Read Konyak Naga TÜOWELAIHEM 51 Bible Online

TÜOWELAIHEM 51 - Konyak Naga bible

TÜOWELAIHEM 51

¹Üte shüpshe pha, O Kahwang, hangjingne nange yelakpe kenpuwa ngohnang. Hangjingne nang shüpshe üyonge ü-ünu kwotte winyangpha!

²Tao nuweshakpu khongküm poiyang pha hüyange ü-ünu mepu tao jaowe tampha.

³Taowe püohpu taowe shingteki; taowe hipak phe me ü-ünu jingne teihnang.

⁴Taowe nang phei tüi-e ünu omyangki, nang tokte kaiye hüyange nange hanghepa ünu she i tüopa lingyangki. Tüokhei üte ngaophünlak nanga shunang; tao yemei she ilaka nanga ting nang.

⁵Ütingme puhwante muh taowa ünu me ngoh; tao puhpu nyih memuh taowa ünu me ngohyangki.

⁶Nange yahhupuwa khakshuwe hüyange ütingpa me ngaopu ngohnang; nang konjonge ü-kenmong te nyüolei tam pha.

⁷Phemkhah phei tao poitampha, hüyange tao jaolak; tao poitam pha, hüyange tao yi phei sheheng she henglak.

⁸Taowe hoongli mongongpu hüyange mongmeipu ngaowüng jaining; hüyange nange tao menge winpoi hüyange paiye winyapoi, tao üne-o nishe mongmeilak.

⁹Ü-ünulan jingne nang mük büangtüoh hüyange ü-ümenglan khongküm kwotte wintüoh.

¹⁰Üme mongjang üla lingtam pha, O Kahwang, hüyange üme ütingpa yaha üla hintam pha.

¹¹Nang shong mepu tao tahwin pha; Ü-mepu nang Üjao Yaha tahyah tei.

¹²Nange yinye tampu mepu peipu mongmei üne-o üte yahkei; hüyange nang ngao jailak ne üte monge tampha.

¹³Hüwante ünulante taowe nang ngaokhüm nyüotamlak, hüyange iman nang tangte lüppe yelak.

¹⁴O Kahwang, nanga ü-yinyetampa Kahwang, iy shaipu ünu mepu nange tao yinpha; hüyange ü-yee-e nang Üjaopa jeng wongnang puphei hemloklak.

¹⁵O Youngwanpa, nange ü-jupen eptampha; hüyange ü-juwe nang minyongpu pongtamlak.

¹⁶Hangjingne Nange toidopulan yeleng, yejema-a tüolan-a taowe dohah shepu; jakke dopu phapute nang mong yemei.

¹⁷Kahwang te yah oklak ne toidopu-a, mongjang paipu ngohnang. O Kahwang, mongjang paipu hüyange monglüppu nange ye-i-yeshepe yelinglak.

¹⁸Nange monghahpu kih-e Zionte ümei lingtüoh; Jerusalem jantpenyu linge yetüoh.

¹⁹Hüwante meimei-e toidopuwe nang moimanlak hüyange toman-e jakke dopu phei; hüyange mahu üponglan-a nang wümjong me toidolak.