Read Konyak Naga TÜOWELAIHEM 35 Bible Online

TÜOWELAIHEM 35 - Konyak Naga bible

TÜOWELAIHEM 35

¹Youngwanpa, aoyinne ü-phei tokteinang iman phei toktei tüoh, hüyange aoyinne ü-phei tüi-e hoknang iman phei tüi-e hoktüoh!

²Nang jing wehok o hüyange ree yayah, hüyange tao yinlak jingne peikei.

³Nangjing ngou hei nangjing wa no hongyange üte aoyinne jangnang iman phei tüi-e yongtüoh. “Taowa nang yintampa” she ü-yaha te ipha.

⁴Aoyinne tao toine yamnang iman wüotüone tamtüoh hüyange wangshüm yenangpe lingtam tüoh! Aoyinne ü-phei tüi-e lowe lamnang iman tokpheite yetamtüoh hüyange nungnei ne tamtüoh!

⁵Youngwanpa shongmokpawe imante jange teiye, wangyange puwe teipu tahphan kih-e iman lingtamtüoh!

⁶Aope Youngwanpa shongmokpawe imante jange tailakei, iman lamnyuwa wangnyak hüyange nyene tamshih!

⁷Hango üjepute iman-e üjingne tün angtam nang, hüyange tao pholak jingne jhom shaonang.

⁸Hüpoi iman-e tüopa shingshao me mahtampupawe iman photam lak; iman yoi tün me iman-a pholak hüyange mahtampupa me iman yeilak!

⁹Hüwante Youngwanpa jingne ü-yaha hoongli mongonglak; Iye yinne tampu jingne tao mongmeilak.

¹⁰Ü-mongjang üsheiye Youngwanpate taowe ilak, “Nang kihpu ao-o yenang. Wongnangpalan mepu wong yenangpalan, hüyange shaoshi phapalan mepu toihalan nange tükke ang.”

¹¹Ümeng kahtalan yongnang hüyange taowe hango yeshingpupa toilangpu jeng Iye üte shüoh nang.

¹²Iman-e üte ümeipa nanleiye ümengpa leih phanang, hüyange tao mongyehümpu me yei tamnang.

¹³Hüpoi aope iman dak, ü oleng ne shappe yoongpu meng; taowe ü-nying nyingke hah yingpu ang; taowe ü-shang khuhtayange yop,

¹⁴taowe ü-shümpa hüyange jeiheinao ja jingne yoppu kih-e yop. Tao yoongeshonne khuhta, hüke yoi nyu jingne aowe yoongeshon hüke ngoh.

¹⁵Hüpoi aope tao shangyapeih, iman khongkümpu mongmei hüyange üte phoilak jingne neikonne jem; yinpalan-e üte shüt hüyange üte yelakpe meei.

¹⁶Aowe yafaipa te teetamnang tüo kih-e, iman-e üte fa ngaowe shihkhah-e jemnang.

¹⁷Youngwanpa, hangshin laowe nang hüke hei leingohlak? Iman-e shümpu mepu tao yinpha, yengkong mailang lan mepu ü-üyin yinpha!

¹⁸Hüwante nang kahta bangjem yo me taowe nang min yonglak; iman khongkümpu sheshao me taowe nang min yonglak.

¹⁹Taowe ye-okpute, tüolan ü-wepa tahleihpalan-e mongmeiye leine tahtam. Hangne-o üjepute aoyinne üte nunang, ümong mengpu tangme yaoweleye nyiyaine tahtam.

²⁰Iman-e chingmei me yengao; hüleima iman-e chingmeite kenpu kahtalan phei tüi-e tahleih ülam lili ünyei omme ngaowe tamnang.

²¹Iman-e ü-phei tüi-e iman ju wa-ka; Iman-e i, “Aha, Aha, toman mük-e hatüo ngeteki.”

²²O Youngwanpa, nange tüopa ngeyangki. Tüokhei Youngwanpa, jünge tahngoh; ü-mepu nang jaiye tahngoh tepha!

²³Nang nying nyingke yongtüoh, O Youngwanpa, hüyange üte tienpha; Ü-Kahwang, lüotüoh, hüyange üjeng teih tüopha.

²⁴Nanga khakshupupa, O Youngwanpa, tüokhei taowa ümeng yenang ja she hüotam pha; ü-wepalan-e üte mongmeiye leine tah tampha.

²⁵Imante iman nying nyingke hüke ine tahtam; “Toman I mepu yinne okteki! Toman-e yahhupuwa hatüo hei ngohyangki.”

²⁶Aoyinne tao shanghah shaoshipute mongmeiye leinang lanshe yeine tam-e hüyange nüngnei ne tamtüoh. Aoyinne ü-phei shemeipupa she ngaonang, tüolan-a wüotüopu hüyange wüone tampuwe shang lümme tamtüoh.

²⁷Aoyinne tao ümengpa mepu shaaji lantampu ngehu, mongmeipuwe üngwünne hüyange yelakpe hüke ine tamtüoh. “Youngwanpa hangshin yongpu! I shaoshanpawe okpu ngepute I mongmei nang.”

²⁸Hüwante nang khakshupupa jeng taowe pongtamlak, hüyange taowe nyihlao hipak nang minyonglak.