Read Konyak Naga TÜOWELAIHEM 145 Bible Online

TÜOWELAIHEM 145 - Konyak Naga bible

TÜOWELAIHEM 145

¹Nang kheyongpu taowe pongtamlak, Ü-Kahwang hüyange ahngpa; taowe nang min jinjinte yonglak.

²Nyihjeih she taowe nang min yonglak; taowe nangte jinjinte yihlulak.

³Youngwanpa-a kheyongnang hüyange hatüowa ütahpa me yihlulak; I kheyongpuwa teihtüone ye-oklak ne ngohnang.

⁴Nange hanghe lingyangki hatüowa jin ja mepu ünepupa ngoiye yihlulak; nang ütahpa toishao iman-e ponglak.

⁵Iman-e nang müktishiwa hüyange ngaotingpa pheipu ngaolak, hüyange taowe nange lingpu yashanyali toi jingne mong phalak.

⁶Kahtalan-e nange lingpu wongnangpu toishao ngaolak, hüyange nang kheyongpu jeng taowe wünlak.

⁷Iman-e nang meimapu jeng khongküm ilak, hüyange nang khakshupu jeng loklak.

⁸Youngwanpa-a kenpu phei hüyange shüpshe phei, mongshih ngaine-a monglaowe hüyange yelakpe kenpuwe maawe ngohnang.

⁹Youngwanpa-a moilante meinang hüyange Iye lingpu khongkümpute yayenge teihpu ngohnang.

¹⁰Nangjing mokh-ha liliye nangte yihlulak, Youngwanpa; hüyange nang kahtalan khongkümpuwe nangte minyong phalak.

¹¹Iman-e nang ahngching müktishiwapu ngaolak hüyange nang wongnangpu jeng ilak;

¹²hümme nakshih moilan-e nange lingpu wongnangpu toishao, hüyange nang ahngching müktishiwa wong üyong shinglak.

¹³Nang wanglam lampuwa üküm yenang, hüyange nanga jinjintepu ahngpa. Yoi janpu me Youngwanpa-a ütingpa me ngohnang, hüyange Iye lingpu shemin lamphe-a meinang.

¹⁴Aoyin shangnang imante Youngwanpawe paowe tüknang; aoyin toitawe ngoh Iye yienge yah nang.

¹⁵Üyin ngohpu liliye nangte monghüm puphei leinang, hüyange aope iman-e wongpongne meng nange imante hahying pha nang.

¹⁶Nange imante wangman-e pha hüyange moilan wongpong wangngoiye tamnang;

¹⁷Iye lingpu üshei me Youngwanpa-a khakshupu me I toishaolan me shüpshe phei ngohnang,

¹⁸Youngwanpa-a aoyinne Ite nyiknang iman shongme, aoyinne Ite lahnyik mongko puphei nyik iman shongme owe ngohnang.

¹⁹Aoyinne Ite yihnoon nang iman wongponglan Iye phanang; Iye iman-e üngwünpu jainang hüyange iman yinnang.

²⁰Aoyinne Ite kennang moilan Youngwanpawe yinne angnang, hüpoi ümenglan-a Iye menge winlak.

²¹Ü-juwe hipak phe me Youngwanpa min yonglak; I jing yinmoklan khongkümpuwe I üjaopa min jinte yongne tamtüoh.