Read Konyak Naga TÜOWELAIHEM 38 Bible Online

TÜOWELAIHEM 38 - Konyak Naga bible

TÜOWELAIHEM 38

¹O Youngwanpa, nang mongshih ngaiye üte shaoshi ne tahtam pha! Yejema-a nang mongshih ngaipu me üte nyim meine tahtam pha.

²Hangjingne Nangjing lahhan phei üte mako sha; nange üte shütte toiloi tai.

³Nang mongshih ngaipu jingne ü-püm tangta meiye yenang; ü-ünuwe ü-waan meiye yenang.

⁴Ü-ünu muleampu me tao hüng nang; tüolan-a kilak jingne jamloi hangki yih ne mengteki.

⁵Hangjingne tao üngapa ne meng, ü-maakote jeih hüyange sea-namteki.

⁶Tao khuh ta-nang, taowa ütuhme yüt; nyihlao hipak tao shap yoongnang.

⁷Hangjingne ü-shiengme jeih dakpu ngohnang, hüyange ü-pümtangta me meipu yenang.

⁸Tao khaiteki hüyange lüppe shüppe ütuhme yüt; ümong shangteki, hüyange jeihtepuwe tao wao ea-nang;

⁹O Youngwanpa, taowe hanghe jingne yoongnang nange shing nang; tao wao eapu khongküm nange jainang.

¹⁰Ü-mongjang mokhteki, ü-wonga kümteki, hüyange ü-mük phihlangpuwa pateki.

¹¹Ü-shümpalan hüyange yupilan ü-shongte, üme maa ngohpu jingne yepeihu; tenok noksa kahtalan nehoi ü-mepu jai taiteki.

¹²Aoyinne tao toihunang üjingne tün tünne tamnang, hüyange aoyinne üte maa pha hunang, menge winlak jingne nyam shao nang; Iman-e nyihlao hipak tao yeitam ne yongpu aope-o yelak.

¹³Taowa napanpa kih-e hüyange yejai, üngapa kih-e hüyange yengao ok;

¹⁴Iye yejai okpu jingne ngao yejanpu kahta kih-e tao ngoh nang.

¹⁵Hüpoi taowe nangte ütinglak nang, O Youngwanpa; hüke O Youngwanpa ü-Kahwang, nange üte janpha.

¹⁶Tao khaiye tapu tangme ü-wepalan-e üte ngot she leine tah tam; tao ye-ok yeshangpu jeng me iman ota ne tahtam!

¹⁷Hangjingne tao payei she hüyange taowa yelakpe shangteki.

¹⁸Taowe püohpinpu jannang; taowa ü-ünuwe shaoshi nang.

¹⁹Ü-wepalan-a wangngoiye hüyange wong nang puphei, hangne-o üjepute üte müktakpu üngang ngohnang.

²⁰Aoyinne ümeipa nanleiye ümengpa leihpha nang iman-a ü-wepalan ngohnang, hangjingne taowe ütingpa linglak jingne ngang.

²¹Tao tahwin tüohpha, O Youngwanpa; yanne tahngoh tepha, Ü-Kahwang!

²²Üte jamne mamshe peikei, O Youngwanpa ü-yinyepa!