Read Konyak Naga TÜOWELAIHEM 16 Bible Online

TÜOWELAIHEM 16 - Konyak Naga bible

TÜOWELAIHEM 16

¹Tao yinne angpha, O Kahwang; yinne ngohlak jingne taowe nang me lonang.

²Taowe Youngwanpate inang; “Nanga Ü-Youngwanpa; meipu toilam lili üjingne nang mepu peinang.”

³Youngwanpate ütinglakpu kahtalan hangshin nahpu! Iman phei jamlakpa üjingne ütahpa mongmei.

⁴Aoyin ülao kahwanglan tangte phet nang, iman nying nyingke shanghah shaoshi yah peinang. Iman-e toidopu me taowe meitam yeyahlak; taowe iman kahwangte yekhüm lak.

⁵Youngwanpa, ü-mothlei meitam hüyange ü-wan-a nang; ü-yatuhshao-a nange tük-angnang.

⁶Yikeng shempu üjingne nyoi mei me hüt-teki; ütingme, üme mothlei ümei ngohnang.

⁷Taowe Youngwanpa min yongnang, hangjingne Iye tao woi; hüyange wangnyak me üjuteih-e üte deingao phanang.

⁸Taowe jinte Youngwanpa omme tamlak jingne kenting nang; I-a ü-o me, hüyange hanghe-o üte popu ye-oklak.

⁹Tüokhei taowe minyong phanang hüyange mongmei nang, hüyange tao lanshe nyampu yenangpe teih nang;

¹⁰hangjingne ima-a lilak üngan wong mepu nange tao yin, hüyange nangte kenpupa nange aope-o yimchingte yeteitam lak.

¹¹Üyin lamnyute woipu lam nange üte hüo; nang omme ngohpuwe tao mongmeiye maatam nang; hüyange jin jintepu jingne üte mongmei peitam nang.