Read Konyak Naga TÜOWELAIHEM 148 Bible Online

TÜOWELAIHEM 148 - Konyak Naga bible

TÜOWELAIHEM 148

¹Youngwanpate yihlutüoh! Numan ütangye shedaopu me ngohpulan, Wangdang me ngohyange Youngwanpate yihlutüoh.

²Ite yihlutüoh, I jing wangdang shongmokpalan üsheiye, Wangdang mepu Ijing wetaipalan üshei.

³Ite yihlutüoh, linnyu hüyange wanghe, Ite yihlutüoh, tee ngohpu shanhalan üshei.

⁴Ite yihlutüoh, shedaopupa wangdanglan, hüyange wang ütang yeme ngohpu yeng üngang.

⁵Iman khongkümpuwe Youngwanpate yihlune tamtüoh! Iye ngaokeng pha, hüyange iman linge ngai.

⁶I ngaokeng kaiye iman yoi yoi nyoi me jintepu jingne angetam, hüyange iman-e ngao yejaine ye-ok.

⁷Kahtok mepulan-e Youngwanpate yihlutüoh, yengching yinmok hüyange yengching ülu khongkümpuwe;

⁸wanglüppu hüyange yi, yi-oun hüyange wangphom, I ngaokeng jaipu wong nangpu wangyang!

⁹Ite yihlutüoh, kahmüoh hüyange kahtang, ülick pheipu peelan hüyange cedar khongkümpuwe;

¹⁰yinmok üshei, tampu hei yetampu, leh kempu hei awhalan!

¹¹Ite yihlutüoh, ahngpalan hüyange kahta üshei; ahnghalan hüyange ülao wanglam lampalan üshei;

¹²naoyhalan hei naoshelan, lwngmeilan hüyange nahalan moilan.

¹³Iman khongkümpuwe Youngwanpate yihlune tamtüoh! I minna ülaolan üshei phei sheyongpupa; I müktishiwapuwa kahtok hei wangdang ütok me.

¹⁴Iye yoi jat wongnange ling, tüokaiye I kahtalan üsheiye Ite yihlupu pha. Israel kahtalan, I shongme ünyei ne! Youngwanpa yihlutüoh!