Read Konyak Naga TÜOWELAIHEM 31 Bible Online

TÜOWELAIHEM 31 - Konyak Naga bible

TÜOWELAIHEM 31

¹Youngwanpa, tao nang tangte lolak jingne peinang; tao aope-o wüotüo ne tahtam. Nang khakshupuwe tao yintam pha!

²Üte nang na shongpha; tao mamshe yintam pha. Tao lolak longnyu ne, tao yinlak jingne wongnangpu yomtep ne mengpha.

³Nanga ü-lojing hüyange yomtep; nange janyangpu kih-e üte lam hüopha, hüyange tao woipha.

⁴Ü-jingne tüm-e angpu tün mepu tao yinne angpha; ütuh mepu tao lowe tampha.

⁵Taowe ü-nying nyingke nange paowe tükpu phang me ü-yaha angnang. O Youngwanpa, nange tao yinne tamlak; nanga monghümpu Kahwang.

⁶Aoyinne jajang japu kahwanglante khüm, nange nunang, hüpoi taowe nangte ütinglak nang.

⁷Nange yelakpe kenpu jingne tao mongmeilak hüyange hoongli mongonglak. Tao shaoshipu nange ngenang; nange tao shangpu shingnang.

⁸Nange ü-wepate tao pho ne yetam; taowe ümekente mong taiye oklak ne nange üte lantampu pha.

⁹Üte shüpshe pha, O Youngwanpa, hangjingne tao shangpu me ngoh nang; Teshinjange shappu jingne ü müklan me wong yenang; tao lanshe kui mahteki.

¹⁰Mongmengpuwe tao jokteki, hüyange shappe yoongpuwe üjin shohteki. Tao shangpu loipu jingne tao khaiteki; ü-waanlan nehoi jajang japu ne mengteki.

¹¹Ü-wepalan hüyange ünyei ne ü-yupilan, khongkümpuwe üte yemeipe jonnang; aoyinne tao shing iman-e üte nyamnang; aope iman-e lamnyu me tao nge, iman phette tainang,

¹²Tao litephei ja leye, moilanne tao pemeiteki; winyangpu ülam ja leye taowa ngohnang.

¹³Wepalan maapuwe teingaopu taowe jainang; ü-neikon-e nyamlak shaha. Iman-e ü-phei tüi-e konkon nang, tao toine lolamnang.

¹⁴Hüpoi tao ütinglakpuwa nangme, O Youngwanpa; nanga ü-Kahwang.

¹⁵Ü hipak-a nang yakpha mongme, ü-wepalan, aoyinne üte shaoshi yateng phanang, iman mepu tao yinpha.

¹⁶Nang shaoshanpate yayeng phei leipha; nange yelakpe kenpu me tao yinpha.

¹⁷Taowe nangte nyiknang, O Youngwanpa; tao wüotüo tamne tahtampha. Ümenglan wüotüone tam shih; iman lipu yimchingte jünge ta ne tamshih.

¹⁸Otapu hüyange peamlangpu khongküm, aoyinne khakshupulan phei tüi-e yeine tamme ngaonang, tüolan tahleihpalan lakne tamtüoh.

¹⁹Aoyinne nangte nyammele; iman jingne nange angpu toloimeilana hangshin yashanlakpa! Aoyinne nangte ütinglak, nange hangshin yinne tükke angnang; hüyange nang hangshin meipu moilan-e shingnang.

²⁰Kahtalan-e lolamlak mepu nange iman-a nang ngohyange yinne angjing me lowe angnang; iman wepalan-e teetamlak yee mepu lojing ümei me nange iman lowe angnang.

²¹Youngwanpa min yongtüoh! Aope taowa neikonyange hüyange shümyapeih hangke yashan yalipu phei Iye üte kenpu Iye hüopu!

²²I shongmepu taowa Iye jange teiyangpu she tao nyamme teih ngoh. Hüpoi aope taowe Ite jamlak jingne nyikyapeih, taowe üngwünpu Iye jai.

²³Ijing ütingpa kahta üsheiye Youngwanpate kentüoh. Youngwanpawe ütinglakpalan tükke angnang, hüpoi iman-e yampu kih-e otapalante shaoshi tampu phanang.

²⁴Youngwanpate monghümpu numan khongkümpuwe, wong nangyah, monghayah!