Read Konyak Naga TÜOWELAIHEM 44 Bible Online

TÜOWELAIHEM 44 - Konyak Naga bible

TÜOWELAIHEM 44

¹Toman nawe tüopa jeng jaiyangki, O Kahwang, tüopa jeng toman pajeiyonglan-e tomante ngao, iman hipak me nange lingpu toi üyong jeng, nangjange lintepu hipak me:

²hangke nange nang nying nyingke ülao jatlan jangetei, hüyange imanjing kahmük me Nang kahtalan nyoine tam; ülao jatlante nange hangke shaoshi ne tam, hüyange nangjing lanpa-a jaalunne tam.

³Nang kahtalan-e kahmük-a iman yanglow phei okpu ne yeje; iman wonge tüopa-a iman-e ye-ok; hatüowa nang üngan wong hüyange wong kaiye, nang omme ngohpu hüopu kaiye, hanghe kaiye nange imante kennang she hüo.

⁴Nanga ü-ahngpa hüyange ü-Kahwang; nange Jacob jingne okpupa pha;

⁵Nang kaiye toman-e toman wepalan toiloi taitamlak: Nang min kaiye toman-e toman phei tüipalante yaloktamlak.

⁶Tao yinphalak she taowe ü-wenglahte yejema-a ü-yanglow te mong yehüm.

⁷Hüpoi nange toman wepalan mepu yintam; hüyange aoyinne tomante nu iman naowe tam,

⁸Kahwang me toman yelakpe ota-nang; hüyange toman-e nang min me jinte minyongpu phalak. Oyaih

⁹Hüpoi sha-a nange toman winne tüoh hüyange tomante nao ne tam; nang shaaji toman nyahponglan phei jamme yelük.

¹⁰Toman wepalan mepu toman phette tailak ne nange tomante lingtam; hüyange hanghepa toman jingne ngoh, iman jingne yah;

¹¹Nyee toipu kih-e toman toine nange tam; yinching kahtok me nange toman yanne tamyangki.

¹²Nange nang kahta muh, pheei nyaiye yüotam, iman-e pheeine yüone yewang she nange teihyangki.

¹³Nange tomante hanghe ling, toman yupilan-e nge, hüyange iman-e tomante phoitam nang hüyange nyitam nang.

¹⁴Jatlan yo me nange toman-a heingaolam ne menge tamnang; iman-e tomante nyiyai-e ngümsheng ne tamnang.

¹⁵Tao nyihjeih she mongmeng shaha phei; wüopuwe taowa küpyange,

¹⁶ü-wepalan mepu ümeng jingne jujampu hüyange teetampu hüyange aoyinne üte müktak, iman mepu jaihüm nang.

¹⁷Toman-e nang yepeyapoi, yejema-a nange toman phei linge tampu jiengjeppu yemeng yapoi, tüolan khongkümpu tomante ngainang.

¹⁸Nangte ngao yejaipe toman manngoh; nang Ngaokhümlan yejaipe toman manngoh.

¹⁹Tüoyangpoi phao yinmok yo me nange toman shüppetüoh; nange toman phaonyu yüngjong me winne tüoh.

²⁰Toman-e toman Kahwangte yoppe khümpu lakpu ne hüyange ülao kahwanglante yoppu ne mengma-a,

²¹Kahwange hatüowa ütingme ye-ngelak a? Hangjingne toman-e teihpu khongkümpu nange shingnang.

²²Hüpoi nang jeng jengme hipak phe me toman-a toitamnang, hüke toiwinlakpa nyee kih-e tomante jonne painang.

²³Lüotüoh, Youngwanpa! Hangne nanga shipu? Nang nying nyingke yongtüoh! Jin jintepu jingne toman tahwin tampha!

²⁴Toman mepu nanga hangne lo-ki? Toman shaoshipu hüyange shangpu tahpe!

²⁵Toman-a khoihpaiye kahtokte yeiteki; toman-a yenaope kahmak ne lemteki;

²⁶Tomante jamne peiyah! Nange yelakpe kenpu kaiye toman yinpha!