Read Konyak Naga TÜOWELAIHEM 25 Bible Online

TÜOWELAIHEM 25 - Konyak Naga bible

TÜOWELAIHEM 25

¹Nangte, O Youngwanpa, taowe ü-yoppu phanang.

²Nangme, Ü-Kahwang, tao monghüm nang; okpu ye-ngepe wüotüolak mepu tao yinpha; ü-tangme ü-wepalan-e okpu ngene tahtam!

³Aoyinne nangte monghüm nang imante wüotüone tahtam, hüpoi aoyinne nang phei we ne meng, iman wüotüone tamtüoh.

⁴Nang tailam üte hüo pha, O Youngwanpa; nang lamnyulan üte nyüotam pha.

⁵Nang mepu ütingpa me tao nyoilak jingne üte nyüopha; hangjingne nanga ü-Kahwang, aowe tao yinne tam. Tao jinte nangme monghüm nang.

⁶Teihtüoyah, O Youngwanpa, nang yayeng shüpshe hüyange yelakpe kenpu, hanghepa nange üshongwante muh hüo.

⁷Tao naoshewantepu püohpinpu hüyange ünu jingne üte ümeng winpha. Nange yelakpe kenpu hüyange meimapuwe tao teih tüopha, O Youngwanpa!

⁸Hangjingne Youngwanpa-a üjao hüyange meinang, Iye ünulante iman woilak lamnyu nyüowe tamnang.

⁹Innyaipalan Iye ütingpa lamnyu me woinang, hüyange imante Iye teihpu nyüowe tamnang.

¹⁰Youngwanpa lamnyu khongkümpu-a mongjüonge kenpu hüyange ütinglakpu phei; hangjingne aoyinne Iye jiengjeppu hüyange ngaokhümlan jon, Iye woinang.

¹¹Nang min jingne, O Youngwanpa; hüyange ü-ünu ümeng winpha, hangjingne ima-a iman-a loishe ngohnang.

¹²Aoyinne Youngwanpate ngao jainang iman jingne lepu kemlak lamnyu Iye hüolak.

¹³Iman jinte jaalunpuwe woilak, hüyange iman hayimlan-e iman kahtok moth leilak.

¹⁴Aoyinne Ite jaiye woinang, Youngwanpa-a iman phei shümpa; hüyange Iye yoiye jiengjeppu iman phei mongne tamnang.

¹⁵Ü-mük-e Youngwanpa shahate yoonge, hangjingne tünkam mepu üya-a Iye hei yahteilak.

¹⁶Ü-tangte leihyekei, hüyange üte shüpshepha; hangjingne taowa ü-shaha hüyange wong yenang.

¹⁷Ümongshangpu mepu tao toloimei tampha, hüyange tao shaoshipu üshei mepu tao yinpha.

¹⁸Tao shaoshipu hüyange shangpu teih tüopha, hüyange ü-ünu khongküm ümeng winpha.

¹⁹Leihuyah ü-wepalan hangshin ngohpu! Leihuyah iman-e hangshin üte nupu!

²⁰Tao tükyah hüyange tao yinpha; tao yeilak mepu tükyah. Yintampu tüolak jingne tao nang tangte peinang.

²¹Üjing shemeipupa hüyange lahnyikpu üte angtam pha, hangjingne taowe nangte mong hümnang.

²²Israel shaoshipu üshei mepu, O Kahwang, nang kahtalan yintam pha!