Read Konyak Naga TÜOWELAIHEM 40 Bible Online

TÜOWELAIHEM 40 - Konyak Naga bible

TÜOWELAIHEM 40

¹Youngwanpawe jamtamlak jingne taowe nünne tan; hüyange Iye üte na shong hüyange taowe üngwünpu jai.

²Nyam nyam shepu kahsa, yengme yünpu phei lilak mepu Iye tao shui ngai. Iye tao longnyu tangme yinne tam, hüyange tao yajüng mongne tam.

³Iye üte hem üla loklak jingne nyüowe tam, teman Kahwangte yihlupu hem. Aoyinne tüolan nge maapu nyamme teihlak hüyange iman-e Youngwanpate ütinglakpu ngohlak.

⁴Aoyinne Youngwanpate ütinglak, aoyin mounglan tangte yetai, yejema-a aoyinne tahleih kahwanglante yekhüm iman mongmeilak.

⁵Nange toman jingne toi ngang lingyangki, O Youngwanpa toman Kahwang; Nang kihpu ao-o yenang! Nange toman jingne yashan yali she ülam lingyangki. Tüolan-a jamloi she yonge, taowe iman jeng khongkümpu aope-o ngaowe yeküm ok!

⁶Nange dopu hüyange khümme wümpu yeleng; nange yinmok üpümme nowe wümjong me jakke dolak jingne yejema-a ünu yahteilak jingne dolak jingne yetong. Tüonanleiye, nang ngao jailak jingne nange üte na pha;

⁷tüokhei taowe jannang, “Tao hatüo me (Tao tüome ngohnang); üjingne nange winneshaipulan-a Ngaokhüm laitep me ngohnang.

⁸Nange mongpu linglak jingne taowe hangshin lengnang, ü-Kahwang! Nange nyüowe tampulan taowe ümongme angnang.”

⁹Nang kahtalan khongkümpu jempu bangjem me, Youngwanpa, nange toman yinne tampu ngaolan ümei taowe ngaowe tamyangki; Taowe tüopa jeng ngaopu aope-o yelaklak she nange shing.

¹⁰Yinyetampu ngaolan taowe aope-o ü-shaha jingne tükke ye-ang; taowe hipak phe me nange janpu hüyange ütinglak-e teihpu ngaotam nang. Nang kahtalan khongkümpu jempu bangjem me tao jünge yengoh, nange yelakpe kenpu hüyange nang yihnoonpu jeng ngaonang.

¹¹Youngwanpa, nange üte shüpshepu mepu aope-o tahlak. Nange kenpu hüyange ütingpawe jinte tao yinne angpha.

¹²Jamloipu shaoshi ü-ngange tao neikonteki! Ü-ünuwe tao jamme photeki, hüyange taowe shaaji ye-nge ok; Iman-a ü-shang mepu shangmin phei shephong, hüyange taowe ümong lahnyikpu mahteki.

¹³O Youngwanpa, chingmei lamlinge tao yinpha: O Youngwanpa, üte jam ne mamtüoh!

¹⁴Aoyinne tao toine ngangnang iman lanshe mahne hüyange nüngnei ne tamshih. Tao shangpu te aoyinne mongmeinang, iman tokpheite lüppe yetamtüoh hüyange mongshang ne tamshih.

¹⁵Aoyinne üte “Aha! Aha!” she inang, iman wüotüopuwe wüngmak-e lingtamtüoh.

¹⁶Hüpoi aoyin nang tangte pei iman khongkümpu hoongli mongong ne tamtüoh. Aoyinne nange yinyetampu jingne minyong phanang iman khongkümpuwe jinte “Youngwanpa hangshin yongpu!” she ine tamtüoh.

¹⁷Tüoyangpoi tao wong yenang hüyange toinan nang, O Youngwanpa, hüpoi nange tao yepe. Nanga ü-yinyepa hüyange ü-Kahwang, üte jamlak jingne mamyah!