Read Konyak Naga TÜOWELAIHEM 42 Bible Online

TÜOWELAIHEM 42 - Konyak Naga bible

TÜOWELAIHEM 42

¹Meishi jawe shaohayin yengwüng jingne yoongpuke, taowe nang jingne yoongnang, O Kahwang.

²Ü-yahawe Kahwang jingne yengle nang, üyin Kahwang jingne: Tao aope peilak hüyange Kahwang phei hüolak?

³Wangnyak wangngai tao shapnang, hüyange mükphi-a ü-hahyingne mengnang; hipak phe me ü-wepalan-e üte tongnang, “Nang Kahwang üpu?”

⁴Taowe aope lintepu teihtüolakei ü-mongjang painang, aope tao ükhong phei Kahwang nokte ongyapeih, hüyange iman jam-e kempu woiwante, mongmeipu ükhong, hemlokke hüyange üngwünne Kahwang min yongnang.

⁵Hangne teshinne taowa mongmengpu? Hangne taowa teshinne shangpu? Taowe ümonghümpu Kahwang me anglak, hüyange nishe taowe I minyonglak; ü-yinyepa hüyange ü-Kahwang.

⁶Ü-üyin yaha-a ü-mepu shüngetai, tüokhei taowe nang teihtüoh nang; Jordan hei Hermon kahtok mepu, Mizar kahtang mepu.

⁷Shelupuwe shelupute nyik, nangjing nyahlei khongkhakpu me, nangjing yengyungpu hei muleampuwe ü-tangme moiteinang.

⁸Youngwanpawe Iye yelakpe kenpuwa wangngai me hüokei, hümme nakshih taowe wangnyak me hem lokke ü-üyin Kahwangte yoppu ngohne ok.

⁹Kahwangpa, ü-longnyute, taowe i, “Hangne nange tao pemeipu? Hangne ü-wepa ümengpa mepu tao shangpongpu yelakpe ngohlak?”

¹⁰Iman-e teetampuwe taowa mengteki, hüke iman-e “Nang Kahwang-a üpu? she üte yelakpe tongpuwe!”

¹¹Hangne teshinne taowa mongmengpu? Hangne teshinne taowa shangpu? Taowe ümonghümpu Kahwang me anglak, hüyange nishe taowe I min yonglak; ü-yinyepa, hüyange ü-Kahwang.