iye leima-a, iman-a pheihkek phei nehoi shepang she ngohlak. Aope tao shinlüo, taowa nangphei muh ngohnang.

¹⁹O Kahwang, ümenglan-a nange toiye tamshih phang she taowe hangshin me teih! Yakphei lükpu kahtalan-e ü-shaha tüoh shih phang she taowe hangshin me teih!

²⁰Iman-e nang jeng ümenglam ne ngao nang, iman-e nang min phei tüi-e yemeipulan ngaonang.

²¹O Youngwanpa, aoyinne nangte nu tüolante taowe hangshin nu! Aoyinne nang phei tüi-e yong tüolante taowe hangshin yemeipe teih!

²²Taowe imante ütingpa nupuwe nunang; taowe iman-a ü-wepa she teihnang.

²³Üte yamme leihu, O Kahwang, hüyange ü-kenmong shingyah; üte tokke leihu, hüyange ü-juteih shinge oktüoh.

²⁴Üme yemeipu ütam ngohma-a, yamme ngaotüoh hüyange üküm yenangpu lamte tao woipha.