Read Konyak Naga TÜOWELAIHEM 18 Bible Online

TÜOWELAIHEM 18 - Konyak Naga bible

TÜOWELAIHEM 18

¹Taowe nangte kennang, O Youngwanpa, ü-wong.

²Youngwanpa-a ü-longnyu, I-a üjingne wongnangpu yomtep. Ü-Kahwanga ü-jongwanpa hüyange I me tao yinne ngoh nang. Iye tao ree kih-e jongwannang; üjingne I yong hüyange tao yinne ang.

³Taowe Youngwanpate nyik, hüyange Iye ü-wepalan mepu tao yin. Youngwanpate yihlutüoh!

⁴Lilakpa wengtuh khongkümpu ü-neikon-e ngoh; menge winlak wangyange ü-tokme ngütte tam.

⁵Lilakpa wengtuh-a ü-neikon-e ngoh, hüyange mangjonga üjingne tün tünne ang.

⁶Ü-shaoshipu me taowe Youngwanpa te nyik; taowe ü-Kahwangte jamlak jingne nyik, I khümjing me Iye ü-ngaowüng jai; jamlak jingne taowe üngwünpu Iye jaiye yah.

⁷Hüwante kahtoknyu nin hüyange po; kahtang longwak yajüng lüohkheng, hangjingne ima-a Kahwang mongshih ngai.

⁸I nateang mepu vünkhuh lüowe ngai, hahshulak vünloong hüyange vün pheipu kahnyak I ju mepu ngai.

⁹Iye wang tamme shonge ep hüyange I yashong me wangphom ünyak phei yu.

¹⁰I cherub tangme shot hüyange jünge po; I wangyang yangteng tangme kem.

¹¹Iye yoi nying nyingke ünyak-e büang; wangphom üjei, yeng shaha pheipuwe I neikon.

¹²I sheshao me wanglüppu mepu yilong hüyange vün khange ngaipu pei hüyange wangphom ünyak lüowe ngai.

¹³Tüophei me wangmepu Youngwanpawe wangkhong; hüyange üshei phei ütahpa ngaowüng jai.

¹⁴Iye yoi lahhan kep hüyange I wepalan yanne tam; hüyange wangyu Iye iman jange tei.

¹⁵Aope nange nang wepalante teetam, Youngwanpa, hüyange imante mongshih ngaiye waowetam; yengching talenga üko ne ngaitam, hüyange kahtoknyu ükong wangjinga hango yenangpe linge tam.

¹⁶Youngwanpa ütangpa mepu yak yüowe tai hüyange üte noonne pai; yeng ülu mepu Iye tao shui ngai.

¹⁷Iye wongnangpu ü-wepalan mepu yinne tam, hüyange aoyinne üte nu tüolan khongkümpu mepu hangjingne iman-a üjingne jamloi she wongnange ngohyangki.

¹⁸Aope tao shangponge ngoh, iman-e üte shüm, hüpoi Youngwanpawe tao yinnetam.

¹⁹Wengtuh me ngohwante Iye üte jam; Iye tao yinnetam hangjingne ima-a Iye üte monghahpu ngoh.

²⁰Youngwanpawe tao khakshuwe ngohpu kih-e üte hünghao pha, hangne ima-a, hanghepa üting hatüo taowe ling; tao ümeng yenangpu nanjingne Iye üte moiman tam.

²¹Taowe Youngwanpa ngaokhüm nyingme yah-e jaiyangki; Ü-Kahwang mepu tao yanne yetai.

²²Taowe I ngaokenglan khongkümpu jonyangki. Iye phapu ngaokhümlan te taowe yejaipe yengoh.

²³Üme ümeng yenang she, ümeng linglak mepu ü-nying nyingke tükke ngoh yangki she Iye shingnang.

²⁴Tao khakshuwe ngohpu kih-e Youngwanpa üte hünghao pha, hangjingne ima-a hanghe ütingpa hatüo taowe ling, hangjingne üme ümeng yenang she Iye shing.

²⁵O Youngwanpa, aoyinne nangte ütinglak nang imante nange ütinglak nang; aoyin meinang tüolante nange lanshe meinang.

²⁶Aoyin jaosheye ngoh imante nang jaosheye ngohnang, hüpoi aoyin yemei tüolante wepane mengnang.

²⁷Aoyin innenyainang tüolan nange yintam nang; hüpoi aoyin ota nang imante nange khaiye hüonang.

²⁸O Youngwanpa, nange üte wangngai yahkei, ü-wangnyak-a nange yantam tüoh.

²⁹Ü-wepalan hah oklakne nange üte wong yahkei, hüyange iman jing petok lüo oklak ne wong yahkei.

³⁰Hatüo Kahwang! I toishaolan-a hangshin wangngoipu! I ngaolan-e hangshin tien okpu! Aoyinne I me lolak jingne yam tüolan khongküm pu jingne I-a ree ja le nang.

³¹Youngwanpa shaha Kahwang; Kahwang shaha teman yintampa.

³²Aowe tao wongnang ne tam, aowe ü-lamnyu lüowe tamnang I-a Kahwang.

³³Iye üte meishi ya kih-e linge tamnang; Iye tao kahtang me yinne tamnang.

³⁴Shapju jingne Iye üte thrimlei phanang, tüokaiye taowe shewanpupa wenglah jonpu oknang.

³⁵O Youngwanpa, nange tao tükyah hüyange tao yinpha nange üte paowe tükpuwe tao yonge tam, hüyange nang wonge tao tükke yinne ang.

³⁶Tao pholak mepu nange tükke ang, hüyange tao aope-o yeine yetam.

³⁷Taowe ü-wepalante jang hüyange taowe iman pho; taowe iman mah mantam mantam tao yelak.

³⁸Taowe imante shütte tam, hüyange iman yeyong ok; ü-sheshao me iman okpu ye-ngepe lamme ta.

³⁹Nange üte shapju jingne wong pha hüyange ü-wepalan tangme okpu phatam.

⁴⁰Nange ü-wepalan ü-mepu phette taine tam; aoyinne üte nu tüolan taowe mahtam.

⁴¹Jamlak jingne iman-e üngwün, hüpoi aowe-o iman yeyintam; iman-e Youngwanpate nyik, hüpoi Iye imante yejan.

⁴²Taowe iman khoihtam, tüokaiye iman tüpla ne meng, hanghepa wangyange puwe tei! Lam-ang mepu sham kih-e taowe iman tangme yalokke tam.

⁴³Hokke wepu kahtalan mepu nange tao yintam, hüyange jatlan tangme wanglam lampa ne menge tam. Taowe yeshingpu kahtalan-e sha-a ü-shaoshan nang.

⁴⁴Kahhenglan-e ü-sheshao me ümme khümnang; aope iman-e taowe ngaopu jai, iman-e ngao jainang.

⁴⁵Iman mong yeyongpe ngainang hüyange iman lojinglan mepu nin ninshe ngainang.

⁴⁶Youngwanpa üyin ngohnang! Ü-longnyute minyong tüoh! Aowe tao yintam tüopa Kahwang yongelüopu pongtam tüoh.

⁴⁷Iye ü-wepalan tangme üte okpupa pha; Iye jatlan ü-phang te inne tam.

⁴⁸Hüyange ü-phei wepalan mepu yintam. O Youngwanpa, nange üte ü-wepalan tangme okpupa yahkei hüyange yakphei lükpu kahtalan mepu tao yintam pha.

⁴⁹Sha-a tüokhei taowe nangte jatlan yo me minyong phanang! taowe nangte yihlupu hem loknang.

⁵⁰Kahwange I ahngpate okpu üyong phanang; Iye leyahpupa te Iye yelakpe kenpu, David hüyange I huhayimlante jinjinte hüonang.