Read Konyak Naga TÜOWELAIHEM 19 Bible Online

TÜOWELAIHEM 19 - Konyak Naga bible

TÜOWELAIHEM 19

¹Wangdanglan-e Kahwang müktishiwa shingne tamnang; hüyange khongmonge I yaktoi hüonang.

²Nyihjeih ngaipuwe ünepupa nyih peilak shingne tam; yajeih ngaipuwe ünepupa jingne Kahwang müktishiwa hüowe tam.

³Ngao ipu yejema-a ngao ngaipu yenang, iman ngaowüng hango yejai;

⁴tüoyangpoi iman ngaowünga kahtoknyu üshei yete tai, hüyange hatüowa kahtoknyu üküm ngoiye jainang. Wangdang me Iye wanghe jingne nyenok weteki;

⁵napning hatüowa nyemthepa mongmeiye ngaipu kih-e ngainang; wonne wangpu phetlak jingne lahnyikke ngaipu kih ngainang.

⁶I-a wangjeng jaye mepu ngaiye wangnang hüyange jaye wangjeng linne tainang. Hanghe-o Itepu üsheam mepu lo ne ye-ok.

⁷Youngwanpa ngaokhüm khak wangnang; hatüowe yaha üla phanang. Youngwanpawe ngaowe tampulan-a ütinglak lak wangnang, yewang yengoipulante konhei ngao phanang.

⁸Youngwanpa ngaokhümlan-a üting, hüyange aoyinne tüolan nyingme yah mongjang me mongmei nang. Youngwanpawe phapu ngaolan-a khak shunang, hüyange kenmongte shinge yahlak mük pha nang.

⁹Youngwanpate nyamlepu-a jaoshe-e; hatüowe jinjinte woilak. Youngwanpawe ngaophün tampuwa shunang, tüolan-a jinte khakshuwe ngohnang.

¹⁰Tüolan-a shemeipupa hon phei nehoi yahhu keih-e; tüolan-a zahtai nok mepu phei nehoi shewüng.

¹¹Nang shaoshanpa üte tüolan-e kentingne tam nang; tüolan ngao jaipu jingne üte khintak üyong phayangki.

¹²Aohe-o yoiye püohpu ye-nge ok; püohpu lowe angpu mepu tao yintam pha, Youngwanpa!

¹³Üne-o ünu üyong mepu-o tao yintam pha; tüolan-e ü-tangme wanglam lamne tah tam. Hümme nakshih tao wangngoilak hüyange ünu ümeng mepu tao yanne ngohlak.

¹⁴Ü-ju me ngaopulan-a hüyange ü-mongjange yoppe khümpuwa nang shongme yah oklakpa ne mengtam pha, O Youngwanpa, ü-longnyu hüyange ü-yintampupa!