Read Konyak Naga TÜOWELAIHEM 37 Bible Online

TÜOWELAIHEM 37 - Konyak Naga bible

TÜOWELAIHEM 37

¹Ümenglan jingne mongshange tahteih; aoyinne yeshupe ling imante müktak-e tahteih.

²Hangjingne hüng kuimahpu kih-e iman mamshe ye-ngepe mahlak; Kuimahpu üphao ja leye iman lilak.

³Youngwanpate üting lakyah hüyange ümei lingtüoh; kahtok me nyoitüoh hüyange yinne ngohlak.

⁴Nang mongmei Youngwanpa me yamtüoh, hüyange Iye nangte nang mongjange hanghe yahhu, yahphalak.

⁵Youngwanpate nang nying nyingke phatüoh; Ite ütinglak yah, hüyange Iye nangte jam phalak.

⁶Iye nang khakshuwe ngohpu wangngai-a shom wangngai kih, hüyange nang ngaotingpa-a, heeitam hahju wanghe kih-e lingtamlak.

⁷Youngwanpawe toi linglakte tantüoh, hüyange nünne ngohtüoh; aoyin okkeshang nang, yejema-a aoyinne iman-e tümpu ünu toi me okpu ngenang iman jingne mong tahshang.

⁸Mongshangpu yejema-a mongshih ngaipute tahpha; tüowe-a shangpu te hei woinang.

⁹Aoyinne Youngwanpate ütinglak iman-e kahtok-a mothleilak, hüpoi ümengpalan-a jange winlak.

¹⁰Ümenglan-a mamshe ye-ngepe mahlak; nange iman jingne mongpha-e leilak hüpoi nange iman yetüolak.

¹¹Hüpoi innenyaipalan-e kahtok moth leilak, hüyange jalunpu hüyange chingmei ngohlak.

¹²Kahta ümenge kahta ümeite lowe lam tamnang, hüyange aohüng puphei fa ngaowe tamnang.

¹³Hüpoi Youngwanpawe kahta ümenglante nyitam nang, hangjingne iman-a mamshe mahtamlak she Iye shing nang.

¹⁴Aoyinne toimei lingnang tüolan toilak jingne, toihalan hüyange toinanpalan toilak jingne, ümenglan-e iman yanglow nonang hüyange iman jing wenglah paanang;

¹⁵hüpoi iman-a yoi yanglow phei toilak, hüyange imanjing wenglah-a kawinlak.

¹⁶Ümenglan me moth üngang ngohpu phei-a khakshupu kahta ja me üjingha ngohpu toinyu ne shemeng:

¹⁷hangjingne Youngwanpawe ümenglan jing wong yah teinang, hüpoi aoyin khakshuwe ngohnang, iman-a yinne angnang.

¹⁸Aoyinne I nyingme yah tüolante Youngwanpawe paowe tüknang, hüyange kahtok-a jinte iman jingne menglak.

¹⁹Hipak ümeng me iman kuitapu yengohlak; seanyao yengle wante iman me wange ngoiye ngohlak.

²⁰Hüpoi ümenglan-a lilak; Youngwanpa wepalan-a phao jupeng kih-e mahkümlak; vünkhuh kih-e iman ye-ngepe mahlak.

²¹Kahta ümenglan-e sea yahnang hüyange aope-o shümme üye, hüpoi khakshupu kahtawe ngaoting iye phanang.

²²Aoyin Youngwanpawe moiman iman-e kahtok mothleilak, hüpoi aoyinte Iye phoiwüm iman-a jange teilak.

²³Kahta ja I kemlak lamnyu Youngwanpawe woinang hüyange aoyinne Ite minyong pha Iye jongwannang.

²⁴Iman yeiyapoi, iman toitawe yengohlak, hangjingne Youngwanpawe iman-a loiye paowe tüklak.

²⁵Tao shela ne ngoh hüyange sha-a tao wupa ne mengteki, hüpoi Youngwanpawe khakshupu kahta winne tüohpu yejema-a I hayimlan-e hahyupu taowe aope-o ye-nge.

²⁶Iman-a hipak phe me jajang jawe phapalan hüyange eihate sea tamnang, hüyange iman hayimlan-a moimanpalan.

²⁷Ünupa mepu yantüoh hüyange ümeipa lingtüoh; hüyange nang huhayimlan kahtok me jinte ngohlak.

²⁸Hangjingne ima-a Youngwanpawe hanghe ütingpa tüote kennang hüyange Ite monghümpu kahtalan winne yetüoh. Jintepu jingne Iye iman yinne angnang, hüpoi ümenglan huhayimlan-a jange teilak.

²⁹Khakshupulan-e kahmük-a mothleilak hüyange jinte tüoken me nyoilak.

³⁰Khakshupu kahta ngaowa konjong phei, hüyange I yee-e jinte shuwe ngaonang.

³¹Iye yoi mongjang me yoi Kahwang ngaokhüm angnang hüyange tüopa mepu aope-o yeyan.

³²Kahta ümenge khakshupu kahta te yomme ngohnang, hüyange I toine ngang nang;

³³hüpoi Youngwanpawe iman wepalan yakme yephatam, yejema-a aope Ite tokpu peilakeih I yeine yetam.

³⁴Nang monghümpu Youngwanpa me angtüoh hüyange I ngaokhümlan jaiyah; Iye nangte kahtok phawe moiman tampha lak, hüyange ümengpa jange teipu nange ngelak.

³⁵Kahta ja aowe yemeipe wanglam lam taowe ngeyangki; Iye üshei tangme Lebanon mepu cedar kih-e daowe ngai,

³⁶hüpoi phei me tao linne kem, hüyange I tüome yenangpe ngoh; taowe I yamme lei, hüpoi I ye-nge.

³⁷Kahta ümeite itte leihu khakshupu kahta te yomtehu! Chingmei kahta ja me huhayimlan ngohnang;

³⁸hüpoi ünulan-a jaosheye mahtam nang, hüyange iman huhayimlan-a kootte winnang.

³⁹Youngwanpawe khakshupu kahtalan yinnang, hüyange shangpu hipak me iman yintam nang.

⁴⁰Youngwanpawe imante paowetük nang hüyange iman yinne tamnang; ümenglan mepu Iye iman yinnang, hangjingne ima-a yinlak yamme I tangte iman peinang.