Read Konyak Naga TÜOWELAIHEM 45 Bible Online

TÜOWELAIHEM 45 - Konyak Naga bible

TÜOWELAIHEM 45

¹Ahngpa jingne taowe tüopa hem hinwante, ümong janga ngaomeiye maawe ngohnang. Lainyanpa laike kih-e, ü-yi-a ngaomei jingne tümteki.

²Kahta yo me nanga naoshe shemeipupa; nanga nahlange ngao i okpu kahta ja. Tüokhei Kahwange nangte jinte moiman yangki.

³Nang yanglow yankhong me leaptüoh, wongnangpu ahngpa; nanga müktishiwa hüyange kheyongpupa.

⁴Ütingpa hüyange ngaoting ipu tükke anglak jingne, okpu ngelak jingne kheyongpu phei linglei tüoh! Nang wonge nange okpu üyong tüolak!

⁵Nang lahhanlan-a ünah phei jüpnang, tüolan-e nang wepalan mongjangte lütnang; jatlan nang yashong me toita nang.

⁶Nang ahngchinga, O Kahwang jinjinte ngohlak. Kahtalan tangme nange wanglam lampuwa ngaotingpa phei lam nang;

⁷hanghe khakshupu tüopate nange kennang, hüyange ünupate nunang. Tüojingne Kahwangpa, nang Kahwange nang leyangki; hüyange ülao ahnglan phei shenyei she nang tangme mongmei shokke tam.

⁸Seakih-hüngti hei khahkhoihti üpe meipu lan-a nang nyemo me; meinyu fa phei o lingyangpu ahngnok yinme nange hemlokpalan mongmei ne tam.

⁹Nang gho me ngohpu shekolan yo me ahngnok yhapaüolan, hüyange ahngpa shotjing yakjah yeme-a shemeipupa ophir hon oleng o-yange ahngyhanyu yongyange!

¹⁰Jaiyah, O yhala, taowe hanghe i jaiyah: nang kahtalan hüyange nang pheipulan petüoh.

¹¹Nang shemei yaomapuwe nangte ahngpa lahnyiklak; I-a nang nokpu, tüokhei nange Ite jailak yang.

¹²Tyre kahtalan-e nangte hünghao yah peikülak; hakpalan-e nange kenne tamlak jingne nganglak.

¹³Ahngyhalan-a ahngnok me, yha hangshin shemei yaomapu! Yha jing phakshaoh ülüowa hon ve phei dak.

¹⁴Phihlangpu phakshaoh ülüo phei yha ahngpa tangte peinang; yha jing jamnyuwe woiyange, hüyange iman khongkümpuwa I tangte woipei.

¹⁵Hoongli mongong puphei hüyange mongmei phei iman pei hüyange ahngnokte ong.

¹⁶Nang me, ü-ahngpa; nangjing pajeiyonglan leine ahngpalan-e netan halan maawe ngohlak; hüyange nange iman-a kahtoknyu khongkümpu tangme wanglam lampa ne menge tamlak.

¹⁷Taowe lokpu hem-e nang üyin jin kümme müktishiwa ne tamlak, hüyange ngoikülak hipak khongkümpu me kahta liliye nangte yihlulak.