Read Konyak Naga TÜOWELAIHEM 27 Bible Online

TÜOWELAIHEM 27 - Konyak Naga bible

TÜOWELAIHEM 27

¹Youngwanpa-a ü-wangngai hüyange ü-yinyetampa; tao aote nyamlak? Youngwanpa-a wengtuh üshei mepu tao lojing; tao aote nyam-moklak?

²Aope ümeng kahtalan-e üte shüm hüyange tao toine ngang, iman yashah hüonang hüyange toita nang.

³Nyahpong ükhonge tao neikon yapeyoi, tao ye-nyamlak; wepalan-e ü-phei tüi-e shümyapoi, taowe yelakpe Kahwangte monghüm lak.

⁴Taowe Youngwanpate ülam ja jingne tongyangki; ülamja shingha taowe yahhunang: Ü-üyin jin kümme Youngwanpa nok me ngohlak; I meimapu tüoken me yashan she, hüyange Iye woitamlak jingne tonglak.

⁵Shangpu hipak me Iye tao I nyoi me lowe anglak; Iye tao khümjing nyenok me yinne anglak hüyange shedaopu longnyu tangme tao nowe tamlak.

⁶Tüokhei ü-neikon-e ngohpu wepalan tangme ü-shang nowe inlak, hüyange mongmei üngwün puphei taowe I khümjing me toidopu phalak; taowe loklak, taowe Youngwanpate yihlulak.

⁷Aope taowe nangte nyik, O Youngwanpa, üte jaipha! Üte shüpshepha hüyange üte janpha!

⁸“Peikei hüyange üte yoppe khümtüoh,” she aope nange i, taowe jan, “Youngwanpa, tao peiküning.”

⁹Nang nying nyingke ü-mepu lowe tahmah! Ü-phei mongshih tahngai kei; nang shaoshanpa jange tahtei tam. Nanga üte jampa ne ngohyangki; tao tahwinpha, tao winne tah tüoh pha; O Kahwang, ü-yinyepa.

¹⁰Ü-pa hüyange ü-nyuwe tao winne tüohne ok, hüpoi Youngwanpawe üte paolak.

¹¹Youngwanpa, nange üte hanghe lingne tamhu nyüopha, hüyange ütuh yenangpu lamnyu me tao woipha; hangjingne ü-wepalan üngang ngohnang.

¹²Ü-wepate tao winne tah tüohpha, hangjingne ngaoleih phei hüyange yeshüpshepe iman-e üte shümnang.

¹³Tüopa üyin jin me Youngwanpa meimapu ngelak jingne tao üyin ngohnang she taowe ütinglaknang.

¹⁴Youngwanpate tan tüoh. Wongnang yah, hüyange nang mongjang wongnang ne tamtüoh. Hüyange Youngwanpate tan tüoh.