Read Konyak Naga TÜOWELAIHEM 147 Bible Online

TÜOWELAIHEM 147 - Konyak Naga bible

TÜOWELAIHEM 147

¹Youngwanpate yihlutüoh. Teman Kahwangte yihlupu hem loklak-a hangshin meipu; hatüowa jaihukeipu hüyange Ite yihlupu phalak shunang.

²Youngwanpawe Jerusalem linge yenang; phowe angpalan Iye yah-e yenang.

³Iye mongpaipalan meiye tamnang hüyange iman makolan sha-e tamnang.

⁴Iye shanhalan ütoi inang hüyange jaja heiye min me nyiknang.

⁵Kheyongpu hüyange okkeshangpuwa teman Youngwanpa; I jing konjonga shemme nyüone ye ok.

⁶Innenyaipalan Iye yongne tamnang, hüpoi ümenglan-a kahtok ngoiye showe tamnang.

⁷Youngwanpate yihlupu hem loktüoh, teman Kahwangte kongki ümtük wünge hem loktamtüoh.

⁸Iye wang ütangme wangphom-e yüoh tamnang; Iye kahtok jingne wai shontam nang hüyange kahtanglan me hüng jongne tamnang.

⁹Iye yinmoklante iman hahying phatam nang, hüyange aope iman-e nyikyapeih khawang ühalante heei phatam.

¹⁰I hoongli mongongpuwa wongnangpu koiponglan me yeje, yejema-a I ota mongyongpuwa mongyongpu wetaipalan me yeje;

¹¹hüpoi I hoongli mongongpuwa aoyinne Ite iyeshe, aoyinne Iye yelakpe kenpute ütinglak, tüolan.

¹²Youngwanpate yihlutüoh, O Jerusalem! Nang Kahwangte yihlutüoh, O Zion!

¹³Hangjingne Iye nang petenlan monge angnang; Iye nang kahtalan moiman nang.

¹⁴Iye nang yikenglan yinne ang hüyange shemeipupa tah phei nang moh-e tam.

¹⁵Iye kahtoknyute ngaokeng phanang, hüyange Iye hanghe i mamshe linge tam.

¹⁶Iye matnye kih-e yi yüoh-e tam hüyange tüpla kih-e nyai shaitam nang.

¹⁷Iye longphan kih-e yilong shonnang; Iye shonpu wüngkongpu aowe-o yenün oklak!

¹⁸Tüophei me Iye ngaokeng pha, hüyange yi-a jumah! Iye wangyang shon, hüyange yeng yünne ngai.

¹⁹Iye yoi ngaolan Jacobte ütahte ngaitam, Israel te Iye nyüoweleipu hüyange ngaokhüm pha.

²⁰Iye tüopa-a ülao jatlan jingne yeling; iman-e I ngaokhümlan yeshing. Youngwanpate yihlutüoh!