Read Konyak Naga TÜOWELAIHEM 55 Bible Online

TÜOWELAIHEM 55 - Konyak Naga bible

TÜOWELAIHEM 55

¹Taowe yoppu jaipha, O Kahwang; taowe yoppe tongpu mepu nang tahyan tai!

²Üte jaipha hüyange üte janpha; taowe ümongshangpuwe khaimeng puweih.

³Ü-wepalan-e toiteipu jingne tao nyamteki. Ümenglan-e yemeipe lingpu jingne pateki. Iman-e üte shaoshi peitam nang; iman-e üte mongshih ngainang hüyange nunang.

⁴Tao nyamteki, hüyange lilak ne yeonge nyampuwe üte shepteki.

⁵Taowa nyampu hei ninpuwe mongjüonge tükteki; mokhlakpawe tao naoteki.

⁶Awshu kih-e üme üyang ngoh shihphang she taowe teinang. Tao puwe taihah shepu hüyange toloimei hahshepu!

⁷Ütingme tao üjaite puwe tailak hüyange wanwüng jeng me ü-nok linglak. Oyaih

⁸Wangyang leipu hüyange waishihwangkhah mepu tao mamshe ü-nying nyingke lojing yamlak.

⁹Ü-wepalan ngao nüngneiye tamtüoh, O Youngwanpa! Chingnyu me taowe moppu hüyange yakphei teilükpu ngenang.

¹⁰Wangnyak wangngai neikonyange, shangpu hüyange ümeng ngaipuwe maayange.

¹¹Kenphe me ümeng shaha; shangne tampu hei lowelampu shaha chingkeng lamnyu me ngohnang.

¹²Wepawe üte phoiwümme tampu ne mengma-a, hatüo taowe nünne ok hah shepu; ü-phei weihpalan-e yongelüowe hüopu ne mengshihma-a, iman sheshao mepu ü-nying nyingke lo hah shepu!

¹³Hüpoi hatüowa nang, ü-taopa, shümpa eiha hüyange shümpa ümei,

¹⁴teman-e jawe japhei lahnyik mongkopu teingao hüyange khümjing me jamshe yoppe khüm.

¹⁵Iman hipak ngoishao me ü-wepalan minli shih; yimchingte iman üyin me minta shih! Ünuwa iman noksa me hüyange iman mongjang me.

¹⁶Hüpoi üte jamlak jingne Youngwanpa Kahwangte nyiknang, hüyange Iye tao yinlak.

¹⁷Shomme, nyihning me, hüyange wangnyak me, tao shangpu hüyange wao eapu I tangte peinang; hüyange Iye ü-ngao jaikülak.

¹⁸Tao teshin jangpu ü-wepalan üngang phei hokpu shapju mepu Iye tao yinyange leih yenetamlak.

¹⁹Kahwang, aowe üküm yenangpe wanglam lamnang. Oyaih . Iye üte jailak hüyange iman naotamlak. Hangjingne ima-a iman-e jeileilak mepu yemong; hüyange iman-e Ite yenyam.

²⁰Üwangne ngohpu ü-taopawe I shümpalante shüm; Iye yoi janpu meng.

²¹I ngaowa an üyao phei nehoi shenye, hüpoi I mongjang me aohüngpu ngoh; I ngaowa minnga phei nehoi shekhai, hüpoi tüolan-e yanglow nah-e wettpu shinne wet.

²²Nang shangpuwa Youngwanpate kitam tüoh, hüyange Iye nang tükke anglak; khakshupu kahtalan Iye aope-o naone yetam külak.

²³Hüpoi nange, O Kahwang, tüolan toilangpalan hüyange tahleihpalan-a iman üyin jin tangkhüw nehoi manlinpe iman mangjongte yah peilak. Ü-jingne-a, taowe nangte ütinglaklak.