Read Konyak Naga TÜOWELAIHEM 41 Bible Online

TÜOWELAIHEM 41 - Konyak Naga bible

TÜOWELAIHEM 41

¹Toihalan jingne aoyinne juteih mongshang iman mongmeilak; aope iman shangpu ngohlakei Youngwanpawe imante jamlak.

²Youngwanpawe iman tükke ang hüyange iman üyin tünne ang; Iye kahmük me iman mongmei ne tamlak; Iye iman wepalan yak me winne yetüohlak.

³Aope iman daklakei Youngwanpawe imante jamlak, hüyange iman daktin mepu meiye tamlak.

⁴Taowe i, “Taowe nang phei tüi-e ünu omyangki, Youngwanpa; üte shüpshe pha hüyange tao meiye tampha.”

⁵Ü-wepalan-e ü-jenga yemeipe ngaowe tamnang. Iman-e taowa liteiye pemah ne tamhu nang.

⁶Aoyin ü-phei ponglak jingne pei iman-a lahnyik mongkopu yenang; iman-e üjenga yemeipu ngaolan shaha shainang, hüyange taipuwe ken phe me ngaotam nang.

⁷Aoyinne üte nu iman khongkümpuwe imanpa me ü-jeng teingao nang; iman-e taowa shemeng she minpashih she teihnang.

⁸Iman-e inang, “I-a palakne daknang; shaaji I-a yoi shinleng yetüoh oklak.”

⁹Ü-shümpa ümei, ao te taowe ünyei ütinglak, aowe ü-phei jam-e hah, I nehoi ü-phei we ne menge lüpteki.

¹⁰Hüpoi O Youngwanpa, üte shüpshepha, hüyange tao meiye tampha, hüyange taowe wepalante phuh hahpu oklak.

¹¹Iman-e ü-tangme okpu ye-ngelak, hüyange nange üte moiman nang she iman-e shinglak.

¹²Nange üte jamlak, hangjingne hanghepa üting hatüo taowe ling; nange taowa jinjinte nangshongme anglak.

¹³Israel Kahwang Youngwanpa min yongtüoh! Sha-a hüyange jinjinte I min yongtüoh! Amen! Hüyange Amen!