Read Konyak Naga TÜOWELAIHEM 34 Bible Online

TÜOWELAIHEM 34 - Konyak Naga bible

TÜOWELAIHEM 34

¹Taowe hipak phe me Youngwanpa min yonglak; Ite yihlupu üju mepu aope-o yelaklak.

²Iye hanghe lingyangki tüojingne taowe Ite yihlulak; aoyin shaoshi yatengne tam, khongkümpuwe minjai yah hüyange mongmei tüoh!

³Youngwanpa yongelüopu jeng ü-phei pongtamtüoh; teman-e jam she Ite yihluhah.

⁴Taowe Youngwanpate üngwün, hüyange Iye üte jan; tao nyampu üshei mepu Iye lanne tam.

⁵Ite leitüoh, hüyange mongmei ngohtüoh; hümme nakshih numan sheta wüokhüwpu aope-o yengohlak.

⁶Toinanpalan-e Ite nyik, hüyange Iye janpu pha; iman shange pongpu üshei mepu Iye iman yintam.

⁷Aoyinne Youngwanpate nyammele tüolan-a yoijing shongmokpalan-e yom nang; hüyange wengtuh mepu iman yintam nang.

⁸Youngwanpa hangshin meipu nangjingne yamme tüoyah. Ime aoyinne lojing yah iman mongmei lak.

⁹I jing kahtalan üsheiye, Youngwanpa te nyamme leyah; aoyinne Ite nyammele, iman wongpong üshei tüonang.

¹⁰Hahying yewangpu jingne yengkong mailang nehoi seanyao nang, hüpoi aoyinne Youngwanpate nyammele ümeipawe yewangpu she yenang.

¹¹Peikei, ü-shümpa naolilan, hüyange üte jaiyah, hüyange Youngwanpate nyamme lelak taowe numante nyüopha ning.

¹²Nange üyin wangngoiye ngohhu nang a? Nange jinlao shangshao hüyange mongmei üyin yahhu nangkü a?

¹³Ümengpa ngaopu nang yee mepu hüyange ngaoleih ipu mepu laktüoh.

¹⁴Ümengpa mepu yantüoh hüyange ümeipa lingtüoh; nang mongjang üsheiye chingmei jingne ngange lingtüoh.

¹⁵Youngwanpawe khakshupulan tangme yomme leinang; hüyange iman-e üngwünpu te jainang.

¹⁶Youngwanpa sheta-a ümeng lingpalan phei tüi-e ngohnang; kahtok mepu iman yeteihtüolak ne lang winlak.

¹⁷Khakshupalan-e Youngwanpate üngwünnang, hüyange Iye jainang; Iye iman shangpu üshei mepu yintam nang.

¹⁸Aoyin mong painang iman shongme Youngwanpa ngohnang; monghümpu üshei mahteiye aoyin ngoh Iye yintam nang.

¹⁹Khakshupu kahta ja shangpu üngang phei shaoshi nang, hüpoi tüolan khongkümpu mepu Youngwanpawe I yintam nang;

²⁰Youngwanpawe I-a lanshe paowe tüknang; I waan ja nehoi paine yetam.

²¹Ünuwe ümengpa toilak; aoyinne khakshupulan te nunang, shaoshi yateng ne tamlak.

²²Youngwanpawe yoi kahtalan yinlak; aoyin I tangte lolak jingne pei yemahpe yinlak.