Read Konyak Naga TÜOWELAIHEM 50 Bible Online

TÜOWELAIHEM 50 - Konyak Naga bible

TÜOWELAIHEM 50

¹Ütahpa Youngwanpa Kahwange, wanghe ongjing mepu tüopa nyipjing ngoipu kahtoknyute nyiknang hüyange ngaonang.

²Kahwange Zion chingnyu shemeiyaomapu me wange ngoipu phei müktishiwa nang.

³Teman Kahwang peiküki, hüpoi jünge yeje; hahshulak vün-a I sheshao me, nyam nyamshepu waishihwangkhah-a I neikonne.

⁴Iye yoi kahtalante ngaophünpute saki ja leye leilak jingne Iye wangdang hei kahtoknyute nyik.

⁵Iye i, “Aoyinne ü-phei jakke dopu phawe jiengjeppu ling, ütinglakpu ü-kahtalan ü-tangte jemtam tüoh.”

⁶Wangdanglan-e Kahwang-a khakshupupa, I muh pongtehpa she pongetam. Oyaih

⁷“Ü-kahtalan jaiyah! Hüyange taowe ngaopha ning; taowe numan phei tüi-e tinge tampha ning, Israel, Taowa Kahwang, nang Kahwang.

⁸Nange toidopulan jingne taowe nangte yeteetamlak hüyange nange hipak phe me jakke dopu yah peinang.

⁹Tüoyangpoi nang mahu tampu nok mepu mahu üpong yejema-a nang yinmok yo mepu younlan taowe wongpongne yeje;

¹⁰hangjingne phao me ngohpu yinmoklan khongkümpu hüyange kahtang hajalan tangme ngohpu mahulan-a üjing.

¹¹Phao awhalan khongkümpu hüyange kahko me ngohpu yinmok lili üjing.

¹²“Tao seanyaowe ngohshih ma-a, taowe nangte yengao hahshepu; hangjingne ima-a kahtoknyu hüyange tüome ngohpu sheminlam phe-a üjing.

¹³Taowe mahu üpong mei hahlak a? Yejema-a youn iy yinglak a?

¹⁴Nange minyong phapuwa nange Kahwangte toidopu ne mengtam tüoh, hüyange nange janyangpu khongküm Ütahpa te phatüoh.

¹⁵Aope shaoshipu peilakeih üte nyikpha; taowe nang yinlak, hüyange nange üte yihlupu hem loklak.”

¹⁶Hüpoi Kahwange ümenglante inang, “Hangne nange ü-ngaokhümlante namnolak? Hangne nange ü-jiengjeppu jeng nang jupen me ngaolak?

¹⁷Taowe nangte tingetamlak mepu nange tien, nange ü-ngaokhümlan yeyah.

¹⁸Nange ngepu kuhpalan lili phei nang shümpa ne meng, hüyange phwngngampalan phei nang püang.

¹⁹“Ümeng ngaolak jingne nanga jinte tümyange ngoh; ngaoleih ngaolak jingne nang yee yenüngnei.

²⁰Nange nang pheipu jeiheinao jate yemeipe ngaolak jingne tüm yange hüyange iman te ümeng yam.

²¹Tüolan khongküm nange ling, hüyange taowe hango yengaope ngoh, tüokhei tao-o nang kih-e ngohnang she nang teih. Hüpoi sha-a taowe nangte menge teetam nang, hüyange toishaowa ngaiphaihye nangte linge tamnang.”

²²“Üte ye-i-yeshepu numan, tüopa te jaiyah, yejema-a taowe numan mahtamlak, hüyange numan yintamlak jingne ao-o yenanglak.

²³Minyong phapuwa üte wangshüm hüowe toidopu ja ngohnang, hüyange üte ngaojaipalan khongküm taowe ütingme yintamlak.”