Read Konyak Naga TÜOWELAIHEM 58 Bible Online

TÜOWELAIHEM 58 - Konyak Naga bible

TÜOWELAIHEM 58

¹Numan wanglam lampalan-e khakshuwe ngaophünpu pha man? Kahta lilite numan-e meijange ngao phün ya?

²Yeje! Numan-e linge oklak ne-a numan-e ünu hei teihnang, hüyange kahmük me hokke wepu ümeng ngaitam nang.

³Ümeng kahtalan-a iman jin küm-e püoh-e tainang; iman puhpu nyih memuh iman-e tahleih ngaonang;

⁴Iman-e pu kih-e soihüng maawe ngohnang; iman-e pujam napanpa kih-e iman na me yimnang;

⁵hangheye pu phopalan-e nyikpu ngaowüng yejai, yejema-a deitahpu yepahipawe yoh kahpute yejan.

⁶O Kahwang, iman ju me iman fa mengtamtüoh: O Youngwanpa, yengkong mailang ühalan fa khaitamtüoh.

⁷Yünne taipu yeng kih-e iman mahne tamtüoh; lamnyu mepu hüng kih-e iman menge winshih;

⁸Iman-a sham ükhai me juwe lakpu shapjeng kih-e mengtam shih; iman-a wangngai ja me nehoi ye-ngepe mang me puhpu naotak kih-e mengtam shih.

⁹Iman-e tüopa shingshao me, iman-a hüng kih-e heappe winlak; nyam nyam shepu I mongshih phei Kahwange iman-a üyin me ngohwantemuh puwe teikümlak.

¹⁰Aope ünulante shaoshi phapu ngeyalakei, khakshupulan mongmeilak. Ümenglan iy tangme iman kemme linlak.

¹¹Kahtalan-e ilak, “Üting memuh khakshupulante hünghao phateki; üting memuh kahtoknyute aowe ngaophün nang tüopa Kahwang ngoh nangki.”