Read Konyak Naga TÜOWELAIHEM 143 Bible Online

TÜOWELAIHEM 143 - Konyak Naga bible

TÜOWELAIHEM 143

¹O Youngwanpa, taowe yoppu jaipha! Nang khakshupuwe taowe yoppe tongpu jaipha; nang monghümpu me üte janpha!

²Nang shaoshanpa, tao ngaophünpu me tah angpha; hangjingne nang sheshao me khakshupu ao-o yenang.

³Ü-wepawe üte üphangte taiye jangnang hüyange üte lanshe naowe tamnang. Iye taowa wangnyak küpnok me ange tamnang, hüyange taowa üshongwante litepulan kih-e ngohnang.

⁴Tüokhei ü-yaha miengnyai-e tamteki; taowa monghümlakpa yenangpe loiteki.

⁵Lintepu nyihlan taowe teih tüonang; nange lingyangpu khongkümpu jeng taowe teih nang, Nangjing toishaolan ümong me peinang.

⁶Yoppu phei taowe ü-yak-a nangte nonang; kahtok üwan kih-e ü-yaha-a nang yamme towe-nyainang. Oyaih

⁷Sha-a üte janpha, O Youngwanpa! Ü-yaha monghümpu üshei mahteki; nang nying nyingke ü-mepu tahlo, yejema-a aoyin yimchingte taiteki tüolan yo me tao-o ja ne menglak.

⁸Nange yelakpe kenpu napjeih she üte teihne tampha, hangjingne taowe ümonghümpuwa nang me angnang. Taowe yoppu nang tangte ong nang; tao hangke kemlak üte lam hüopha.

⁹Yinlak jingne tao nang tangte tainang, Youngwanpa; ü-wepalan mepu tao yinpha.

¹⁰Nanga Ü-Kahwang; nange mongpu linglak jingne üte nyüopha. Üte meiye lingpha, hüyange yinlak lamnyu me tao woipha.

¹¹Nange janyangpu kih-e tao yintampha, O Youngwanpa; nang khakshupuwe ü-shangshih mepu tao yinpha!

¹²Nange üte kenpu ngohtepuwe, ü-wepalan toitam tüoh hüyange üte shaoshiyateng phapalan üshei menge tamtüoh, hangjingne taowa nang shaoshanpa.