Read Konyak Naga TÜOWELAIHEM 59 Bible Online

TÜOWELAIHEM 59 - Konyak Naga bible

TÜOWELAIHEM 59

¹Ü-Kahwang, ü-wepalan mepu tao yintam pha; aoyinne üte shümnang tüolan mepu tao yintampha!

²Ümeng kahtalan mepu tao yinpha; iy yinghupalan mepu tao yintam pha!

³Leihuyah! Sha-a nehoi iman-e tao toilak jingne tannang; mengshipu kahtalan-a ü-phei tüi-e jemnang, hatüowa ü-ünu jingne yejema-a taowe püoh-e lingyangpu jingne yeje, O Youngwanpa;

⁴yejema-a iman nyoijinglan jingne iman hehpuwa taowe ülam ja püohpin yangpu jingne yeje, O Youngwanpa.

⁵Yongtüoh, Ütahpa, Youngwanpa Kahwang, hüyange üte jamne peikei; nanga Israel Kahwang! Lüotüoh hüyange yemengpalante shaoshi tamtüoh; lüppelopalan ünute shüpshe tah hüo! Oyaih

⁶Iman ünpong me leih yenang, chingnyu neikonne kemwante kui hüngpu kih-e hünge kemnang.

⁷Iman-e teepu hüyange yemeipe ngaopu jaiyah. Iman ngaowa ju me yanglow jeppu kih-e, tüoyangpoi, “Imante-a aowe-o yejaipu,” she iman-e teihnang.

⁸Hüpoi nange imante nyitamtüoh, Youngwanpa; yemengpalan khongkümpute nange phoiwüm tamtüoh.

⁹Taowa nang wong me monghahpu ngohnang; nanga ü-lojing, O Kahwang.

¹⁰Ü-Kahwange üte kennang hüyange ü-tangte peikülak; ü-wepalan papu Iye üte ngene tamkülak.

¹¹Iman tahtoi, O Kahwang, hükesüküma-a ü-kahtalan-e pemah ne ok. Nang wonge iman yanne tamtüoh hüyange iman nao tamtüoh, O Youngwanpa, toman yintampa.

¹²Ünuwa iman jupen me; iman ngaolili-a ünu shaha; iman otapu me iman phone tamtüoh; Hangjingne ima-a iman-e phoinang hüyange tahleih nang;

¹³Nang mongshih ngaiye iman mengtamtüoh; iman lanshe mengtam tüoh. Hüwante nakshih, Israel me Kahwange wanglam lamnang she kahta liliye shinglak; hüke I wanglam lampuwa kahtoknyu nopu tangme jaalunlak. Oyaih

¹⁴Iman ünpong me leih yenang, hüke iman chingnyu neikonne kemwante kui hüngpu kih hüngnang;

¹⁵Iman hahying yamme waanang, hüyange iman-e wange yetüo yahma-a hüonang.

¹⁶Hüpoi nang wong jeng taowe loklak; napjeih she nange yelakpe kenpu jeng taowe loklak. Hangjingne Nanga ü-lojing ne ngohyangki, tao shangepongpu hipak me ü-yomtep ne ngohyangki.

¹⁷O ü-wong, taowe nang minyong hem loklak; Nang, O Kahwang, ü-lojing, taowe kenpu Kahwang.