Read Konyak Naga TÜOWELAIHEM 62 Bible Online

TÜOWELAIHEM 62 - Konyak Naga bible

TÜOWELAIHEM 62

¹Kahwange tao yinne tamlak jingne taowe nün okke tannang; taowe I ja shingte mong nyengnang.

²I ja shinge tao tükke angnang hüyange tao yinnang; I-a tao yinne angpa hüyange taowe aope-o yenaope yengohlak.

³Hangshin laowe, ao heamtepu pelak shinne wong yenangpe taipu kahta ja te numan liliye shümlak?

⁴Numan-e I yihnoonpu shotjing mepu I yeitailak shaha teih; numan-e ngaoleih ilakte lahnyik. Numan-e minyong phapu ngao ngao, hüpoi numan mongjang me numan-e Ite phoiwümnang. Oyaih

⁵Taowe Kahwang shahate mong nyeng nang; taowe ü-monghümpu I me hei angnang.

⁶I ja shinge tao tükke angnang hüyange tao yinnang; I-a tao yinne angpa; hüyange taowe aope-o yenaope yengohlak.

⁷Tao yinyepu hüyange yihnoonpu Kahwang me hei ngohnang; I-a üjingne wongnange yinne tampa; I-a ü-lojing.

⁸Ü-kahtalan, hipak phe me Kahwangte ütinglak tüoh. Nang shangpu üshei Ite itüoh, hangjingne I-a teman lojing. Oyaih

⁹Kahtalan khongkümpuwa ülüoja leye hei ngohnang; üjoi üyong ja kih kih-e jajang japu. Iman toklak me angtüoh, hüyange iman tok me yeongkülak; iman-a ülüo phei nehoi shetan.

¹⁰Hokke shengpu me nang ütinglakpu tah ang; kuh leih-e küw tüolak she mong tah hüm; nang hakke-hepu jaalun yapoi, tüolante nang mong tah nyeng.

¹¹Kahwange ja me ngao; nishe taowe tüopa jai, hüke ünganwonga Kahwang jing;

¹²hüyange Iye kenpuwa yelakpe ngohnang she; ütingme Nange nang nying nyingke, O Youngwanpa; I toishao phei shuwe kahta lilite hünghao phanang.